Luzabukunu 6 - N’KANGULU WUMOONË

Bitaanzi

¹ Mu lyaawu, yisë monë Mwaanë Limemë wukutulë citaanzi cin'tetë mu lisaambwali li bitaanzi i miinu yisë kuwu wumweekë mu bivaanji bi na bi moonyi kutubë mu mbeembu yilëkuwukunaangë buke civelë : « Yisë! »

² Miinu yilëtalaangë i yisë monë kuvaalu ku mpeembi. Wunë wulën'kandëmaangë wusiimbë mpitë-mbaawu i bisë n'vaanë ntaatë. Naandi wuyendë yi nduunji i kube luungooso.

³ Bunë Mwaanë Limemë wukutulë citaanzi cimwaali, yisë kuwu civaanji cimwaali ci moonyi cilëtubaangë : « Yisë! »

⁴ Oboobo, kuvaalu kun'ka kusë kwesënë, naandi wabë wu beengë. Wunë wulën'kandëmaangë wabë lutumu lu kwakini n'sikë wooso fë n'toto, bwiinji baatu bëvondësënë baveekë yi baveekë. Bisë n'vaanë cisabë cinenë.

⁵ Fanë Mwaanë Limemë wukutulë citaanzi cin'tatu, miinu yisë kuwu civaanji cin'tatu cilëtubaangë : « Yisë! » Miinu yilëtalaangë i yisë kumonë kuvaalu kufyootë. Wunë wulën'kandëmaangë wabë wusiimbë cizongulu fë kooko.

⁶ Miinu yisë kuwu buke mbeembu yilëbasikaangë fë meeyi bivaanji bi na i yilëtubaangë : « Cizoongu cimweekë ci faliinë mu m'bakë cilumbu i bizoongu bi tatu bi looso mu m'bakë cilumbu. Kasi keelë wulëvaangë lin'viipë libi mu mëfutë i mu viinyi. »

⁷ Bunë Mwaanë Limemë likutulë citaanzi cina, miinu yisë kuwu civaanji cina cilëtubaangë : « Yisë! »

⁸ Miinu yilë talaangë i yisë kumonë kuvaalu ku ndiimbë masi më cileembi. Wunë wulën'kandëmaangë wuteelu « Lufwa » i buloongo bu baatu bëfwa bëyen'laandaangë. Bisë bëvaanë lutumu mu cibeenzë cimweekë ci na ci n'toto mu kuvoondë baatu baandi mu cicindu, mu ngwaambë, mu bivuungë i mu bibulu bi bubaalu.

⁹ Bunë Mwaanë Limemë wukutulë citaanzi cin'taanu, miinu yisë monë kusi meesë më civakulu biluunzi bi bo babë bëvoondë mu cibilë ci kusulëmë kwaawu mu maambu më Nzaambi i cimbaanji cyo baawu bën'teelë.

¹⁰ Baawu bëlëlosukë yi n'viingu wooso : « A Fumu saantu i cyelikë, tee ntaangu mbici wun'viingë mu kufundisi baatu bë n'toto mu kubëvutulë fuutë mu manë mën'talë lufwa lwiitwe? »

¹¹ Bisë vaanë kadë muutu mu baawu lizweeli li mpeembi i bisë bëkaambë mu kuvungooso moonyi mwa ntaangu, tee yi fanë bëm'bweelë lutaangu lu banë yaawu bë nguli i sindiku syaawu si bisalu banë bëfitë natë ku lufwa buke baawu.

¹² Mu lyaawu, miinu yisë monë Mwaanë Limemë kukutulë citaanzi cin'samunu. Bwa boobo, busë ba lututumuku lunenë lu n'toto, muunyi wusë ba citoombi buke n'leeli sedë i ngoondi yooso yisë beengë buke meengë.

¹³ Simbotë sibwa fë n'toto, buke mëkuundi mën'kaambu mabwa mu n'ti wu n'ngeengë wunikunu mu ngungë mpeemu.

¹⁴ Liyilu lisë zimbilë buke libuuku bafutikë. Myoongo yooso i bitumbu bisë lalukë fanë byabë.

¹⁵ Mitinu yi n'toto, bëkuluutu, sifumu si mësodaadi, bisinë, bangë luleendo i bëndongo bëmesë kaambofo bësyalulu bisë swaamë mu midungutu i mu sintalë si myoongo.

¹⁶ Baawu bëlëkaambaangë myoongo i sintalë si mëmanyi : « Lwe bwaanu fë yilwiitu i tusweecyaanu cinaanu yi ntalu yi wunë wubyaalë fë ntaanji i cinaanu yi likaanzi li Mwaanë Limemë.

¹⁷ Cibilë cilumbu cinenë ci likaanzi lyaawu cyakutuukë i naani wum'podi kun'tunzukënë? »