Matye 23 - N’KANGULU WUMOONË

Yeesu wabikinyi miloonji n'kaakë i Sifalisyaanu

¹ Oboobo, Yeesu wukaambë nkoongë baatu yi bilaanzi byaandi.

² « Miloonji n'kaakë i Sifalisyaanu bëke lizitë li kuzimunë n'kaakë Moyiizë.

³ Lufwenikini kubëlenvukilë i kusalilë makë mooso bëlukaambë mu kuvaangë. Kasi keelë lulëkukililë sinsalulu syaawu, cibilë baawu bisë n'salilaangë ko manë bën'loongaangë.

⁴ Baawu bën'kaangaangë bifundë bizitë i kubituulaangë fë yilu mëvangëti më baatu, kasi baveekë, kuzolë ve kunyikunë luzalë lu kooko mu kubëzudi mu kunyikunë bizitu byaawu.

⁵ Mëvaangë maawu mooso, bën'vaangaangë bwiinji baatu be bëmonë. Oboobo, baawu bën'natë mëbuungu mësemu fë mbuunzu kaambofo mu kooko, baawu bëke bipingëlë biyangililë bën'kusyaangë biyuungë byaawu.

⁶ Baawu kuzolaangë biikë bi ntwaalë mu bikaanvu i sibaaku si ntwaalë mu bizutununu.

⁷ Baawu kuzolaangë bëbëbilaangë yi luciinzu looso fë ciyalëlë i kutelwaangë “N'loonji” ke baatu.

⁸ Kasi beeno, lwe leembwaanu kuteelu “N'loonji”, cibilë benubooso lukeeli baanë bë nguli i luke N'loonji mweekë.

⁹ Nutelyaanu ko wosuku muutu fë n'toto “Taatë”, cibilë beeno luke tokë yi Taatë mweekë vwiili, wunë wuke ku yilu.

¹⁰ Nuyiteelyaangë ko “Fumu”, cibilë Fumu mweekë tokë vwiili ke yiinu : Kliistu.

¹¹ Wunë vyokisi bunenë mu nkoongiinu, naandi wum'ba ciseelu ciinu.

¹² Wunë wuyizanjikë, wum'byesëmë, i wunë wum'besëmë wun'zanjiku. »

Yeesu wabikinyi bumpilë-mpiipi bu miloonji n'kaakë i Sifalisyaanu

¹³ « Lusifu lwiinu olo, beeno miloonji n'kaakë i Sifalisyaanu, bimpilë-mpiipi! Cibilë beeno lun'zibikaangë Lwaangu lu mëyilu fë twaalë baatu. Licyelikë beeno lusë n'kotë ko i lusë m'biikë kukotë ko banë bën'tiisi kukotë. »

¹⁴ « Lusifu lwiinu olo, beeno miloonji n'kaakë i beeno Sifalisyaanu, bimpilë-mpiipi! Cibilë beeno ke vokënaangë lifwa li bëfwiili mu sinzo syaawu i ke vaangaangë mëfukë-nyeembo mu misaambu yikulë-yikulë, bwiinji baatu bëlumonaangë. Mati bwaawu beeno lun'fuundusu mu mëseembu më kwaatë-yekë! »

¹⁵ « Lusifu lwiinu olo, beeno miloonji n'kaakë i beeno Sifalisyaanu, bimpilë-mpiipi! Cibilë beeno lun'taabaangë m'bu i n'toto mu kubakë cita maanë cimweekë i mooti lwam'bakë, beeno lukun'vangisi kuba mwaanë buluunji bu mbaasu, fë vyaasi wali kuvyokililë yi beeno. »

¹⁶ « Lusifu lwiinu olo, bileesi-nzilë bifwa-meeso! Beeno lun'tubaangë : “Ningë wun'viipë wun'lefilë mpesë mu n'zo-Nzaambi, lyaawu olyo lisë ntaangu kwaandi ko. Kasi ningë wun'lefilë mpesë mu woolë yi n'zo-Nzaambi, naandi wufwenikini kulicinzikë.”

¹⁷ Biyimbu i bifwa-meeso! Bivyokilili mbicye? Woolë, voo n'zo-Nzaambi yin'vangisi woolë kuba yisemu?

¹⁸ Benuviinu lun'tubaangë : “Ningë wun'viipë wun'lefilë mpesë mu civakululu, olyoolyo lisë ntaangu ko, kasi ningë bëlefilë mpesë mu mpaku yike fë yilu civakululu, naandyoowo wufwenikini kuvaangë lyo kwalefilë mpesë.” »

¹⁹ A bifwa-meeso! Licyelikë, linë livyokilili? Mpaku voo civakululu cin'vangisi mpaku kuba yisemu?

²⁰ Wunë wun'lefilë mpesë mu civakululu, wun'lefilë mpesë mu naveekë i byakë byooso mu naandi.

²¹ Wunë wun'lefilë mpesë mu civingë ci saantu, wun'lefilë mpesë mu cyaawu i mu byakë byooso bike faawu.

²² Wunë wun'lefë mpesë mu li yilu, wun'lefilë mpesë mu ntaanji Nzaambi i mu wo wukalë faawu.

²³ « Lusifu lwiinu olo, beeno miloonji n'kaakë i Sifalisyaanu, bimpilë-mpiipi! Cibilë beeno lun'futilaangë ke Nzaambi cikuuku cimweekë ci likuumi mu bikunë buke mëluundu më mputu i mimpoko i mëkayi mëfiimbu, kasi beeno kulekulë sinsinunu sivyokili n'ciinzë mu n'kaakë, buke : n'sulumunu, bwalëkisi i ciminu. Nkanë maawu ma mëvangënë ntetë i mëmesë kuzimbëkënë ve.

²⁴ A bileesi-nzilë bifwa-meeso! Beeno lun'cyeenzë masi mu kubotulë lubu, akasi lum'minë cibulu cinenë! »

²⁵ « Lusifu lwiinu olo, beeno miloonji n'kaakë i Sifalisyaanu, bimpilë-mpiipi abi! Cibilë beeno lun'cyeesyaangë lingaandë li simbuungu i li tubuci, kosuku munë kati mu waalë biimë lwakwiibë i bideenzë biinu bibi.

²⁶ Falisyaanu mpofo! Lyoomisyoobo cin'tetë likati li mbuungu i li lubuci bwiinji lingaandë yivaandi licya. »

²⁷ « Lusifu lwiinu olo, miloonji n'kaakë i Sifalisyaanu, bimpilë-mpiipi! Cibilë beeno lufwaanë buke mëbuumbë bëviindë ndiimbë yi mpeembi. Lingaandë linyeefë, akasi likati liwaalë mivesi baatu bëfwa i yosuku mpilë biimë bibolë.

²⁸ Bwaawu beeno yiviinu, ku ngaandë lum'monikë baatu bësulëmë, kasi ku kati beeno luwaalë bumpilë-mpiipi i busafu. »

²⁹ « Lusifu lwiinu olo beeno miloonji n'kaakë i Sifalisyaanu, beeno bimpilë-mpiipi! Cibilë lun'tuungë mëbuumbë më mibici i lun'cyemunë mëbuumbë më baatu bësulëmë fë meeso më Nzaambi,

³⁰ i beeno lun'tubë : “Ningë twabë tuzingilë mu ntaangu sinkaakë siitu, beeso tulë ba n'timë mweekë ko i baawu mu kuvoondë mibici!”

³¹ Mu bwaawu, benuveekë lun'tubë cimbaanji cibilë beeno sindaandu lukeeli mu banë bëvoondë mibici.

³² Mu lyaawu, lwe bweelyaanu kuvaangë linë sinkaakë siinu bëtoonë!

³³ Sinyokë, liloongu li simpili! Buni lum'podi kutininë cinaanu fë lufundusu lu buluunji bu mbaaswe?

³⁴ Mu lyalyooli: Miinu yakun'filë ke beeno mibici, bangë bungelë i miloonji n'kaakë. Lun'voondë bëmesë i lum'baandë bën'ka i lum'bulooso bën'ka mu bizutununu biinu i beeno lubëkukë ntiinu bwendi mëvulë.

³⁵ Bwiinji mëbwiilë mu beeno meengë mooso më mpeembi yi mpeeso, mëkwitikë bwendi n'nyalu n'toto, kutoonë fë meengë më Abeelë n'zitu, tee meengë më Zakaali, mwaanë Balaki, awu luvoondë fë meeyi civingë ci saantu i civakululu.

³⁶ Licyelikë yilukaambë, makë mooso omo, mëm'bwiilë mboongu baatu yi bubwayi. »

Yeesu i Yelusaleemë

³⁷ « Yelusaleemë, Yelusaleemë! Njeeyi mungë kuvoondë mibici i kupiindë mëmanyi kuke banë Nzaambi wukufilë! Vyaasi kwa miinu yazolaangë kukucikë baanë baaku dedë mweekë susu yin'kucikaangë baanë baandi ku si mëvafë, kasi beeno lusye livitikë ko.

³⁸ Talaanu, n'zwiinu mëlooku yisyaalë yukutii.

³⁹ Licyelikë, yilukaambë : kutatikilë mu ntaangu ayi lusë be n'kumonooso ko tee ntaangu lun'tubilë : “Kwe sakumuni awu wun'kwisilë mu lizinë li Fumu!” »