Matye 15 - N’KANGULU WUMOONË

Liloonji lin'vaanë sinkaakë

¹ Mu bwaawu, Sifalisyaanu i miloonji n'kaakë bëfuminë lu Yelusaleemë bëbelëmë Yeesu i kun'yufulë :

² « Mu cibilë-mbici bilaanzi byaaku bëke safulilaangë n'kaakë wuveewu ke sinkaakë siitwe? Cibilë, baawu bisë n'sukulaangë myookwaawu fanë bën'lilaangë limpa. »

³ Naandi wusë bëvutulilë : « Mu cibilë-mbici beeno luke safulilaangë lutumu lu Nzaambi mu bukulu bwiinu? »

⁴ Nzaambi wutubë : « Cinzikë tataaku i mamaaku i wunë wun'sifë tataandi kaambofo mamaandi wufwenikini kuvoondu. »

⁵ Kasi beeno, lun'tubaangë, ningë muutu wun'kaambë tataandi kaambofo mamaandi : « Cinë yifwenikini kukuvaanë mu kukuvatulë, cyaawu likabu libelikulu mu Nzaambi »,

⁶ naandi wusë n'cinzikë ko tataandi. Mati bwaawu, beeno lwaviinji libuungu li Nzaambi mu kulaandë bukulu bwiinu.

⁷ Ezayi m'bici wubikë mu beeno : bimpilë-mpiipi!

⁸ « Mboongu baatu ayi yilë mu kun'cinzikë mu bilili, kasi n'timaandi wuyakënë yi miinu.

⁹ Mu buunë kwaandi baawu bëlë mu kun'kundilë mu misaambwaawu, cibilë sinunu syaawu si baatu kwaandi vwiili. »

Biimë bin'vangisi muutu kukaambu kulyoomë

¹⁰ Bo kwateli nkoongë, naandi wusë tubë : « Yuwaano i zikulaanu.

¹¹ Yaaku ti biimë byo bikotë mu munu muutu, byaawu bikun'vangisi kukaambu kulyoomë, vandi mëbuungu mo mëm'basikë mu munwaandi, maawu mëkun'vangisi kukaambu kulyoomë. »

¹² Oboobo, bilaanzi bam'belëmi, bisë n'kaambë : « Njeeyi zabisi ti libuungu lyaaku lyalwaasi Sifalisyaanu? »

¹³ Naandi wubëvutulilë : « Cyosuku cikunu cikaambu kukunu ke Tataami, wuke ku mëyilu, mba bëcitumunë.

¹⁴ Bëbiicyaanu : baawu simpofo, bën'natë simpofo. Ningë mpofo wun'natë mpofo yaandi, babë bwaali bëm'bwa mu libulu. »

¹⁵ Pyeelë wusë n'kaambë : « Tuzimuninë suundu yi sasafë ayi. »

¹⁶ Naandi wusë bëkaambë : « Mu lyaliili benuviinu lusë yi lyeelë kwe?

¹⁷ Lusye zaabë kwe ti cyosuku cin'kotaangë mu munu muutu cin'vyokilaangë mu civumu i mu cikasiinyi cim'bumu ku ngaandë?

¹⁸ Kasi, manë mëm'basikaangë mu munu, mën'fuminaangë mu n'timë i maawu mën'vangisyaangë muutu kukaambu kulyoomë.

¹⁹ Cibilë mu n'timë mwaawu mën'fuminaangë simbalulu simbi : kuvoondë, kuvaalë, kuvaangë busafu kwiibë, kutubë cimbaanji cibi i kusuungë bëmesë.

²⁰ Mamoomo ma mën'vangisi muutu kukaambu kulyoomë! Yaaku ti kulya i kusukulë myooko, bya bin'vangisi muutu kukaambu kulyoomë. »

N'cyeetu mweeni wata lyaanë mu Yeesu

²¹ Yeesu wusë botukë mbiinji beenë i wusë kweendë ku libweeti li Tiilë i Sidoonë.

²² N'cyeetu musë Kanaanë wulëkalaangë kunë libweeti beenë, kwiisë ke naandi i wusë losukë : « A Fumu, a mwaanë Daviidë, n'fwiilë cyaali! Nduumbaami yi n'cyeetu yavwaatu ke ciluunzi cibi. Mu mpasi kweekë! »

²³ Kasi, naandi wusye n'vutulilë mbeembu ko. Bilaanzi byaandi kum'belëmë mu kun'loombë ali : « N'vutuli, cibilë naandi wusë m'biikë ko kulosukë mu ke tulandaangë. »

²⁴ Yeesu wusë bëvutulilë : « Miinu yifilulu kanuku vwiili kuke mëmemë mëzimbilë më mboongu Islayeelë. »

²⁵ Kasi, n'cyeetu wusë kufukumë fë ntwaalë Yeesu i wutubë : « A Fumu, nzudi! »

²⁶ Yeesu wusë vutulë : « Busye fwaanë ko mu kuboongë mëmpa më baanë i kumëlakilë ke baanë bëm'bwa. » —

²⁷ « Mati cyelikë, a Fumu, mu kumonë kwaandi, baanë bëm'bwa yivaawu bën'lyangaangë biselëkiti bim'bwangaangë kusi meesë më sifumu syaawu! »

²⁸ Mu bwaawu, Yeesu wusë n'vutulilë : « Oo! A n'cyeetu ciminu cyaaku cinenë! Biikë buvangënë mu njeeyi bunë wube zolilë. » Mo mëzoolë beenë, mwanaandi kubelukë.

Yeesu wabelusi mpaapë bibeedo

²⁹ Yeesu wusë botukë foofo i wusë kweendë ku ndaambu liyaangë li Ngalilee i bunë kwamaci ku yilu moongo, naandi wusë kalë faawu.

³⁰ Nkoongë yinenë yisë kum'belëmë, baawu bëyenataangë bibolikinyi, simpofo, mëbabë, bikatë i mpaapë bibeedo bin'ka. Baawu bisë tuulë bibeedo fë ntwaalë maalu maandi i wusë bëbelusi.

³¹ Nkoongë kusaangë yi nyeenzi bunë bamoni mëbabë make n'tubë, bibolikinyi byabelukë, bikatë byakë n'lyaatë i simpofo syakë m'monë. Baawu bësë dumisi Nzaambi Islayeelë.

Yeesu walikilë biveefi bi na bi baatu

³² Yeesu, wusë telë bilaanzi byaandi i wutubë : « Cyaali mu nkoongë oyo, cibilë bilumbu bi tatu babë ke yaami i bësyeeli yi cyosuku ve ci kulya. Miinu yisë n'zolë ko kubëvutulë yi civumu mpafëlë, mu kumaangë baawu kubwa libutu mu nzilë. »

³³ Bilaanzi bisë n'kufulë : « Kuni tum'podi kubakilë binë tufwenikini kulikilë mboongu ayi mu ntaandu be yiiyi yi ciyumi? »

³⁴ Yeesu wusë bëyufulë : « Mëmpa mëkwa mëke yiinu? » — « Saambwali, i mwa mpooko baanë bë mbisi ».

³⁵ Oboobo, naandi wusë tumisi nkoongë kukalë fë n'toto.

³⁶ Naandi kuboongë lisaambwali li mëmpa i simbisi, kutoondë Nzaambi, kumëmukënë i kuvaanë ke bilaanzi byaandi, baawu bisë kabilë bakë booso.

³⁷ Bakë booso bisë lya i bisë kukutu. Bilaanzi bisë ntwaalë saambwali li mikutë yi waalë bitini bisobilë.

³⁸ Banë bëlya babë biveefi bi na bi bëbakëlë, kutaangë ve bëcyeetu i bibabanë.

³⁹ Bunë kwavutuli sinkoongë, naandi wusë kandëmë mu bwaatu i wusë kweendë ku libweeti li Magëdaanë.