Luzabukunu 22 - N’KANGULU WUMOONË

¹ Yaanzi wusë kun'deesi yivaandi mwiilë masi më luziingu, wulë lesikë buke kilistaalë i wulëbasikaangë fë ntaanji Nzaambi i Mwaanë Limemë.

² Wulëkum'baangë fë mëvaambë më nzilë. Mu kadë nkoonzu yi mwiilë kuke n'ti luziingu, wun'vaanë mëkuundi kuumi vyaasi wali mu n'vu, vyaasi mweekë kadë ngoondi. Mëkayi maandi mëke n'ciinzë mu lubelukulu lu mëloongo.

³ Fisë be ba ko cin'velë cim'ba mu lusifu lu Nzaambi. Ntaanji Nzaambi i Mwaanë Limemë yim'ba fë livulë, biseelu bi Nzaambi mba bëkun'kuundë.

⁴ Baawu bëm'monë ciinyi cyaandi i lizinë lyaandi bën'sonikë fë simbuunzu syaawu.

⁵ Fisë be mba bwiilu ko i baawu kusë bëm'ba tesu cyeseesë ci mwiindë keti cyo ci muunyi, cibilë Fumu Nzaambi wun'tuulë mu baawu cyeseesë cyaandi i baawu mba bëm'byaalë sakë yi sakë.

Lwisulu lu Yeesu

⁶ Yaanzi wusë kun'kaambë : « Mëbuungu be maamë mëcyelikë i mu kusiilë lufyaatu. Fumu Nzaambi, wunë wun'sulikilaangë mibici, wafilë yaanzyaandi mu kuleesi biseelu byaandi linë mulooko liisë. »

⁷ « Yuwu, lin'tubë Yeesu, miinu kumëzimbukulë yin'kwisë! Nyeenzi ke banë bën'siimbaangë mëbuungu më lubiku më libuuku be liili. »

⁸ Miinu Za, yisë kuwu i yisë monë maawu. Fë mbusë kuwu i kumonë, yisë kufukumë mu maalu më yaanzi wunë wukun'deesi maawu, mu kun'kuundë.

⁹ Kasi naandi wusë kun'kaambë : « Keelë wulësilë boobo! Miinu ciseelu buke njeeyi, bo buke banë yaaku bë nguli mibici i buke bakë booso banë bën'cinzikaangë mëbuungu mu libuuku be liili. Mati ti Nzaambi wufwenikini kukuundë! »

¹⁰ Wusë be tubooso : « Keelë wulësweekë mëbuungu më lubiku më libuuku be liili, cibilë ntaangu bëzitikë mu maambu makë mooso omo yabelëmë.

¹¹ Wunë wuke mëvaangë mëbi kulandilë mëvaangë mëbi i wunë wukaambu kulyoomë kulandilë kuleembu kulyoomë, wunë wun'vaangaangë liboti kulandilë kulivaangë i wunë wuke saantu kulandilë kulyatilë mu busaantu. »

¹² « Yuwu, bën'tubë Yeesu, miinu kumëzimbukulë yin'kwisë! Miinu yin'kwisë yimunë futë mu kuvaanë kadë muutu mu cisalu kwavaangë.

¹³ Miinu “Alëfa yi Omëga”, wun'tetë i situkulu, ntonunu i siitu. »

¹⁴ Nyeenzi banë bën'sukulaangë n'vwaatwaawu, i banë bëke yivaandi yi n'swa mu kulya mëkuundi më n'ti luziingu i mu kukotë fë minu n'zo livulë.

¹⁵ Kasi ku ngaandë livulë, bivadë-mbi, banë bën'vaangaangë mëyoombo, bangë bunduumbë, bivoondë baatu, bikuundë sinkosi i bakë booso bën'zolaangë i bibutë-maambu!

¹⁶ « Miinu Yeesu, yifilë yaanzyaami mu kuluzabikini lyalyooli mu Bingangë. Miinu ndaandu mu cifuumbë ci Daviidë, mbotë yin'lesikaangë yimenë. »

¹⁷ Ciluunzi i N'kamë bëlë mu kutubë : « Yisë! » Wunë wun'kuwu lyalyooli kutubë yivaandi : « Yisë! » Wunë wuke yi mpwiilë kwiisë. Wunë wun'toombë masi më luziingu kwe mëtambulë buunë.

Situkulu

¹⁸ Miinu Za, yim'bikini ke wosuku wun'kuwu tubiku tu libuuku be liili : ningë wun'viipë wum'bweelë lin'viipë, Nzaambi mba wum'bweelë mu naandi bivuungë bësonikë mu libuuku be liili.

¹⁹ Ningë wun'viipë wum'botulë lin'viipë mu tubiku tu libuuku be liili, Nzaambi wukum'botulë cikuuku cyaandi ci mëkuundi më n'ti luziingu i livulë li saantu bësonikë mu libuuku be liili.

²⁰ Wunë wun'sisiminë cyelikë mu lyaliili wun'tubë : « Ee, miinu kumëzimbukulë yin'kwisë! » Ameenë! Bwe beeli boobo! Yiisë Fumu Yeesu!

²¹ Bike muulë Fumu Yeesu we ba yimunë beeno booso.