Luzabukunu 21 - N’KANGULU WUMOONË

Li yilu limoonë i n'toto wumoonë

¹ Miinu yisë monë li yilu limoonë i n'toto wumoonë. Li yilu lin'tetë yi n'toto wun'tetë bisë zimbilë i m'bu wusye be ba ko.

² Yisë moonë livulë li saantu Yelusaleemë yimoonë yilëkulumukaangë lu yilu, yifilu ke Nzaambi, yibelëminë buke n'cyeetu wamiingë mu ludyengunu lu n'nunyaandi.

³ Miinu yisë kuwu mbeembu nkamu yifuminë fë ntaanji i yilëtubë : « Buyifanwabu n'lalulu Nzaambi weekë fë meeyi baatu! Naandi mba wun'lembikilë yimunë baawu i baawu bëm'ba mboongwaandi. Nzaambi naveekë wum'ba yimunë baawu, wum'ba Nzaambyaawu.

⁴ Naandi mba wun'fyoonë lyosuku lisweelë li meeso maawu. Fisë be ba lufwa ko, keti cifwiili, keti lwaambu keti lusweenu. Licyelikë, maambu më ntamë mën'zimbilë. »

⁵ Mu lyaawu, wunë wuvwaandë fë ntaanji wusë tubë : « Buyifanwabu, yin'vaangë byakë byooso bimoonë. » Naandi wusë kun'kaambë : « Sonikë aliili, cibilë mëbuungu maami mëcyelikë i mëfwanëkënë. »

⁶ Naandi wusë be tubooso : « Lya vangënë! Miinu “Alëfa i Omega”, ntatukulu i situkulu. Wunë wuke yi mpwiilë, mba yikun'vaanë masi mu kunwa mu boobo ku nto-masi më luziingu.

⁷ Wosuku wum'bakë nduunji, wun'tambulë ke miinu likabu. Miinu yim'ba Nzaambyaandi i naandi wum'ba mwanaami.

⁸ Kasi mu bangë boomë, bëkaambu kuta maanë, bëke yi mëvaangë mëbi, bivoondë baatu, bangë busafu, ke bo bën'vaandë, bën'kuundë sinkosi i bibutë-maambu byooso, cikalulu cyaawu cim'ba mu liyaangë li sufëlë yi mbaasu, lwaawu lufwa lumwaali. »

Yelusaleemë yimoonë

⁹ Wumweekë mu saambwali liyaanji wulësiimbaangë lisaambwali li simbuungu siwaalë lisaambwali li bivuungë bi siitu wusë kun'kaambë : « Yisë i yikuleesi n'cyeetu bëkweelë, n'kamë Mwaanë Limemë. »

¹⁰ Ciluunzi cisë kun'siimbë cisë kun'natë kusalaangë limoongo. Naandi wusë kun'deesi livulë li saantu, Yelusaleemë, yilëkulumukaangë lu yilu, yifilu ke Nzaambi.

¹¹ Yilëngalëmë mu bumpumu bu Nzaambi. Livulë lilëmanikë mu n'nyani wufwanëkënë yi limanyi li bukaalu, li limanyi li zasëpë like veyi-veyi dedë mweekë kilistaalë.

¹² Lyaawu lyabë yi cibakë cinenë, yimunë kuumi mëvitu mwaali i kuumi yaanzi wali silëluungaangë mëvitu. Fë yilu mëvitu fabë bësonikë mëzinë kuumi mëkaandë mwaali më mboongu Islayeelë.

¹³ Kadë lweeku lwabë mëvitu më tatu: mëtatu ku mësindulu më ntaangu, mëtatu ku moongo, mëtatu ku waandë i mëtatu ku mëselukulu më ntaangu.

¹⁴ Cibakë ci livulë cyabë cituungu fë yilu kuumi mëmanyi mwaali mu mbaandu, fanë fabë bësonikë mëzinë mëkuumi mimbunzi wali bë Mwaanë Limemë.

¹⁵ Yaanzi yinë yilëkun'kaambaangë wabë wusiimbë cizongulu, liveeso li woolë, mu kuzongilë livulë, mëvitu maandi i cibakë cyaandi.

¹⁶ Livulë lyabë ntokoongë na, kukulë kwaandi kwabë mpilë mweekë yi kwangilë kwaandi. Yaanzi yisë zoongë livulë mu liveeso lyaandi : kuumi biveefi byooli bi sintamë si mitakë, lyaawu lyabë yivaandi liyangilë yizangëmë yikukulë.

¹⁷ Yaanzi wusë zoongë yivaandi cibakë: nkamë mëkumë-na më mitakë më n'zangëmë, dedë cizongulu cinë naandi kulësalilaangë.

¹⁸ Cibakë cyabë cituungulu mu zasëpë i lyaveekë livulë lyabë li woolë lilyoomë.

¹⁹ Simbaandu si cibakë si livulë syabë sicyemununu mu yosuku mpilë mëmanyi mu bukaalu: mbaandu yin'tetë yabë yi zasëpë, yimwaali yi safiilë yin'tatu yi agaatë, yina yi emëloodë,

²⁰ yin'taanu yi onikësë, yin'samunu yi salëdwaanë, yi saambwali yi kilisoliitë, yinaanë yi belilë, yivwa yi topaazë, yikuumi yi klisoplasë, yikuumi yimweekë yi tilëkwaasë i yikuumi yiwaali yi ametistë.

²¹ Likuumi li mëvitu mwaali lyabë likuumi li misaangë wali. Kadë livitu lyabë bëvangilë mu n'saangë mweekë. Ngaandë livulë lyabë li woolë lilyoomë, veyi-veyi buke koopo lu meengë.

²² Miinu yisye monë n'zo-Nzaambi ko mu livulë be lyooli, cibilë yaawu n'zo Fumu, Nzaambi n'kwa-luleendo i Mwaanë Limemë.

²³ Livulë likeeli ko tesu muunyi keti ngoondi mu kubakë cyeseesë, cibilë bumpumu bu Nzaambi bulë mu kun'vaanë cyeseesë i Mwaanë Limemë mwiindaandi.

²⁴ Mëloongo mba bën'lyatilë mu cyeseesë cyaandi i mitinu yi n'toto mba bën'twaalë businë bwaawu.

²⁵ Mëvitu më mëvulë mën'kalilë mëzibukë muusë wakë wooso. I keti yivaandi maawu mësë m'ba ko mëzibëmë, cibilë fa foofo kusë be ba bwiilu ko.

²⁶ Mba bën'twaalë ludumu i businë më mëloongo.

²⁷ Kasi cin'velë ve cikaambu kulyoomë cin'kotë mu livulë be lyooli, keti muutu ve wuyivandikë mu simpaandu i lupuutu. Mba bën'kotë tokë banë lizinë lisonëmë mu libuuku li luziingu, linë likeeli Mwaanë Limemë.