Matye 20 - N’KANGULU WUMOONË

Bisasi mu solë viinyi

¹ « Licyelikë, Lwaangu lu mëyilu fwiifu si fumu solë wubasikë yimenë-ngwaali, mu kuboongë bisasi bi solaandi yi viinyi.

² Wusë kuwusënë yimunë bisasi mu kutambulë mbakë cinkongulu cimweekë ci mboongo mu cilumbu i naandi kubëfilë mu solaandi yi viinyi.

³ Bunë kwe basikë fë mëselukulu më ntaangu, naandi kubëmonë bën'ka babë faawu i cin'velë kusalë ve.

⁴ Ke ba boobo, naandi wusë bëkaambë : “Yendaanu yiviinu mu solë i miinu mba yiluvaanë mbakë yifwenikini.”

⁵ Baawu, bisë ke yendaangë i bunë kwe basikooso fë zoolë yin'samunu yivwa. Naandi wusë vangilë bo bumweekë.

⁶ Kwaasu fë kuumi zoolë mweekë, naandi kube basikë kube takënë bën'ka babë foofë. Wusë bëyufulë : “Mbici, lukelili afë i cyosuku kusalë ve?”

⁷ Baawu kun'vutulilë : “Cibilë muutu ve watuvaanë cisalu.” Naandi wusë bëkaambë : “Yendaanu yiviinu mu solë viinyi.” »

⁸ « Bunë mësikë matuuci, fumu solë wusë kaambë cilaanzi cyaandi : “telë bisasi i futë kadë muutu mbakaandi, kutoninë ke bësiitu i kusitikilë ke bo bën'tetë.”

⁹ Banë bëyisë fë kuumi zoolë mweekë bisë tambulë kadë muutu cinkongulu cimweekë.

¹⁰ Bunë bën'tetë bëyituukë bëbalë ti bën'tambulë mbakë yivyokilili, i baawu yivaawu bisë tambulë kadë muutu cinkongulu ci cimweekë.

¹¹ Bunë batambuli, baawu kunyonginë fumu solë.

¹² Bisë tubë : “bisasi abi byakwisilë fë siitu, baawu basalë fë zoolë mweekë tokë i njeeyi wabëfutë buke beeso. Mu kumonë, beeso twavidë moonyi muusë wooso i twasalë fë libabëlë li muunyi.”

¹³ Naandi wusë vutulilë wun'viipë mu nkoongaawu : “A mwa, miinu yisë kupuutu ko. A buni njeeyi tusye kuwusunu kwe mu kutambulë cinkongulu ci mweekee?

¹⁴ Boongë mbakaaku i we yendi. Miinu yin'vwa n'ciinzë mu kuvaanë ke wu siitu mpilë mweekë yi njeeyi.

¹⁵ Abu miinu yikeeli yi n'swa kwe mu kuvangilë bunë yizolili mu simboongo syaami? Kaambofo, n'soci wake m'monë abu miinu yike muutu wum'botyee?”

¹⁶ Yeesu wusë bëtubë, bësiitu, bëm'ba fë ntwaalë i bën'twaalë bëm'ba fë siitu. »

Yeesu wan'kuzabikini fë vyaasi yin'tatu lufwa i luvulumuku lwaandi

¹⁷ Bunë Yeesu kulëkwendë ku Yelusaleemë, naandi wunatë ku mpeengë likuumi bë bwaali li bilaanzi i mo mu nzilë si kweendë, wusë bëkaambë :

¹⁸ « Yuwaano, twakum'makaanu ku Yelusaleemë, kunë Mwaanë muutu wun'vakulu kuke bëkuluutu bë singangë-Nzaambi i ke miloonji n'kaakë. Baawu bëkun'tabë lufwa.

¹⁹ Bëkun'lekulë mu myooko sipayi, mu kun'dyeengë, kum'bulë sikoti si nzibulë-mbumë, bëkum'baandë fë kuluusu i fë cilumbu cin'tatu, naandi wun'vulumukë. »

Lulombulu lu mamë Zaakë i Za

²⁰ Mu lyaawu, nkasi Zebedee kubelëmë Yeesu yimunë baanë baandi. Naandi kufukumë mu kun'loombë lin'viipë.

²¹ Yeesu kun'kaambë : « Mbici wun'toombee? » Naandi wusë kun'vutulilë : « Tubë ti baanë baami bë bwaali aba, bëkalilë awu ku mëbakëlë maaku, wum'mesë ku mëcyeetu maaku fanë wun'kotilë ku lwaangu lwaaku. »

²² Yeesu wusë n'vutulilë : « Beeno lusye zaabë ko lyo lulë mu kuloombë. Beeno lum'podi kunwa mbuungu yo miinu yifwenikini kunwe? » Baawu bisë n'vutulilë : « Mweenë-ngete, beeso tum'podi. »

²³ « Licyelikë, beeno lun'nwa mbuungwaami, bunë Yeesu kubëkambilë. Kasi likukalilë ku mëbakëlë maami, kaambofo ku mëcyeetu maami, olyo lyaami miinu ko. Bikalulu obyo bibelikulu mu banë Tataami kusoolë. »

²⁴ Bunë likuumi li bilaanzi bayuwu lyalyooli, baawu kunyotëkënë mu baanë bë nguli bë bwaali.

²⁵ Yeesu kutelë bakë booso i wusë tubë : « Luzabisi ti sifumu si mëloongo, bën'tuminë baatu baawu yi bubaalu booso yivaandi mëkundaalë yi bumbakë-bakë.

²⁶ Ke beeno, busye fwanëkënë kubeelë boobo ko. Kasi wunë wun'toombë kuba n'kuluutu mu nkoongiinu, kwe ba ciseelu ci bakë booso.

²⁷ Wosuku wun'toombë kuba fë ntwaalë mu nkoongiinu, kwe ba n'doongwiinu.

²⁸ Bo bumweekë, Mwaanë muutu wuyisilë mu buloongo yaaku ti baatu bën'salilë, kasi mu kusalilë baatu i mu kuvakulë luziingu lwaandi mu kobulë lilaangu linenë li baatu. »

Yeesu wabelusi mpofo wali

²⁹ Bunë babasikë ku livulë li Yeliko, nkoongë yinenë yilaandë Yeesu.

³⁰ Mpofo wali syabë sikalë mu ndaambu nzilë, bayuwu ti Yeesu wulëvyookë, bisë siimbë likulosukë : « Tufwiili cyaali, a Fumu, nje Mwaanë Daviidë! »

³¹ Kasi, nkoongë baatu yisiimbë li kubëfuungë, bëleembu biyoko. Tiilyoko, bisë lutilë kube losukë : « Tufwiili cyaali, a Fumu, nje mwaanë Daviidë. »

³² Yeesu wusë sikëmë, kubëtelë i wusë tubë : « Mbici lun'toombë yivaangë mu beenwe? »

³³ Baawu bisë n'kaambë : « A Fumu, meeso miitu mëzibukë. »

³⁴ Cyuundë cyan'kotili, Yeesu wusiimbë meeso maawu i kuzimbukulabu, baawu bisë bëmonë, i bisë ke n'laandaangë.