Luzabukunu 7 - N’KANGULU WUMOONË

Nkamë li mëkumë na li biveefi bi na i citaanzi ci Nzaambi

¹ Fë mbusë lyalyooli, miinu yisë monë yaanzi na. Sitelëmë mu sintokoongu si na sin'toto, baawu bëlësiim'baangë mpeemu na bwiinji wun'viipë ve mu baawu wun'fulë fë n'toto, keti mu m'bu, keti mu miti.

² Miinu yisë monë yaanzi yin'ka yilëmakaangë ku mëselukulë më ntaangu i wulësiimbaangë citaanzi ci Nzaambi moonyi. Naandi wusë losukë yi nkasu ke siyaanzi si na sinë sibakë lutumu lu kulalëkini n'toto i m'bu:

³ « Keelaanu kulalëkini keti n'toto, keti m'bu, keti miti, ntetë beeso kutuulë ciliimbu ci citaanzi fë mbuunzu biseelu bi Nzaambiitu. »

⁴ Bisë kun'sulikilë lutaangu lu bo bëtuulë bitaanzi bi Nzaambi fë mbuunzu: baawu babë nkamë li mëkumë-na li biveefi bi na li mëkaandë mooso më mboongo Islayeelë :

⁵ kuumi biveefi byooli mu likaandë li Zuda, kuumi biveefi byooli, mu likaandë li Lubeenë, kuumi biveefi byooli mu likaandë li Ngaadë,

⁶ kuumi biveefi byooli mu likaandë li Aseelë, kuumi biveefi byooli mu likaandë li Nefëtali, kuumi biveefi byooli, mu likaandë li Manaasë,

⁷ kuumi biveefi byooli mu likaandë li Simeyoonë, kuumi biveefi byooli mu likaandë li Levi, kuumi biveefi byooli mu likaandë li Isakaalë,

⁸ kuumi biveefi byooli mu likaandë li Zabuloonë, kuumi biveefi byooli mu likaandë li Zozeefë, kuumi biveefi byooli mu likaandë li Bezamë.

Nkoongë baatu yifuminë mwakë mooso

⁹ Fë mbusë lyalyooli, miinu yilë talaangooso i yisë monë nkoongë baatu yinenë yinë muutu ve wusye podi kutaangë. Baawu babë baatu bë mëkaandë makë mooso, bë mëloongo mooso, bë mboongu yooso i simbeembu syooso. Baawu babë bëtelëmë fë ntwaalë ntaanji i fë ntwaalë Mwaanë Limemë, bëvwaatë mëzweeli më mpeembi i bitafi bi sinjeenvu fë myooko.

¹⁰ Baawu bëlëlosukaangë yi nkasu : « Luvukulu lun'fuminaangë ke Nzaambiitu wunë wuvwaandë fë ntaanji i Mwaanë Limemë! »

¹¹ Siyaanzi syooso sizukë ntaanji, mëkakëtë i bivaanji bi na bi baatu bë moonyi. Baawu bisë laakë mboku fë n'toto fë ntwaalë ntaanji i bisë kuundë Nzaambi

¹² bisë tubë : « Ameenë! Cibeeni, ndumu, bumpumu, bungelë, luzaabu, luzanjiku, luleendo i n'viingu bike mu Nzaambiitu mu ntaangu syakë syooso! Ameenë. »

¹³ Wumweekë mu mëkakëtë wusë kun'yufulë « Bënani obo bëvwaatë mëzweeli më mpeembi i kuni bafuminë? »

¹⁴ Miinu yisë n'vutulilë : « A Fumwaami nje wulizabisi. » Bwa boobo, naandi wusë kun'kaambë : « Ba boobo ba bëvyokilë mu mësengulu mënenë. Baawu basukulë mëzweeli maawu i bamëcyeesi mu meengë më Mwaanë Limemë.

¹⁵ Mati mu bwaawu baawu bëkeeli fë ntwaalë ntaanji Nzaambi i bëkun'sambililaangë bwiilu ku bwiilu, muunyi ku muunyi ku n'zwaandi. Wunë wubyaalë fë ntaanji mba wubëkeelë.

¹⁶ Baawu mba bisë bëmonë nzalë ko kaambofo mpwiilë, keti muunyi, keti lyosuku libabëlë linenë lisë be bëlakisi ko.

¹⁷ Cibilë Mwaanë Limemë like fë meeyi ntaanji wum'ba n'luunjyaawu i wubënatë ku bizibë bi masi më luziingu. Nzaambi wun'fyoonë mësweelë mu meeso maawu. »