Matye 19 - N’KANGULU WUMOONË

Liloonji li Yeesu mu n'fwiilulu likweelë

¹ Bunë Yeesu kwamani kuvaanë mëloonji mamoomë, naandi kubotukë fë n'toto Ngalilee i wusë kweendë ku libweeti li Zudee, ku lweeku lum'mesë lu mwiilë Yulëdaanu.

² Sinkoongë sinenë siye n'laandaangë i naandi wusë belusi bibeedo.

³ Mwa Sifalisyaanu kum'belëmë mu kun'seengë n'timë. Baawu kun'yufulë : « Buni, n'kaakiitu wun'vaanë libakëlë n'swa wukubotulilë n'kasyaandi mu yosuku ntoondwe? »

⁴ Yeesu kuvutulë : « Abu beeno lusye taangë kwe linë lisonëmë? “Fë ntonunu yi buloongo, N'vaanji wuvaangë, libakëlë i n'cyeetu.”

⁵ Naandi kutubë : Mu lyaawu, libakëlë wum'biikë tataandi i mamaandi i wum'bundënë yimunë n'kasyaandi. Babë bwaali bëm'ba muutu mweekë.

⁶ Bwa boobo, bësyeeli ko baatu bwaali, vandi muutu mweekë. Keelë muutu kukabulë aba Nzaambi kwabuundë. »

⁷ Sifalisyaanu kun'yufulë : « Cibilë-mbici Moyiizë wuvandikë n'swa ke libakëlë mu kutambikë n'kaandë ke n'kasyaandi mu kuvondilë likweelë i kum'botule? »

⁸ Yeesu wuvutulë : « Moyiizë wuluvesuninë n'swa wukuvondilë likweelë mu cibilë mitimiinu yikafëkënë, kasi fë ntonunu, busye beeli boobo ko. »

⁹ Miinu yilukaambë : « Wunë wum'botulë n'kasyaandi be kaambu kuvaalë i wun'kweelë wun'ka, naandi wavaalë. »

¹⁰ « Ningë boobo bwa bukelili mu libakëlë yimunë n'kasi, mëyoolë kuleembu kukweelë! »

¹¹ Yeesu wusë bëvutulilë : « Bëbakëlë booso bëkeeli yi mëkanë më kubakulilë liloonji olyo, kasi tokë ke banë Nzaambi kun'vaanë mëkanë.

¹² Licyelikë baatu bëmesë bëkeeli ko n'viingu bubakëlë kutoonë fanë lubutu lwaawu, bën'ka bëbëbotulë likanë ke baatu, bëmesë mu cibilë ci Lwaangu lu mëyilu. Wunë wum'podi kuvitikë mëloonji omo, kwe mëvitikë! »

Yeesu wasakumë bibabanë

¹³ Oboobo, baatu bisë natë bibabanë kuke Yeesu bwiinji kubëtetikë myooko i kubësambilë, kasi bilaanzi bisë bëfuungë.

¹⁴ Yeesu wusë tubë : « Bikaanu bibabanë biisë ke miinu! Lubëfuunjyaanu ko, cibilë Lwaangu lu mëyilu luke dedë mweekë baawu. »

¹⁵ Bunë kwabëtetikë myooko, naandi wusë botukë foofë.

Cilesi bakëlë ci cisinë

¹⁶ Libakëlë limweekë lisë m'belëmë i kun'yufulë : « A N'loonji, liboti mbici yifwenikini kuvaangë mu kubakë luziingu lu sakë yi sakë? »

¹⁷ Yeesu wusë n'kaambë : « Cibilë-mbici wulë mu kun'yufulilë mu linë lin'talë liboti? Wumweekë to wumboti. Ningë njeeyi wun'toombë kukotë mu luziingu lu sakë yi sakë, cinzikë tutumu. »

¹⁸ « Tutumu mbici? » Naandi wusë vutulë : « Kuvoondë ve. Kuvaalë ve. Kwiibë ve. Bumbaanji bu lupuutu kuvaangë ve.

¹⁹ Cinzikë tataaku i mamaaku, zolë mbasyaaku bo wuyizolili njeveekë. »

²⁰ Cilesi bakëlë kun'kaambë : « Makë mooso omo yimësalilaangë, mbici yim'podi kuvangooso? »

²¹ Yeesu kun'vutulilë : « Ningë wun'vwa n'ciinzë kuba wulyoomë, yeendë, ye sumbisi byosuku wubakisi i we vaani simboongo ke biyeembi, oboobo, njeeyi wum'bakë businë bu mëyilu. Kumanoofo, yiisë, n'daandi fë mbusë. »

²² Kwayuwu bikumë obyo, cilesi bakëlë ke yendaangë. Cyuundë kun'kotilë, cibilë wabë yi mpaapë businë.

²³ Yeesu kukaambë bilaanzi byaandi : « Licyelikë yilukaambë : butudë beenë ke cisinë mu kukotë ku Lwaangu lu mëyilu.

²⁴ Yilukaambooso : mwiinji kuleengë ke cibulu bën'teelë samo mu kuvyokilë fë livulu li ntuumbu, yi cisinë mu kukotë ku Lwaangu lu Nzaambi. »

²⁵ Bilaanzi bunë bayuwu bikumë obyo, bisë bwa libobo i bisë tubë : « Mu lyaawu nani wum'podi kuvuukee? »

²⁶ Yeesu kubëtalë i wusë bëkaambë : « Lyaawu olyo mëvangulu mpa ke baatu, kasi ke Nzaambi, litudë likeeli ko. »

²⁷ Oboobo Pyeelë wusë n'kaambë : « Tala, beeso twavubikë byakë byooso binë tubakë i twakulaandë fë mbusë. Buni lim'beelë mu beeswe? »

²⁸ Yeesu kubëvutulilë : « Licyelikë yilukaambë, mu buloongo bumoonë, bunë Mwaanë muutu wun'kalilë fë ntaanzyaandi yi bumpumu, beeno yiviinu lum'byaalë fë kuumi ntaanji wali mu kufundisi likuumi li mëkomo më mwaali më Islayeelë.

²⁹ Wosuku wun'vubikë binë kubakë, mu cibilë ci lizinë lyaami : keti n'zwaandi, baanë baandi bë nguli bëbakëlë i bëcyeetu, tataandi, mamaandi, baanë baandi, kaambofo sisolë syaandi, wun'tambulë fë nkamë li vyaasi i wum'byalilë moonyi wu sakë yi sakë.

³⁰ Mpaapë mu banë bëke fë ntwaalë, bëm'ba mbusë i mpaapë mu banë bëke fë mbusë bëm'ba fë ntwaalë. »