Matye 10 - N’KANGULU WUMOONË

Kuumi bilaanzi byooli

¹ Yeesu kwateli kuumi bilaanzi byooli, wusë bëvaanë lutumu lukukulilë biluunzi bibi i kubelusi yosuku ncyeenzu i yosuku mpilë bibolikinyi.

² Mëzinë më likuumi mimbunzi yi wali, maawaamë : wun'tetë Simu, wunë bëlukë Pyeelë i Andëlee mwanaandi nguli, Zaakë i Za li mwanaandi nguli, baanë bë Zebedee.

³ Filiipë i Batelëmi, Tomë i Matye cinoongë mpaku, Zaakë li mwaanë Alëfee i Tadee.

⁴ Simu wunë wun'nwaninë cikaangë mu si yaandi i Zuda Iskalyootë, wo wusumbisi Yeesu.

Cisalu ci kuumi bilaanzi bi byooli

⁵ Yeesu wusë filë likuumi li bilaanzi byooli mu mweendo. Wusë bëvaanë mëkomini ama : « Luyendyaanu ke bo bëkeeli ko Sizwiifë i lukotyaanu ko mu mëvulë më libweeti li Samali.

⁶ Yiveko, yendaanu ke basë Islayeelë, beekë buke mëmemë mëzimbilë.

⁷ Mu nzilë, tendulaanu i tubaanu : “Lwaangu lu mëyilu lwabelëmë!”

⁸ Belusyaanu bibeedo, vulumunaanu bëfwa, lyomisyaanu bangë bwaasi, kulaanu biluunzi bibi, beeno lutambulë buunë, vaanaanu yivaandi buunë.

⁹ Lunatyaanu ko woolë keti luboongo keti mekutë më mboongo mu sibolusë siinu.

¹⁰ Lunatyaanu nkutu ko mu mweendo, keti binkutu byooli, sisapaatu ve, keti luveengu, licyelikë cisasi, wufwanikini kubakë ndiwaandi. »

¹¹ « Mu lyosuku livulë kaambofo mu bosuku bwaalë lun'kotë, yufulaanu mooti lum'podi kubakë wun'viipë wunë wube fwanëkënë kulutambulë i lwe kalyaanu fëke naandi tee yi ntaangu yo lum'botëkulë kwaawu.

¹² Bunë lun'kotë mu n'zo, bilaanu banë bëke mwaawu : “N'sikë we bayiinu.”

¹³ Ningë n'zo beenë yibe fwanëkënë, n'sikiinu we kali mu baawu. Kasi mooti na sye lutambulë ko, vutukaanu yi n'sikiinu.

¹⁴ Ningë mu n'zo kaambofo mu livulë bëbëmaangë kulutambulë i kulukuwulu, basikaanu mu n'zo be yooyi kaambofo mu bwaalë be boobo i kukumunaanu n'kunkuunvu yi maalu miinu.

¹⁵ Licyelikë yilukaambë : mu cilumbu ci lufundusu, basë Sodoomë i Ngomoolë bën'vyookë lutabu luvyokili mu mëleembi yi livulë be linë lina. »

Sinkwamusi sin'kwiisë

¹⁶ « Talaanu! Yakulufilë buke mëmemë fë meeyi mikoomo. Oboobo, lwe zungululaanu buke sinyokë i mpeembi yi mpeeso buke mëbeembi.

¹⁷ Keelaanu, cibilë ocyo baatu bëluvakulë mu binzonzi i bëluvividë sikoti mu bizutununu byaawu.

¹⁸ Bëlunatë mu cibilë cyaami fë ntwaalë mikwa-lwaangu i fë ntwaalë mitinu, bwiinji lunatë cimbaanji ciinu fë ntwaalaawu i ke bo bëkeeli ko Sizwiifë.

¹⁹ Kasi, fanë bëluvakulilë, lwe baanu ko mu lusweenu mu mpilë bikumë lufwenikini kutubë. Mo lufwenikini kutubë mëluveewu mo mu ntaangu beenë.

²⁰ Licyelikë, maawu kusë mën'fuminë kuve ke beeno, vandi kasi Ciluunzi ci Tatiinu cyaawu cin'tubë mu beeno.

²¹ Baanë bë nguli bën'vakulë baanë yaawu bë nguli mu kubëvangisi kufwa i mëtaatë bën'vangilë bo bumweekë mu baanë baawu. Baanë bëm'balukilë mëtaatë maawu i bëbëvangisi lusifu lu lufwa.

²² Babooso bëluleendë mu cibilë ci lizinë lyaami. Kasi wunë wun'ciimbë moonyi tee fë siitu wun'vuukë.

²³ Bunë bëlukwamisi mu livulë ali, tiinaanu ku livulë lin'ka. Licyelikë yilukaambë : lusë yimaninë ko mëvulë mooso më Islayeelë, ntetë Mwaanë muutu kutuukë. »

²⁴ « Cilaanzi kupodi ve kuvyokililë n'loonjyaandi, keti n'dongo mu kuvyokililë fumwaandi.

²⁵ Bufwenikini cilaanzi kuba buke n'loonjyaandi. I n'dongo fwenikini kuba buke fumwaandi. Ningë fumu n'zo bëkun'teelë Belëzebuulë, buni bën'kaambu kufingilë banë bëke yaandi n'zo mweekë! »

Wunë lufwenikini kutiinë

²⁶ « Lutinyaanu muutu ko, linë liswaamë lim'monikë, i linë like mu mësweeci lin'zabëkënë.

²⁷ Linë yilukambilë ku fuundu, tubilaanu lyaawu fë ciyalëlë. Linë bëm'bokëtë, tendulaanu lyaawu fë yilu myaanzë.

²⁸ Lutinyaanu boomë ko banë bën'voondë nyitu, bën'kaambu kuvoondë mbali, kasi tiinaanu yiveko wunë wum'podi kuvangisi kuvoondë mbali i nyitu ku buluunji bu mbaasu.

²⁹ Kusë bën'sumbisyaangë ko mëvyoodo mwaali mu mpatakwe? I limweekë ve mu maawu lim'bwa fë n'toto kukaambë Tatiinu kulizaabë.

³⁰ Kasi mu beeno mileenjiinu yi n'tu yitaangu yakë yooso.

³¹ Nubaanu boomë ko : beeno lwiinji luvalu yi mpaapë mëvyoodo. »

Kuvitikë kaambofo kumaangë Yeesu Kliistu

³² « Mu lyaawu, wunë mba wun'tubilë mu miinu fë meeso më baatu, miinu yivaamë yikun'tubilë fë nduunzi Tataami wuke ku mëyilu.

³³ Kasi wunë mba wukum'maangë fë meeso më baatu, miinu yivaamë mba yikum'maangë fë meeso më Tataami wuke ku mëyilu. »

N'sikë kuve, kasi cincindu

³⁴ « Nubalyaanu ko ti miinu yiyisilë mu kutwaalë n'sikë fë n'toto. Miinu yisye kwisilë kuve mu kutwaalë n'sikë, kasi cincindu.

³⁵ Yiyisilë mu kukabulë mwaanë libakëlë i tataandi, mwaanë wu n'cyeetu i mamaandi, n'kwekisi i mamë n'nunyaandi.

³⁶ Simbeenyi si baatu bëkalë yaandi n'zo mweekë.

³⁷ Wunë wuzolisi tataandi, kaambofo mamaandi kuvyokilë miinu, na woowo wusye kun'fwanëkënë ko. Wunë wuzolisi mwanaandi wu bakëlë kaambofo wu n'cyeetu kuvyokililë miinu, na woowo wusye kun'fwanëkënë ko.

³⁸ Wunë wun'kaambu kunatë kuluuswaandi i wun'kaambu kun'daandë fë mbusë, na woowo wusye kun'fwanëkënë ko.

³⁹ Wunë wun'toombë kuluundë luziingu lwaandi, mba wulunyambikini. Wunë wun'nyambikini luziingu lwaandi mu cibilë cyaami, mba wulubakë. »

Sindobu

⁴⁰ « Wunë wulutambulë, miinu yikun'tambulë i wunë wukun'tambulë wun'tambulë yivaandi wunë wukun'filë.

⁴¹ Wunë wun'tambulë m'bici mu bubici bwaandi, na woowo wun'tambulë ndobu dedë mweekë yi m'bici. Wunë wun'tambulë muutu wusulëmë, wum'bakë ndobu bën'vaanë ke muutu wusulëmë.

⁴² Wunë mba wun'vaanë tokë mbuungu mweekë masi mëcyoosi ke wun'viipë mu bibabanë obyo, cibilë naandi wuli cilaanzi cyaami, cyelikë yilukaambë, na woowo wun'tambulë ndobwaandi. »