Matye 21 - N’KANGULU WUMOONË

Yeesu wakotë ku Yelusaleemë

¹ Bunë babelëmi ku livulë li Yelusaleemë i batuuci ku bwaalë bu Betëfaazë, ku nkoonzu moongo miti Oliivë, foofë, Yeesu wufilë bilaanzi byooli,

² wusë bëkaambë : « Yendaanu ku bwaalë buke fë ntwaaliinu. Bunë luke tuuci, lum'monë buulu yikangëmë, yimunë mwanaandi. Bëkutulyaanu i bëtwaalyaanu ke miinu.

³ Ningë wun'viipë wubëluyufulë, n'kaambyaanu : “Fumu wun'vwa n'ciinzë mu syaawu.” Naandi wun'lengë kusibikë syeendë. »

⁴ Lyalyooli livangënë bwiinji manë mëtubë m'bici mëdedëkënë :

⁵ « Kaambaanu nduumbë n'cyeetu yi Siyoonë : “Tala, n'tinwaaku wakë n'kwisë ke njeeyi, yi bubonzulu, wumakë fë yilu buulu, i mwaanë buulu.” »

⁶ Bilaanzi biyeendë i bisë vangilë bunë Yeesu kubëtuminë.

⁷ Baawu bisë natë buulu i mwaanë buulu, bisë tuulë biyuungë byaawu fë yilwaawu i Yeesu wusë kukalë fë yilwaawu.

⁸ Mpaapë baatu munë nkoongë bëye yalaangë n'vwaatwaawu mu nzilë, bëmesë bëlëcyelaangë bitafi bi miti bëye yalaangë bwendi nzilë.

⁹ Banë bëye lyaataangë fë ntwaalë Yeesu i banë bëye n'laandaangë fë mbusë, bëye tendulaangë : « Ozaana! Mpumu oyo ke Mwaanë Daviidë! Kwe sakumuni awu wun'kwisilë mu lizinë li Fumu Nzaambi! Ozaana! Mpumu kunë salaangë mëyilu! »

¹⁰ Fanë kwakotili ku Yelusaleemë, livulë lyakë lyooso lisë nikukë i bisë ke tubaangë : « Na wuuwu, nani kukeelye? »

¹¹ Nkoongë yilëtubaangë : « Yeesu, m'bici wunë wafuminë ku libweeti li Nazaleetë li Ngalilee. »

Yeesu mu n'zo-Nzaambi

¹² Yeesu wukotë mu n'zo-Nzaambi i naandi wukulë babooso bëlësumbisyaangë i bo bëlësuumbaangë biimë munë n'zo-Nzaambi. Naandi wukundubulë sintalë si bangë kuvingësënë simboongo i sikiiti si banë bëlësumbisi mëbeembi.

¹³ Naandi wusë bëkaambë : « Lisonëmë : “N'zwaami yin'teelu n'zo yi n'saambu.” Kasi beeno, lwayicitulë civingë ci miifi! »

¹⁴ Simpofo i bibolikinyi bisë m'belëmë munë n'zo-Nzaambi i naandi wusë bëbelusi.

¹⁵ Kasi sifumu singangë-Nzaambi i miloonji n'kaakë bënyotëkënë abu bamoni bimaaku kulëvaangë i banë bëlëlosukë munë n'zo-Nzaambi : « Ozaana! Mpumu ke Mwaanë Daviidë! »

¹⁶ Mu bwaawu, baawu bisë n'kaambë : « Njeeyi wulë mu kuwu manë bëlë mu kutubë? » – « Yeesu wusë cikuninë, ee mweeni yilë mu kuwu. Lutangisyaanu vyaasi ko manë mësonëmë : “Njeeyi wavangisi bibabanë i baanë bëndeenji kukudumisi”? »

¹⁷ Bunë kwabë biici, naandi kubasikë ku livulë be lyoolyo, mu kweendë ku bwaalë bë Betani, kwaawu kuvyosilë bwiilu.

Yeesu wasifë n'ti n'ngengë

¹⁸ Fë menë-ngwaali, bunë kwavutukunë ku livulë, Yeesu wusë taatë nzalë.

¹⁹ Kwamoni n'ti n'ngengë mu nzilë, naandi wusë belëmë, kasi mo mëkayi vwiili kumonë. Yeesu wusë kaambë n'ti n'ngengë : « Tee sakë yi sakë, njeeyi wusë bëbutë mëkuundi ko! » Fo fë cimweekë, n'ti n'ngengë wusë kuumë.

²⁰ Bilaanzi bamoni lyalyooli, bisë bwa libobo i bisë tubë : « Buni n'ti n'ngengë wakuminee? »

²¹ Yeesu wusë bëcikuninë : « Cyelikë beeno yin'kaambë ningë luke ciminu i mpakë kufiindë ve, yaaku vwiili lilëvangënë mu n'ti n'ngengë, vandi, fanë lun'kambilë moongo owo : “Botukë ofo, weendë we yilaci mu m'bu”, lyaawu kuvangënë.

²² Mooti luke ciminu, beeno lun'tambulë cyosuku lu kun'loombë mu n'saambu. »

Kuni kufuminë lutumu lu Yeesu

²³ Yeesu wuyikotë mu n'zo-Nzaambi i fanë kulëlongilë. Bëkuluutu bë singangë-Nzaambi i mëkakëtë më Sizwiifë kum'belëmë i bisë n'yufulë : « Mu lutumu lu nani njeeyi wuke vangilaangë mamoomë i wukuveeni n'swa nani? »

²⁴ Yeesu kubëvutulilë : « Miinu yivaamë, limweekë yakuluyufulë. Lumwe kun'cikuninë, miinu yilukaambë mu lutumu lu nani yike vangilaangë mamoomë.

²⁵ Nani wufilë Za mu kubatizyaalë? Nzaambi vo baatu? » Kasi baawu bisë kufusënë baveekë i baveekë : « Ningë tubëcikunë ti : “Nzaambi na wun'filë”, naandi wutuvutulilë, “Mu mbici lukaambulu kuteelë maanë mu Za?”

²⁶ Ningë tube tubë ti : “Baatu bën'filë”, kebë bëlëtubalukilë, kasi bakë booso bëlëbalaangë ti Za wabë m'bici. »

²⁷ Mu bwaawu, baawu bisë vutulilë Yeesu : « Tusye zaabë ko. » Naandi kubëcikunine : « Miinu, yivaamë yisë lukaambë ko mu lutumu lu nani yike vangililaangë mamoomë. »

Sasafë yi baanë bë bwaali

²⁸ « Buni lum'mweenë mu sasafë ayi? Muutu wun'viipë wabë yi baanë bwaali. Naandi wukaambë wun'tetë : “A mwanaami, yeendë we kusalë Cibubwayi mu solaami yi viinyi.”

²⁹ Naandi kun'vutulilë : “Miinu yibe maangë.” Akasi kwanyotëkini, naandi wusë kweendë mu kusalë mu solë viinyi.

³⁰ Kwakaambi wum'mesë bo bumweekë, mwaanë kun'cikuninë naati : “Mweenë-ngete, a ta, yibe vitikë”, kasi wusye kweendë ko.

³¹ Nani mu babë bwaali wuvaangë n'vwiilu lisya? » Baawu kun'vutulilë : « Wo wun'tetë. » Yeesu wusë bëkaambë : « Licyelikë yilukaambë, binoongë mpaku i bëcyeetu bënduumbë, mba bën'twaamë ntetë yi beeno kunë Lwaangu lu Nzaambi.

³² Cibilë, Za wuyisë wululeesi nzilë yi n'sulumunu, kasi beeno lusye n'teelë maanë ko. Kasi binoongë mpaku i bëcyeetu bënduumbë bën'teelë maanë. Kosuku beeno lumonë mamoomë, lusye ta maanë ko mu naandi. »

Sasafë yi bisasi bi bubaalu bi solë viinyi

³³ « Yuwaano sasafë yimesë : Fabë muutu, fumu solë, wuvatë solë miti viinyi. Naandi wuzukë m'pakë, wusikë libulu li kukaminë mëkuundi më viinyi. Na kube tulikë cibaangë ci biluungë n'zo. Fë mbusë na kubiikë solë be yooyi mu myooko bivasi, naandi wusë ke yendaangë mu mweendo.

³⁴ Bunë ntaangu yikuvelilë yafwaani, naandi kufilë biseelu byaandi kuke bivasi mu ke laandë mbutë solaandi.

³⁵ Bivasi bëzudikinyi biseelu byaandi, baawu kutuutë awu nkubë, kuvoondë awuuwu i kulakë awunaani mëmanyi.

³⁶ Naandi wusë be filooso biseelu bin'ka, nkoongë yivyokilili kufunë yi yo yin'tetë. Bivasi bëvangilë mpilë mweekë buke bën'tetë.

³⁷ Fë siitu, naandi wusë filë mwanaandi i wusë tubë : “Baawu bëm'bakë mwanaami sisu.”

³⁸ Kasi, bivasi bunë bamoni mwaanë, bisë tubësënë : “Wunë mba wum'byalilë lifwa naandyaawu. Tun'vondyaanu, tuboongaanu libyalilë lyaandi!”

³⁹ Baawu bisë m'bwiilë, kum'baasi ku ngaandë solë miti viinyi i bisë n'voondë. »

⁴⁰ « Fanë fën'kwisilë fumu solë, buni kun'silë mu bivasi obyo? »

⁴¹ Baawu kun'vutilë: « Naandi wun'vangisi kuvoondë bisasi bi bubaalu obyo i mba wun'sombisi solë ke bivasi bin'ka, bëkun'vaanë mëkuundi mu ntaangu yikuvelilë. »

⁴² Yeesu wusë bëkaambë : « Beeno lutangisi vyaasi ko Libuuku li Nzaambi bunë bësonikinë : “Limanyi lyo bituunji bëbaayi, lyaawu lyacitukë limanyi linkumë, lyalyooli lifuminë ke Fumu, i lyaawu fë meeso miitu liboti i beeso tusë siminë, kubookë!” »

⁴³ « Mati bwaawu yilukambilë : bëlubotulë Lwaangu lu Nzaambi i buluvaanë ke liloongu li kun'vaanë mëkuundi.

⁴⁴ Wunë wum'bwiilë fë limanyi be lyooli, mba wun'kwanzikë i wunë wulibwiilë, wun'kesëkënë. »

⁴⁵ Bunë be yuwu sasafë be yooyo, bëkuluutu bë singangë-Nzaambi i Sifalisyaanu bisë bakulë ti mu baawu kulëtubilë.

⁴⁶ Baawu bëtoombë buni bukum'bwililë, kasi bësye podi ko, mu boomë bu nkoongë yi baatu, yilëmonaangë Yeesu m'bici.