Luzabukunu 5 - N’KANGULU WUMOONË

Libuuku i Mwaanë Limemë

¹ Miinu yimonë libuuku lyabë buke lukatu lu n'kaandë bëziingë fë kooko ku mëbakëlë ke wunë wubyaalë fë ntaanji, lwaawu lwabë lusonëmë sinkoonzu si wali i bëkaangë mu saambwali li bitaanzi.

² Yisë monë yaanzi luleendo yilëtendukaangë mu mbeembu nkamu : « Nani wusulëmë mu kukutulë bitaanzi i kuzibulë libuukwe? »

³ Kasi fabë muutu ko, ku yilu, fë n'toto i kusi n'toto wulëpodi kuzibulë libuuku i kumonë likati.

⁴ Miinu yilëlilaangë beenë, cibilë fabë muutu ko wusulëmë wulëpodi kuzibulë libuuku mu kumonë likati.

⁵ Mu bwaawu, wumweekë mu mëkakëtë wusë kun'kaambë : « Leembu kulilë. Tala : n'kosi likaandë li Zuda, n'tekulu n'tinu Daviidë wabakë nduunji, naandi wum'podi kukutulë lisaambwali li bitaanzi i kuzibulë libuuku. »

⁶ Miinu yisë monë Mwaanë Limemë litelëmë fë meeyi ntaanji, wuzuku ke bivaanji bi na bi moonyi i mëkakëtë. Naandi wabë bukë ban'cyeelë cikongulo. Naandi wabë yi saambwali li misici, yivaandi saambwali li meeso, mëke saambwali li biluunzi bi Nzaambi bëfilu bwendi n'toto.

⁷ Mwaanë Limemë lisë belëmë i wusë boongë libuuku mu kooko ku mëbakëlë ke wunë wubyaalë fë ntaanji.

⁸ Kususukulë abu, bivaanji bi na bi moonyi i mëkumë-mwaali më na li mëkakëtë mëfukumë fë ntwaalë Mwaanë Limemë. Kadë muutu wabë yi cisikulu i simbuungu si woolë siwaalë n'liinji, syaawu tusaambu yi mboongu Nzaambi.

⁹ Baawu bëlëyolaangë lwiimbu lumoonë : « Njeeyi wusulëmë mu kuboongë libuuku i mu kukutulë citaanzi. Cibilë njeeyi bëkuvoondë i mu luvakulu lwaaku, wuvuuci baatu bë mëkaandë mooso, bë simbeembu syooso, bë sisi syakë syooso.

¹⁰ Mu baawu njeeyi wavaangë lwaangu lu singangë-Nzaambi mu kusalilë Nzaambiitu, i baawu bëm'byaalë fë moongo butoto. »

¹¹ Yilë talaangooso i yisë kuwu mbeembu yi mpaapë siyaanzi : baawu babë biveefi-biveefi, mëkuumi më biveefi-biveefi babë bëzukë ntaanji, bivaanji bi moonyi i mëkakëtë.

¹² Baawu bëlëyolaangë mu mbeembu nkamu: « Mwaanë Limemë lyo bëvoondë lisulëmë mu kutambulë luleendo, businë, bungelë i mëngolo, luzanjiku, bumpumu i ndumu! »

¹³ Miinu yisë kuwu yivaandi bivaanji byooso bike ku yilu, fë n'toto, kusi n'toto i mu m'bu – bivaanji byooso bi buloongo n'viipë – bilëyolaangë : « Ke wunë wubyaalë fë ntaanji i ke Mwaanë Limemë wutambulë ludumu, luzanjiku, bumpumu i luleendo mu ntaangu syakë syooso! »

¹⁴ Bivaanji bi na bi moonyi bisë vutulë : « Ameenë! » Mëkakëtë mëfukumë i bisë n'kuundë.