Luzabukunu 9 - N’KANGULU WUMOONË

¹ Mu lyaawu yaanzi yin'taanu wusë sikë mbudi. Miinu yisë monë mbotë yibwa fë n'toto. Bisë n'vaanë sabi libulu li mbaasu.

² Mbotë yizibulë libulu i mwiisi wufwanëkënë yi buluunji bu mbaasu wusë fukumukë. Muunyi i mpeemu bifuku kusi mwiisi be woowo.

³ Mëkookë misë basikë kusi mwiisi i binyambë fë n'toto. Bisë bëvaanë lutumu lufwanëkënë lu bineengë.

⁴ Bisë bëvaanë n'swa mu kuleembu kuvaafë keti citiiti, keti miti, keti bikunu bin'ka, kasi kanuku vwiili ke baatu banë bëkaambu citaanzi ci Nzaambi fë mbuunzu.

⁵ Baawu bësye bake n'swa ko mu kuvoondë baatu be boobo, kasi tokë kubënyokulë fë ngoondi taanu. Mwaangë wunë baawu bën'vaanë wun'fwanëkënë dedë mweekë bakutebilë ke cineengë.

⁶ Fë singoondi be syoosi sitaanu, baatu bën'toombë lufwa, kasi baawu bisë lubakë kuve. Baawu bën'tiisë lufwa, kasi lufwa lubëtiinë.

⁷ Mëkoonkë be moomo buke sikuvaalu sibelëminë mu cicindu. Fë yilu mitwaawu, fabë buke sintaatë si woolë i biinyi byaawu byabë buke biinyi bi baatu.

⁸ Baawu babë yi mileenji buke mileenji bëcyeetu i meeno maawu mabë buke meeno më sinkosi.

⁹ Cibakë bakë cyaawu ci n'timë cyabë cifuku mu cikaku ci ciseengu i ncyeembi mëvaafë maawu yilëkuwukunaangë dedë mweekë sikuvaalu simpaapë sibelëminë mu cicindu.

¹⁰ Baawu babë micyelë yimunë sintuumbu buke syo sike yi bineengë i mati mu micyelaawu mwaawu babë lutumu lu kunyokulilë baatu fë ngoondi taanu.

¹¹ Fë ntwalaawu, baawu bëke yi n'tinu, yaanzi buluunji bu mbaasu, bën'teelë ku Syebelee « Abadoonë », i cingeleekë « Apolyoonë », dedë mweekë : « Cityamunë ».

¹² Mënyonyi mën'tetë mavyookë, fë mbusë lyalyooli, mënyonyi mwaali mën'ka më fwenikinyooso kwiisë.

¹³ Yaanzi yin'samunu wusë sikë mbudi. Miinu yisë kuwu mbeembu yifuminë mu mësici më na më civakululu ci woolë cike fë ntwaalë Nzaambi.

¹⁴ Mbeembu yisë kaambë yaanzi yin'samunu yilësiimbaangë mbudi : « Kutulë siyaanzi sina sikangëmë mu mpaangë yibelëmë yi mwiilë wunenë wu Efalaatë. »

¹⁵ Bisë kutulë siyaanzi sina. Mati deku-dekoo mu zoolë be yooyo, mu cilumbu be cyooci, mu ngoondi be yooyi i mu n'vu be woowo, baawu babë bëbeliminë mu kuvoondë ndaambu yimweekë yin'tatu yi buloongo.

¹⁶ Bisë kun'sulikilë lutaangu lu mësodaadi maawu mabë fë yilu kuvaalu : baawu babë nkamë-wali si biveefi-biveefi.

¹⁷ Tala buni mu cyeendë-meeso cyaami, sikuvaalu sisë kum'monikënë i binatu kuvaalu byaawu : baawu babë yibikaku bibeengë buke mbaasu, bifyootë buke safilë i mwaambë n'lolo dedë mweekë sufëlë. Mitu kuvaalu yabë buke mitu sinkosi, mu minwaawu mëlëbasikaangë mbaasu, mwiisi i sufëlë.

¹⁸ Ndaambu yimweekë yin'tatu yi buloongo yisë fwa mu bivuungë bi tatu: mbaasu, mwiisi i sufëlë yilëbasikaangë mu munu sikuvaalu.

¹⁹ Cibilë lutumu lu sikuvaalu luke mu minwaawu i mu micyelaawu. Licyelikë micyelaawu yifwanëkënë yi sinyokë, syaawu sike yi mitu yo baawu bënyokililaangë baatu.

²⁰ Baatu bësyalë mu buloongo, bakë booso bo bëkaambu kufwa mu bivuungë be byoobyo, bësye yilekulë ko mu sinkosi sivangunu mu myookwaawu. Baawu bësye leembu ko mu kukuundë simpeefu simbi, sinkosi si woolë, palaatë, boloonzë, mëmanyi i miti, sin'kaambu keti kumonë, keti kuwu, keti kulyaatë.

²¹ Baawu bësye leembu ko mu kuvoondë baatu, kuvaangë bungaangë, kuvaangë cinduumbë i bwiifi.