Matye 16 - N’KANGULU WUMOONË

Sifalisyaanu i Sisadusyaanu bën'loombë ciliimbu ci cimaaku

¹ Sifalisyaanu i Sisadusyaanu kwiisë fëke Yeesu, mu kun'seengë. Baawu bisë n'loombë ciliimbu ci cimaaku cin'leesi ti naandi wufuminë ke Nzaambi.

² Kasi naandi wusë bëvutulilë : « Yi mësikë, beeno lun'tubaangë : “Liyilu like liboti cibilë lyaawu lya cya.”

³ Yimenë-ngwaali, beeno lun'tubaangë : “N'vulë yabelëmë mu kunokë, cibilë li yilu lya piindë.” Beeno luzabisi kubangulë biliimbu bi yilu, kasi beeno lusë m'podi ko kubangulë biliimbu bi ntaangu be yiiyi!

⁴ Baatu bë bubwayi bivaangë mëbi i bëkaambu kusulëmë ke Nzaambi, baawu bën'loombë ciliimbu, kasi fësë bëveewu ciliimbu cin'ka ko kanuku cyo ci Zonaasë m'bici. » Naandi wusë bëbiikë i wusë ke yendaangë.

M'bweeli wu Sifalisyaanu i wu Sisadusyaanu

⁵ Bunë bilaanzi bëlësabukë ku lweeku lum'mesë lu liyaangë, bëzimbëkënë kunatë mëmpa.

⁶ Yeesu kubëkaambë : « Kebaanu bunë bwaawu mu m'bweeli wu Sifalisyaanu i wu Sisadusyaanu. »

⁷ Bilaanzi bëbalë ti : « Naandi wutubilë boobo cibilë tusyenatë mëmpa ko. »

⁸ Yeesu abu kwe lizaabi, naandi kubëkaambë : « Mbici luke tubësënaangë benuveekë i benuveekë, cibilë lukaambu mëmpa? Bangë lufyaatu lukufi!

⁹ Beeno lubakuli kwe? Tebukaanu moonyi mu mëmpa më taanu lukabulë ke biveefi bi taanu bi bëbakëlë, yi lutaangu lu mikutë lu mëmpa lunë lunatë?

¹⁰ Keti lisaambwali li mëmpa mu biveefi bi na bi baatu yi lutaangu lu mikutë lunë lunatë?

¹¹ Buni lun'kaambu kubakulilë ti, mu cibilë ci mëmpa ko, yilukambilë : keelaanu mu m'bweeli Sifalisyaanu i Sisadusyaanu? »

¹² Mu bwaawu, baawu bisë bakulë ti naandi wusye bëkambilë kuve mu m'bweeli mëmpa, vandi kasi mu nsinunu yi Sifalisyaanu i Sisadusyaanu.

Pyeelë watendulë ti Yeesu wuli Kliistu

¹³ Yeesu bunë kwayisi ku mëvulë më Sezalee më Filiipë. Naandi wusë kufulë bilaanzi byaandi : « Baatu mbici bëlë mu ke tubaangë mu Mwaanë muutu? »

¹⁴ Baawu kun'vutulilë : « Bën'viipë njeeyi Za-Batiisë, bëmesë njeeyi Eli m'bici, bën'ka njeeyi Yelemi m'bici, kaambofo m'bici wun'ka. »

¹⁵ « Naandi kubëyufulë mu beeno, miinu nani yikeeli? »

¹⁶ Simu li Pyeelë kun'vutulilë : « Njeeyi, Kliistu, Mwaanë Nzaambi yi moonyi. »

¹⁷ I Yeesu wusë n'vutulilë : « Nyeenzyaaku oyo a Simu mwaanë Za, cibilë yaaku ti muutu lumoonyi ko wakuselulilë cyelikë ocyo, va Tataami wuke ku mëyilu.

¹⁸ Miinu yivaamë yikukaambë, “njeeyi wuli Pyeelë i fë yilu limanyi be lyooli, yin'tungilë Cingangë cyaami. Lufwa lwaveekë lusë m'podi cin'velë ko mu lyaawu.

¹⁹ Miinu mba yikuvaanë sisabi si Lwaangu lu mëyilu. Linë wun'kaangë fë n'toto, lin'kaangëmë ku mëyilu i linë wun'kutulë fë n'toto, lin'kutulu ku mëyilu.” »

²⁰ Mu bwaawu, naandi wusë vaanë n'swa ke bilaanzi byaandi nukaambyaanu muutu ko ti yilë Kliistu.

Yeesu wazabikini lufwa i luvulumuku lwaandi

²¹ Fa fanë fë naani, Yeesu wusë toonë kukaambë bilaanzi byaandi : « Miinu yifwenikini kweendë ku Yelusaleemë, mu kwe moni mëncyeenji mëndoongë mu myooko mëkakëtë, bëkuluutu bë singangë-Nzaambi i miloonji n'kaakë. Bëkum'poondë i fë cilumbu cin'tatu, miinu yin'vulumukë. »

²² Pyeelë wusë natë Yeesu ku mpeengë i wusë n'seembë : « Nzaambi wukukeelë, a Fumu! Moniko, lyalyooli lisë kuyisilë ko! »

²³ Kasi Yeesu wusë balukë i wusë kaambë Pyeelë : « Yakënë cinaanu yi miinu, a Satënë, njeeyi nkankini mu miinu cibilë wusë m'balë ko bo buke Nzaambi, kasi bo buke baatu lumoonyi! »

²⁴ Foofë, Yeesu wusë kaambë bilaanzi byaandi : « Ningë wun'viipë wun'zolë kwiisë yaami, kwe yizimbikini, kwe nanguni lukuluusu lwaandi i kun'daandë.

²⁵ Licyelikë, wunë wutoombë kuvuuci luziingu lwaandi wulunyambikini. Kasi wunë wun'nyambikini luziingu lwaandi mu cibilë cyaami miinu wulubakë.

²⁶ Lukulë mbici ke muutu mu kubakë businë bu buloongo n'viipë, mooti wufwenikini kunyambikini luziingu lwaandi? Mbici kum'podi kuvaanë mu kuviinji luziingu lwaandi?

²⁷ Licyelikë, Mwaanë muutu wulë mu kwiisë mu bumpumu bu Tataandi i siyaanzi syaandi, i mu bwaawu, naandi mba wun'seendë kadë muutu bunë bun'kwendilë n'salulwaandi.

²⁸ Licyelikë yilë mu kuluzabisi, bën'ka bëkeeli afa bë kusë yifwiilë ko, kukaambu ntetë kumonë Mwaanë muutu kwiisë yimunë Lwaangu lwaandi. »