Luzabukunu 3 - N’KANGULU WUMOONË

N'kaandë ke Cingangë ci Salëdë:

¹ « Sonikë ke yaanzi yi Cingangë ci Salëdë : Tala linë lin'tubë wunë wuke yi saambwali li biluunzi bi Nzaambi i saambwali li simbotë: Miinu yizabisi cisalu cyaaku, yizabisi ti njeeyi ke yi ndumu mu kuba moonyi, kosuku njeeyi wufwa.

² Kotukë, simbililë cyo ci ciili yaaku mu kumaangë cyaawu kufwa cyakë cyooso. Cibilë yilë mu kumonë ti mëvaangë maaku mësye fwanëkënë ko fë meeso më Nzaambyaami.

³ Tebukë moonyi mu liloonji lyo watambulë i buni waliyuwulu. Ba wusulëmë mu lyaawu i balulë mëvaangë maaku. Ningë njeeyi sye kotukë ko, miinu yin'kwisë mu cin'tulëmuci buke mwiifi, njeeyi wusë n'zaabë ko ntaangu yo yin'kwisilë.

⁴ Oboobo m'pooku baatu baaku ku Salëdë bëkaambu kusumunë n'vwaatwaawu. Baawu bën'kwendë yaami cintwaali, bën'vwaatë mpeembi, cibilë baawu bëfwanëkënë. »

⁵ « Banë bëm'bakë nduunji bën'vwaatë binkutu bi mpeembi, miinu yisë m'botulë kuve mëzinë maawu mu n'kaandë wu moonyi. Miinu yin'tubë fë ntwaalë Tataami i fë ntwaalë siyaanzi syaandi ti yibëbakësi. »

⁶ « Biikë wosuku wunë wuke yi matu wuyuwu buboti linë Ciluunzi cin'tubë ke Bingangë! »

N'kaandë ke Cingangë ci Filadelëfi

⁷ « Sonikë ke yaanzi yi Cingangë ci Filadelëfi : Tala linë lin'tubë wunë wuke saantu i cyelikë, wunë ke sabi yi n'tinu Daviidë : wunë wun'zibulë i muutu ve wum'podi kuzibikë; wunë wun'zibikë i muutu ve wum'podi kuzibulë :

⁸ Miinu yizabisi cisalu cyaaku, yizabisi ti njeeyi wuke tokë yi mwa n'viingu, mu kumonë, njeeyi wabë wusulëmë mu libuungu lyaami i njeeyi wusye kun'tunë ko. Bwaawu, yazibulë livitu fë ntwaalaaku, muutu ve wum'podi kuzibikë.

⁹ Tala linë yin'vaangë mu baatu bë cizutununu ci Satënë, bibutë-maambu be byoobi bën'tubaangë ti baawu Sizwiifë, kasi bëkeeli Sizwiifë ko : miinu yibëkacikë mu kufukumë fë ntwaalaaku mu kukutuunvi. Baawu bëzabisi ti miinu yibe kuzolë.

¹⁰ Abu wasweekë n'swaami wukuba yilutatumunu, miinu yin'vaami yikusweekë mu ntaangu simpasi silë mu kwiisë mu buloongo booso mu kuseengë baatu fë n'toto.

¹¹ Miinu yilengë kwiisë. Simbililë cyo wabakë, bwiinji muutu ve wukuboongë ntataaku yi nduunji. »

¹² « Ke wunë wum'bakë nduunji, miinu yin'vaangë likuunzi mu n'zo Tataami Nzaambi i naandi wusë bëbasikë ko. Miinu yin'sonikë mu naandi lizinë li Nzaambi yi lizinë li livulë li Nzaambi, Yelusaleemë yimoonë yinë yin'kulukë ku yilu, yin'filu ke Nzaambyaami, miinu yin'sonikë mu naandi lizinë lyaami limoonë. »

¹³ « Biikë wosuku wuke yi matu, kuyuwu buboti linë Ciluunzi wun'tubë ke Bingangë! »

N'kaandë ke Cingangë ci Lawodisee

¹⁴ « Sonikë ke yaanzi Cingangë ci Lawodisee : Tala linë lin'tubë wunë bën'teelë Ameenë, mbaanji yisulëmë i cibeeni, wunë wuke fë ntatukulu mu byakë byooso binë Nzaambi kuvaangë.

¹⁵ Miinu yizabisi cisalu cyaaku. Miinu yizabisi ti njeeyi wusë cyoosi ko kaambofo mbaasu. Ningë tokë njeeyi wulë cyoosi kaambofo mbaasu!

¹⁶ Vandi kasi njeeyi wusë cyoosi ko kaambofo mbaasu, njeeyi wulë lulungë-lungë, bwaawu miinu yikulukilë.

¹⁷ Njeeyi wun'tubë : “Miinu cisinë i yavaangë tungooso tuboti, yisë n'kaambu ciimë ko.” Mu kumonë, njeeyi sye zaabë ko ti mu mënyoni i mu cyuundë wukeeli! Njeeyi ciyeembi, mpeeni i mpofo.

¹⁸ Mati mu lyaawu miinu yikuvaanë ndoonji mu kusuumbë ke miinu woolë bëlyomisi ku mbaasu, bwiinji wuba cyelikë cisinë. Suumbë yivaandi binkutu bimpeembi wuvwaatë mu kumaangë njeeyi kumonë sonyi i kumonikë mpeeni, oboobo ciloongo mu kubukë meeso maaku i mu kubëmonë.

¹⁹ Miinu yin'seembaangë i yin'sunjikaangë bakë booso banë yizolisi. Ba buvavambë i balulë mëvaangë maaku.

²⁰ Yuwu, yike fë livitu i yilë mu kukokumunë. Ningë wun'viipë wun'kuwu mbeembwaami i wun'zibulë livitu, miinu yin'kotë ke naandi, yin'kwambulë yaandi i naandi yimunë miinu. »

²¹ « Ke bo bëm'bakë nduunji yin'vaanë n'swa mu kubyaalë yaami fë ntaanzyaami, dedë mweekë miinu, bunë yibakë nduunji, yiye kalë yimunë Tataami fë ntaanzyaandi. »

²² « Biikë kadë muutu wunë wukeeli yi matu kwe yuwu buboti linë Ciluunzi wun'tubë ke Bingangë! »