Luzabukunu 8 - N’KANGULU WUMOONË

Citaanzi ci saambwali

¹ Bunë Mwaanë Limemë kukutulë citaanzi ci saambwali, ku yilu kusë ba swii fë meeyi zoolë.

² Miinu yisë monë saambwali li siyaanzi sitelëmë fë ntwaalë Nzaambi i bisë bëvaanë saambwali li simbudi.

³ Yaanzi yin'ka yisë kubelëmë fë civakululu, naandi wusiimbë ciyokulu ci yaafë ci woolë. Bisë n'vaanë mpaapë n'liinji, bwiinji kuwuyindulë, yimunë misaambu yi mboongu Nzaambi, fë civakululu ci woolë cike fë ntwaalë ntaanji.

⁴ Mwiisi n'liinji wusë fukumukë fë likaandë li kooko liyaanji, fë ntwaalë Nzaambi, yimunë tusaambulu tu mboongu Nzaambi.

⁵ Yaanzi wusë boongë mbuungu n'liinji wusë yiwaasi mu mbaasu civakululu i kuyibumë fë n'toto. Bivelë kusundilë kudumë, simbeembu, tusyeemu i n'toto kututumukë.

Saambwali li simbudi

⁶ Lisaambwali liyaanji lisiimbë saambwali li simbudi libelëminë mu kusisikë.

⁷ Yaanzi yin'tetë wusë sikë mbudi, n'vulë mëmanyi i mbaasu yibundënë yi meengë, bisë bwa fë n'toto. Cibeenzë cimweekë cin'tatu ci n'toto i miti bisë lakëtë i bitiiti byakë byooso bibisu.

⁸ Yaanzi yimwaali wusë sikë mbudi. Moongu wunenë wu mbaasu wusë bulumukë mu m'bu. Cibeenzë cimweekë cin'tatu ci m'bu cisë balukë meengë.

⁹ Cikuuku cimweekë mu bitatu mu bivaanji byooso bi moonyi byabë mu m'bu bisë fwa i cikuuku cimweekë ci mëkuumbi cityamukë.

¹⁰ Yaanzi yin'tatu yisë sikë mbudi. Mbotë yinenë yilëlakëtaangë buke mwiindë mpakë, yibwa fë n'toto. Yaawu yisë bwa fë yilu ndaambu yimweekë yin'tatu yi miilë i sinto-masi.

¹¹ (Lizinë li mbotë be yooyo Lusweenu.) Ndaambu yimweekë yin'tatu yi miilë yicitukë nduli i mpaapë baatu banë bënwa masi be moomo bëfwa, cibilë masi mëcitukë cilikilë cibi.

¹² Yaanzi yina wusë sikë mbudi. Ndaambu yimweekë yin'tatu yi muunyi i ngoondi i simbotë bisë ba citoombi, bisë kaambu ndaambu yimweekë yin'tatu yi cyeseesë cyaawu. Ndaambu yimweekë yin'tatu yi cilumbu i ndaambu yimweekë yin'tatu yi bwiilu bisë kaambu cyeseesë.

¹³ Miinu yilëtalaangooso i yisë kuwu ngwa-nuni yilëvumukaangë ku kati ku yilu yilëtendukaangë mu mbeembu nkamu : « Mënyonyi omo! Mënyonyi omo! Mënyonyi omo ke baatu bë n'toto bunë siyaanzi sitatu sin'ka sin'sikilë simbudi syaawu! »