Malëkë 3 - N’KANGULU WUMOONË

Yeesu wabelusi libakë mu cilumbu ci saba

¹ Vyaasi yin'ka, Yeesu kukotë mu cizutununu, mwabë libakëlë wuvolë likaandë li kooko.

² Sifalisyaanu bëlëtalaangë Yeesu ningë naandi wukum'belusi cilumbu ci saba, mu kum'bakë sintoondo.

³ Yeesu kukaambë muutu wabë wuvolë likaandë li kooko : « Manë n'telë, we yisi fë katyaasi ku meeyi. »

⁴ Naandi wusë bëkaambë : « Bufweeni cilumbu ci saba, mu kuvaangë liboti voo libi, mu kuvatulë muutu, voo mu kum'biikë kufwe? » Akasi, baawu bësye n'vutulilë mbeembu ko.

⁵ Yeesu kwazungini ntalu yi likaanzi mu baawu, cyaali i cyuundë byan'kotili mu cibilë ci bukafëkini bu mitimaawu, na kukaambë libakë beenë : « Nonunë kooko kwaaku. » Naandi kunonunë kwaawu i kwaawu kubelukë.

⁶ Sifalisyaanu kubasikë i bisë lengë kotë fuundu, yimunë bo bëke cinguuku cimweekë ci Eloodë, mu kufwiikë buni bëkuvondilë Yeesu.

Mpaapë baatu bakwiisë ke Yeesu

⁷ Foofë, Yeesu yimunë bilaanzi byaandi kuvolikë ku nkoonzu liyaangë. Mpaapë baatu kun'laandë, banë bëfuminë ku libweeti li Ngalilee, ku libweeti li Zudee,

⁸ ku livulë li Yelusaleemë, ku libweeti li Yidumee i ku lweeku lun'ka lu mwiilë Yulëdaanu, ku mëbweeti më mëvulë më Tiilë i Sidoonë. Mpaapë baatu bë mëbweeti i mëvulë be moomo, abu bayuwu manë kulëvaangaangë, baawu kwiisë ke naandi.

⁹ Boobo, Yeesu kukaambë bilaanzi byaandi bëm'belikilë bwaatu, mu kumaangë mpaapë baatu kun'fyetikini.

¹⁰ Licyelikë, bo kulëbelusyaangë mpaapë baatu, babooso bëlëbeelaangë bëlëtoombaangë kun'siimbë.

¹¹ Baatu bo bëvwaatu ke biluunzi bibi, bunë bam'moni, baawu kusiimbë li kubongëmë fë maalu maandi bwendi ke losukaangë : « Njeeyi wuli Mwaanë Nzaambi! »

¹² Kasi Yeesu, wusë bëkaambë yi n'kaswaandi yooso, bëleembu kutubë nani kukeeli.

Yeesu wasoolë kuumi mimbunzi wali

¹³ Kumanoofo, Yeesu wusë makë ku yilu moongo i naandi kutelë bo kuzolë mu kun'salilë i baawu kwiisë kuke naandi.

¹⁴ Mu baawu yivaandi, kufolikë likomo li kuumi li baatu bwaali bo kusoolë, kulëteelë mimbunzyaandi, kusiloobo, bwiinji bëkalë yaandi i mu kubëfilë mu ke loongë libuungu li Nzaambi,

¹⁵ yimunë lutumu lukukulilë biluunzi bibi.

¹⁶ Tala likuumi bëbwaali baawu aba: Simu – awu kuvaanë lizinë Pyeelë –

¹⁷ Zaakë mwaanë Zebedee i Za nkombaandi – baawu aba, Yeesu wusë kubëtelë Bwanalëzeesë, dedë: « baanë bë civelë » –

¹⁸ Andëlee, Filiipë, Batelëmi, Matye, Tomë, Zaakë li mwaanë Alëfee, Tadee, Simu wunë wun'nwaninë cikaangë mu si syaandi,

¹⁹ i Zuda Iskalyootë, awu wun'sumbisi Yeesu.

Yeesu yimunë libaambë lyaandi

²⁰ Yeesu wusë vutukë lu bwaalë i nkoongë baatu kube zutënooso i bisë be podyooso ko kubakë mëkanë më kwambulilë.

²¹ Libaambë li Yeesu lye yuwu lyaliili, baawu kwiisë mu kun'venë, kasi baawu bëlëtubaangë : « Naandi walawukë. »

Yeesu wavutulë n'vutu mu maambu mo bun'futikilë

²² Miloonji n'kaakë bo bëfuminë ku livulë li Yelusaleemë, kukaambë baatu : « Naandi wuvwaatu ke Belëzebuulë, fumu biluunzi bibi, mwaawu kulë mu kukulilaangë biluunzi bibi. »

²³ Mu bwaawu, Yeesu kutelë miloonji n'kaakë i wusë bëkambilë mu sisasafë : « Kwisilë bunye, Satënë kube kulilooso Satënë?

²⁴ Mooti lwaangu lukabukë lwaveekë yi lwaveekë, lwaawu kuzingilë bunye? Lwaawu mëzingulu mpa.

²⁵ Mooti yivaandi cifuumbë cikabukë cyaveekë yi cyaveekë, cifuumbë be cyooci mëzingulu mpa.

²⁶ Satënë oboobo, mooti wulë mu kuyinwanisi naveekë i naveekë, ningë ti naveekë wuyikabulë, lutumu lwaandi kupodi ve kuziingë i lwaawu kusiitë. »

²⁷ « Kaambofo, muutu ve wum'podi kukotë ku n'zo yi wo wuke yi n'viingu mu kutafë biimë byaandi, kukaambu kutekë kun'vidë bikonyi. Vandyoobo, yakë li kutafë byakë byooso binë kubakë.

²⁸ Cibeeni, yilukaambë, mësumu mooso më baatu mën'kobukë i busafu booso bën'vaangë mu Nzaambi.

²⁹ Kasi wosuku wun'safulë Ciluunzi ci Saantu, sasabi mësumu maandi misë n'kobuku ko, mësumu maandi mën'kalililë sakë yi sakë. »

³⁰ Yeesu wubëkambilë obo, cibilë bëlëtubaangë : « Ciluunzi cibi cyan'vwaatë. »

Mamë i banë bë nguli bë Yeesu

³¹ Foofë, mamaandi i banë yaandi bë nguli kutuukë ku ngaandë, baawu bisë filë ciluumbi mu kun'telë.

³² Nkoongë baatu yiyabë fë likumë lyaandi yisë n'kaambë : « Mamaaku i banë yaaku bë nguli i banë yaaku bëcyeetu baawu obo ku ngaandë. Baawu bën'vwa n'ciinzë mu njeeyi. »

³³ Naandi kubëvutulilë : « Mamaami nanye i banë yaami bë nguli bë nanye? »

³⁴ Kwe zungini ntalu mu banë babë foofë, na kutubë : « Mamaami naandyaawu, banë yaami bë nguli baawaaba.

³⁵ Licyelikë, wosuku wun'vaangë n'vwiilu Nzaambi, naandyoowo na mwanaami nguli, mwanaami n'cyeetu i mamaami. »