Matye 22 - N’KANGULU WUMOONË

Sasafë yi cikaanvu ci mëkweelë

¹ Yeesu wusë bëkambilooso mu sisasafë i wusë tubë :

² « Lwaangu lu mëyilu fwiifu si n'tinu wum'belikë n'saangu mëkweelë më mwanaandi.

³ Naandi kufilë biseelu byaandi mu kutelë banë bëtelu ku cikaanvu, i baawu bësye zolë kwiisë ko.

⁴ Naandi kubëfilë biseelu bin'ka i wusë tubë : “Ye kaambaanu banë batelu: Miinu yabelikë cikaanvu cyaami, yavangisi kuvoondë singoombi syaami i bibulu byaami bivoongë. Byakë byooso byabeliminë. Yisaanu mu kwambulë!” »

⁵ Kasi banë bëtelu mbilë bësye lisilë n'ciinzë ko. Baawu ke yendaangë kwaawu: awuuwu ku solaandi, awunaani ku lungoosu lwaandi,

⁶ i bën'ka ke bwiilë biseelu, kubënyokulë i bisë bëvoondë.

⁷ N'tinu wusë ba mu likaanzi. Naandi kufilë mësodaadi maandi mu kuvoondë bibaabi i wusë viikë livulë lyaawu mbaasu.

⁸ Naandi wusë kaambë biseelu byaandi : « Cikaanvu cyabelëmë, kasi banë batelu kwaawu bësye fwanëkënë ko.

⁹ Lyekilë obo, yendyaanu mu mëvaambu më nzilë i kaambaanu bakë booso lun'dyengënë biisë mu kwambulë ku cikaanvu. »

¹⁰ Biseelu beenë bisë kweendë mu sinzilë syooso, bisë kucikë bangë mitimë yi mboti i mitimë yi mbi. Boobo, n'zo n'saangu yisë waalë baatu.

¹¹ N'tinu wusë kotë mu kumonë banë bëtelu ku cikaanvu. Naandi wumonë wun'viipë wukaambu n'vwaatu wu n'saangu.

¹² Naandi wusë n'kaambë : « A mwa, njeeyi buni wakotilë aku kukaambu n'vwaatu n'saangu? » Kasi muutu beenë wusye n'vutulilë mbeembu ko.

¹³ Oboobo, n'tinu wusë kaambë biseelu : « N'kaanjyaanu myooko i maalu i n'lacyaanu ku ngaandë ku citoombi, mati kwaawu kun'lililë i kun'kwetikinyi meeno. »

¹⁴ Licyelikë mpaapë bëtelu, kasi banë bësoolu bëcyeeci.

Mpaku bën'futilë ke n'tinu Sezaalë

¹⁵ Mu bwaawu, Sifalisyaanu bisë kotë fuundu yikubwililë Yeesu mu libuungu lyaandi.

¹⁶ Baawu bisë n'filë bilaanzi byaawu yimunë bo bëke mu cinguuku ci Eloodë, bisë n'kaambë : « A N'loonji, beeso tuzabisi ti njeeyi cyelikë wukeeli i wulë mu ke longilaangë nzilë Nzaambi mu bucyelikë. Boomë ve mu wosuku muutu, cibilë njeeyi wusë n'talaangë bunaangë bu muutu ko.

¹⁷ Mu boobo, we tukaambi buni wum'balilë mu aliili: n'swa wukeeli mu n'kaakiitu wukufutilë mpaku ke n'tinu Sezaalë? Vo moniko? »

¹⁸ Kasi Yeesu, wuzaabë simbalulu syaawu simbi, wusë bëvutulilë : « A bimpilë-mpiipi mbici lwakun'sokilë?

¹⁹ N'desyaanu mpilë lu mboongo lun'futilaangë mpaku. » Baawu bisë n'leesi cinkongulu cimweekë ci mboongo.

²⁰ Naandi kube bëyufulë : « Ciinyi i bisonë bi nani bike mu cinkongulu ocye? »

²¹ Baawu kun'vutulilë : « Bi n'tinu Sezaalë. » Naandi wusë bëkaambë : « Oboobo, vutulaanu ke Sezaalë binë bi Sezaalë i ke Nzaambi, binë bi Nzaambi. »

²² Bunë ban'yuwu, baawu bisë bwa libobo, bisë m'biikë i bisë ke yendaangë.

Cyuufu mu luvulumuku lu baatu

²³ Mo mu cilumbu beenë, Sisadusyaanu bisë m'belëmë. – Baawu bën'tubaangë ti luvulumuku lu bo bëfwa lukeeli ko. – Bisë n'yufulë :

²⁴ « A N'loonji, Moyiizë wutubë : “Ningë libakëlë libe fwa wusye biikë mwaanë ko, nkoombaandi fwanëkënë kukweelë n'fwiili, mu kum'butilë baanë.”

²⁵ Kosuku mu nkoongiitu, mwabë saambwali li baanë bë nguli. N'kuluutu kukweelë i wusë fwa. Kasi abu kukaambu mwaanë, naandi wubiikë n'fwiili ke nkombaandi.

²⁶ Bubeelë bo bumweekë mu mwaanë nguli wumwaali, wun'tatu tee wusaambwali.

²⁷ Fë mbusë bakë booso, n'cyeetu wusë kufwa yivaandi.

²⁸ Fanë cilumbu ci luvulumuku, na n'cyeetu wum'ba n'kasi nanye? Cibilë lisaambwali lyooso lin'citulë n'kasyaawu! »

²⁹ Yeesu wusë bëvutulilë : « Beeno lwavitu, cibilë lusye zaabë ko libuungu li Nzaambi, kaambofo luleendo tu Nzaambi.

³⁰ Licyelikë, fë cilumbu ci luvulumuku, bëbakëlë i bëcyeetu bisë bën'kweelë ko, Kasi bën'zingilë buke siyaanzi ku yilu.

³¹ Mu lyaambu li luvulumuku lu baatu bëfwa, beeno lusye taangë ko lyo Nzaambi kulukaambë? Naandi wutubë :

³² “Miinu yilë Nzaambi yi Abalaamë, Nzaambi yi Isaakë i Nzaambi yi Zakoobë.” Nzaambi wukeeli Nzaambi yi bëfwa ko, kasi yi bo bëke moonyi. »

³³ Bakë booso bën'yuwu, bisë bwa libobo mu nsinunwaandi.

Lutumu luvyokili bunenë

³⁴ Bunë Sifalisyaanu bayuwu ti Yeesu wuvosi Sisadusyaanu bitu, baawu kukukumë fë cimweekë.

³⁵ Wun'viipë mu nkoongaawu, n'loonji n'kaakë, kun'yufulë mu kun'sokë :

³⁶ « A N'loonji, mu tutumu twakë tooso, lutumu mbici luvyokilili bunenë mu n'kaakë? »

³⁷ Yeesu kun'cikuninë : « “Zolë Fumu Nzaambyaaku yi n'timaaku wooso, yi ciluunzi cyaaku cyooso, yi simbalulu syaaku syooso.”

³⁸ Mati lwaawu lutumu lun'tetë i luvyokisi bunenë.

³⁹ Lutumu lumwaali lwaawu alu : “Wufwenikini kuzolë mbaasyaaku buke njeveekë.”

⁴⁰ Mu tutumu tutwaali oto, mwaawu mu zitiminë tutumu tooso tu n'kaakë Moyiizë i mibici. »

Kliistu i Daviidë

⁴¹ Sifalisyaanu syabë sikukumë fë cimweekë, Yeesu wusë bëyufulë :

⁴² « Beeno buni lum'balilë mu Kliistu? Naandi wuli mwaanë nani? » Baawu kun'vutulilë : « Wu Daviidë. »

⁴³ Mu bwaawu, Yeesu wusë bëkaambë : « Kwisilë buni ti, Daviidë, mu cyeesi ci Ciluunzi ci Saantu, kun'telilë “Fumu”? Fanë kutubë :

⁴⁴ “Fumu Nzaambi wukaambë Fumwaami: Yisë kalë ku mëbakëlë maami, tee yi fanë yin'tuulë simbeenyi syaaku bilyatulu byaaku bi maalu.” »

⁴⁵ « Ningë ti Daviidë wukun'teelë “Fumu”, buni Kliistu kum'podyooso kube beelë ndaandwaandi? »

⁴⁶ Wun'viipë ve wulëpodi kun'vutulilë libuungu. Kutoonë cilumbu be ciinë, muutu ve wusë be podi kun'yufulë cyuufu.