Matye 1 - N’KANGULU WUMOONË

Sinkaakë si Yeesu

¹ Libuuku li ntonunu li sinkaakë si Yeesu Kliistu, mwaanë Daviidë, mwaanë Abalaamë.

² Abalaamë wabë taatë Isaakë, Isaakë wubutë Zakoobë, Zakoobë wubutë Zuda yimunë baanë baandi bë nguli.

³ Zuda wabë taatë Peleesë i Zela – mamaawu wabë Tamaalë – Peleesë wabë taatë Esëloonë, Esëloonë li Laamë.

⁴ Laamë wabë taatë Aminadaabë, Aminadaabë wubutë Nasoonë, Nasoonë wubutë Salëmoonë.

⁵ Salëmoonë wubutë Bowaazë li Laabë, Bowaazë wubutë Obeedë li Luutë, Yobeedë wubutë Yese.

⁶ Yese wubutë Daviidë n'tinu. Daviidë wubutë Salomoonë yimunë n'kasi Uli –

⁷ Salomoonë wubutë Lobwaamë. Lobwaamë wubutë Abya. Abya wubutë Azaafë.

⁸ Azaafë wubutë Zozafaatë. Zozafaatë wubutë Zolaamë. Zolaamë wubutë Ozyaazë.

⁹ Ozyaazë wubutë Zoyataamë. Zoyataamë wubutë Akaazë. Akaazë wubutë Ezekyaasë.

¹⁰ Ezekyaasë wubutë Manaasë. Manaasë wubutë Amoonë. Amoonë wubutë Zozyaasë.

¹¹ Zozyaasë wubutë Zekonyaasë i baanë baandi bë nguli ntaangu bëbënatinë ku Babiloonë.

¹² Fë mbusë lwendulu ku Babiloonë, Zekonyaasë wubutë Salatyeelë. Salatyeelë wubutë Zolobabeelë.

¹³ Zolobabeelë wubutë Abyuudë. Abyuudë wubutë Elyakimë, Elyakimë wubutë Azoolë.

¹⁴ Azoolë wubutë Sadookë. Sadookë wubutë Akiimë. Akiimë wubutë Elyuudë.

¹⁵ Elyuudë wubutë Eleyazaalë. Eleyazaalë wubutë Mataanë. Mataanë wubutë Zakoobë.

¹⁶ Zakoobë wubutë Zozeefë, n'nuni Maali, wo wubutë Yeesu bën'teelë Kliistu.

¹⁷ Mu mëkaandë mooso kutatikilë Abalaamë tee Daviidë, fisë kuba kuumi mëkaandë më na, kutatikilë fëke Daviidë tee yi kunë bëbënatinë ku Babiloonë, kuumi mëkandë më na tee fë lubutulu lu Kliistu kuumi mëkaandë më na.

Lubutulu lu Yeesu Kliistu

¹⁸ Tala bunë buyisilë lubutulu lu Kliistu Yeesu. Maali, mamaandi, wabë wubilu kukweelu ke Zozeefë. Kasi ntetë baawu kuzingilë fë cimweekë, naandi wabë wubindëmë mu cimpukë ci Ciluunzi ci Saantu.

¹⁹ Zozeefë, n'nunyaandi, wabë wusulëmë i wusye zolë kuve kum'bundulë, naandi wusë boongë lukanyu lu kukabukë yaandi ku mëswamënë.

²⁰ Bo kulëbalaangë, yaanzi yi Fumu yisë kun'selukulë mu ndoosi i yisë n'kaambë : « A Zozeefë li mwaanë Daviidë, kebë kuba yi boomë mu kuboongë Maali n'kasyaaku, cibilë mati mu cimpukë ci Ciluunzi ci Saantu kulë mu kuciingë mwaanë.

²¹ Naandi wum'butë mwaanë wu bakëlë i njeeyi wukun'teelë Yeesu, cibilë naandi, wun'vuuci mboongwaandi mu mësumu maawu. »

²² Lyaliili lisë vangënë bwiinji lidedikini linë Fumu kutubilë mu m'bici :

²³ « Cinkumbë cim'bindëmë i wum'butë mwaanë wu bakëlë, bëkun'teelë Mënweelë ». — Lizinë be lyooli « Nzaambi wuke yimunë beeso ».

²⁴ Abu kwakotukë, Zozeefë wusë vaangë bo yaanzi yi Fumu yin'kambilë, i naandi wusë vitikë Maali kuba n'kasyaandi.

²⁵ Naandi sye buundë yaandi ciikë ko, tee yi fanë kubutilë mwaanë wu bakëlë wunë kuvaanë lizinë Yeesu.