Luzabukunu 4 - N’KANGULU WUMOONË

Kukuundë ku yilu

¹ Fë m'busë lyalyooli, miinu yisë bakë cyeendë-meeso cin'ka: yisë monë livitu lizibukë ku yilu. Mbeembu yo yabë yiyuwu yilëkun'kaambaangë ntetë, yilëtendukaangë buke mbudi, yisë kun'kaambë : « Makë afë i miinu yikuleesi linë lifwenikini kwiisë ku ntwaalë. »

² Kususukulë abu, Ciluunzi cisë kum'pwaatë. Faawu, ku yilu, fabë ntaanzi. Fë ntaanzi be yooyo wun'viipë wubyaalë.

³ Naandi wabë lumaniku lu mëmanyi më bukaalu më zasëpë i më salëdwaanë. Ntaanji yabë yiziingu ke n'tyaamë wulëlesikë buke limanyi li emëloodë.

⁴ Fë luzuku lu ntaanji fabë mëkumë-mwaali më ntaanji na mën'ka, fanë fëlëbyalilaangë mëkumwaali më ntaanji na më mëkakëtë bëvwaatë mpeembi i sintaatë si woolë.

⁵ Fë ntaanji fëlëfuminaangë tusyeemu, ncyeembi simbeembu i biduminë bi bivelë. Saambwali li miindë mpakë yilëlulaangë fë ntwaalë ntaanji, yaawu lisaambwali li biluunzi bi Nzaambi.

⁶ Fë ntwaalë ntaanji fabë dedë mweekë m'bu bibeengë, wulëlesikaangë buke kilistaalë. Fë meeyi, luzuku lu ntaanji, fabë bivaanji bi na bi moonyi, babë meeso ku ntwaalë i ku mbusë.

⁷ Civaanji cin'tetë ci moonyi cilë fwanëkënaangë buke n'kosi i cimwaali buke mwaanë ngoombi. Cin'tatu cyabë ciinyi buke muutu i ci na cilëfwanëkënaangë buke ngwa-nuni yilë ke dumukaangë.

⁸ Kadë civaanji mu bya bi na byabë yi mëvaafë më samunu, mabë yi meeso ku yilu i ku si. Baawu bëlë ke yolaangë bwiilu i muunyi : « Saantu, saantu, saantu wuli Fumu Nzaambi n'kwa-luleendo wuli, wukeeli i wun'kwisë. »

⁹ Kadë vyaasi yinë bivaanji bi na bi moonyi bin'yoolë mu kudumisi, kuzanjikë i kutoondë wunë wubyaalë fë ntaanji, wunë wulë mu kuziingë sakë yi sakë.

¹⁰ Mëkumë-mwaali li mëkakëtë më na mëfukumë fë ntwaalë wunë wubyaalë fë ntaanji, baawu bëlë mu kukuundë wunë wun'ziingaangë ntaangu syooso. Baawu bëm'bumë sintaatë syaawu fë ntwaalë ntaanji mu kutubë :

¹¹ « A Fumu, Nzaambiitu, njeeyi be fwaanë kutambulë bumpumu, luzanjiku i luleendo. Cibilë njeeyi n'vaanji byakë byooso, biyisë mu luziingu mu n'vwiilwaaku. »