Matye 17 - N’KANGULU WUMOONË

Yeesu wake n'leesi bumpumu bwaandi

¹ Bilumbu bi samunu byavyooci, Yeesu kuboongë Pyeelë, Zaakë i Za, nkoombë Zaakë. Naandi wusë bënatë ku mpeengë, ku yilu nguungë moongo.

² Naandi wusë citukë fë meeso maawu. Ciinyi cyaandi kungalëmë buke muunyi, n'vwaatwaandi kumanikë mpeembi buke cyeseesë.

³ Kususukulabu bilaanzi bi tatu bisë monë Moyiizë i Eli bëlëtubunaangë yimunë Yeesu.

⁴ Pyeelë wusë kukaambë Yeesu : « A Fumu, liboti besiinu mu kukalilë afaafë. Ningë wulizolisi, yake n'tulikë afa binzwananë bi tatu, cimweekë cyaaku, cimweekë ci Moyiizë i cimweekë ci Eli. »

⁵ Naandi wucini n'tubë, livweeti lim'manikë lisë bëfukë, i mu livweeti mbeembu yisë kuwukunë : « Naandyaawu, Mwanaami wu mëdilë. Mu naandi, mwa yatuulë luzolo lwaami looso. N'yuwulwaanu! »

⁶ Bunë bilaanzi bëyuwu mbeembu be yooyo, bisë kudikë mbuunzu fë n'toto i boomë bunenë kubëkotilë.

⁷ Yeesu kwabëbelëmi, naandi wusë bësiimbë i kutubë : « Manaanu n'telë, lubaanu yi boomë ko! »

⁸ Bavumbuli ntalu, baawu bësye be monë wun'ka ko kanuku wo naveekë Yeesu vwiili.

⁹ Fanë bëlënengëmukë moongo, Yeesu wusë bëvaanë lutumu alu : « Lukaambyaanu ke wun'viipë ko cyeendë-meeso aci tee yi fanë Mwaanë muutu kun'vulumukë mu nkoongë bëfwa. »

¹⁰ Bilaanzi bisë kufulë Yeesu : « Cibilë-mbici miloonji n'kaakë bën'tubilaangë ti, Eli wufwenikini kutekë kwiisë? »

¹¹ Naandi wusë bëvutililë : « Licyelikë, Eli wufwenikini kwiisë mu kululikë makë mooso.

¹² Miinu yilukaambë : Eli wumwekwiisë, baatu bësye n'zaabaangë ko kasi bëvaangë mu naandi manë bëzolë. Mati bo bumweekë, Mwaanë muutu wum'monë mëcyeenji-mëndoongë ke baawu. »

¹³ Mu bwaawu, bilaanzi bisë bakulë ti naandi wulëtubilë mu Za-Batiisë.

Yeesu wabelusi mwaanë ke yi ncyeenzu nzyeetë

¹⁴ Bunë batuuci fanë fabë nkoongë, libakëlë lisë belëmë fëke Yeesu, wusë fukumë fë ntwaalaandi i wusë tubë :

¹⁵ « A Fumu, fwiilë mwanaami cyaali. Naandi ncyeenzu nzyeetë yike yaandi. Mpaapë vyaasi, mooti yam'batikini naandi kubwangaangë ku mbaasu, kaambofo, kuyifwangaangë mu masi.

¹⁶ Miinu yin'natë ke bilaanzi byaaku, kasi baawu bësye podi ko kum'belusi. »

¹⁷ Yeesu wusë losukë : « A mboongu yikaambu lufyaatu i yi waalë mëvadë-mëbi! Tee ntaangu mbici miinu yifwenikini kukalilë yiinwee? Miinu yifwenikini kuciimbë moonyi tee ntaangu mbicye? Natinaanu mwaanë! »

¹⁸ Yeesu kubaminë ciluunzi cibi, i cyaawu cisë basikë i mu zoolë beenë mwaanë kubelukë.

¹⁹ Foofë, bilaanzi kubelëmë fëke Yeesu ku nteku i bisë n'yufulë : « Cibilë-mbici beeso twakaambu kubasilë ciluunzi cibye? »

²⁰ Yeesu kubëvutulilë : « Cibilë ciminu ciinu cicyeeci. Licyelikë yilukaambë ningë ciminu ciinu cike buke lungeenzë lu mutalëdë, beeno nkanë lulëkaambë moongo owo : “Botukë afa, weendë kuna.” Waawu nkanë wulëbotukë. Cin'velë ko cilëvaangë nkakinyi ke beeno.

²¹ Kasi ciluunzi ci mpilë oyo cim'basikilaangë, kanuku mu n'saambu vwiili i mu n'sweelë. »

Yeesu wazabikini lufwa i luvulumuku lwaandi

²² Cilumbu cin'viipë, bilaanzi abu babë fë cimweekë ku Ngalilee, Yeesu wusë bëkaambë : « Mwaanë muutu wabelëmë kuvakulu mu myooko baatu,

²³ baawu mba bëkun'voondë, kasi fë cilumbu cin'tatu, naandi wun'vulumukë. » Mu bwaawu bilaanzi bisë ba mu cyuundë cinenë.

Lufutulu lu mpaku yi n'zo-Nzaambi

²⁴ Bunë Yeesu i bilaanzi byaandi batuuci ku Kapelënawuumë, binoongë mpaku yi n'zo-Nzaambi bisë belëmë Pyeelë i bisë n'yufulë : « Fumwiinu, mpaku yi n'zo-Nzaambi naandi wuyifutee, voo moniko? » –

²⁵ « Mweenë-ngete, buvutulë Pyeelë, naandi wuyifutë. » Fanë Pyeelë kulëkotilë ku n'zo, Yeesu kubulë ntetë mbeembu i wusë tubë : « Njeeyi bunë wum'balilë, a Simu? Nani wufwenikini kufutë mpaku kaambofo tumaandu ke sifumu si bë buloongo be buubu? Bëbakisi n'toto voo beeni? »

²⁶ « Beeni », bëvutulilë Pyeelë. « Mu cibilë ocyo, bën'vutulilë Yeesu, bëbakisi n'toto bësye fwanëkënë ko kufutë.

²⁷ Vandi, beeso tusye zolë ko kubëfwiisi sonyi. Cibilë ocyo, boongë nzolu, ye lakë yaawu mu liyaangë li masi, yivoli, mbisi n'tetë wum'bakë, zibulë munwaandi i njeeyi wum'monë mwaawu cinkongulu ci mboongo cibe fwaanë mu kufutë mpakwaami i yaaku. Boongë cyaawu i wufutë mpakwiitu. »