Luzabukunu 20 - N’KANGULU WUMOONË

Civeefi ci n'vu

¹ Miinu yimonë yaanzi yifuminë lu yilu, naandi wusiimbë fë kooko sabi yi libulu li mbaasu i mpaangë yinenë.

² Naandi wusiimbë nyokë cinganzikë, nyokë yi ntamë, bën'teelë ti dyaabu kaambofo Satënë i naandi wusë n'kaangë fë civeefi ci n'vu.

³ Yaanzi wusë n'lakë ku libulu li mbaasu, wusë n'kaangë mu sabi i wusë batë fë yilwaandi, bwiinji ti nyokë cinganzikë yileembu kube zimbisi mëloongë mën'ka tee yi fanë civeefi ci n'vu cin'vyookë. Fë mbusë lyalyooli, bëkun'kutulë fë mwa ntaangu.

⁴ Miinu yisë monë sintaanji : banë bëlëvwaandë faawu bëbakë lutumu lu kufundisi. Yisë monë yivaandi biluunzi bi banë bëvoondë mu cibilë ci kusulëmë kwaawu mu cyelikë ci luzabukunu ci Yeesu i mu libuungu li Nzaambi. Baawu bësye sambilë kuve cibulu, keti nkosi i baawu bësye bakë ko litonë li cibulu fë mbuunzu keti fë kooko. Baawu bëvutukë mu luziingu i bisë tumi yimunë Kliistu fë civeefi ci n'vu.

⁵ Bëmesë bëfwa bisë n'vutukë ko mu luziingu ntetë civeefi ci n'vu kutekë vyookë. Mati luvulumuku lun'tetë.

⁶ Nyeenzi ke banë bëm'bakë cikuuku mu luvulumuku be loolo lun'tetë! Baawu bëm'ba banë bë Nzaambi i lufwa lumwaali lukeeli yi lutumu mu baawu kuve. Baawu bëm'ba singangë-Nzaambi si Nzaambi i si Kliistu i baawu bën'tumi fë ntaanji yi Kliistu fë biveefi bi mivu.

N'duumbë wu Satënë

⁷ Bunë biveefi bi mivu bin'vyookë, Satënë bëkum'baasi mu buloko bwaandi.

⁸ Naandi wun'kwendë mu kupuutë baatu bë si syooso sike mu buloongo booso, bën'teelë ti Googë i Magoogë. Naandi wubëkucikë mu cicindu i baawu bëm'ba yivaandi bëmpaapë bo buke singeenzë si cisenginini mu ndaambu m'bu.

⁹ Baawu obo bëlë mu kweendë mu nyalu-n'toto wooso i baawu bën'zukë mboongu Nzaambi, livulë lizolu ke Nzaambi. Kasi mbaasu yin'kulumukë lu yilu i yibëlakisi.

¹⁰ Mu lyaawu, dyaabu wunë wulëbëpuutaangë, bëm'bumë mu lyaangë li sufëlë yi mbaasu, munë mwabë cibulu i m'bici lupuutu. Baawu bëm'monë simpasi si sakë yi sakë bwiilu ku bwiilu i muunyi ku muunyi.

Lufundusu lu siitu

¹¹ Miinu yisë monë ntaanji yinenë yi mpeembi i wunë wulëbyalaangë faawu. N'toto i li yilu bisë kwakënë cinaanu yi naandi i bisë be bëmonë ko.

¹² Yisë monë baatu bëfwa, bëkuluutu i bibabanë, bëtelëmë fë ntwaalë ntaanji. Mëbuuku misë zibukë. Libuuku lin'ka yivaandi lisë zibukë : libuuku li luziingu. Bëfwa bëbëfundisi mu manë bëvaangë, bo bësonikë mu mëbuuku.

¹³ M'bu wusë baasi baatu booso bëfwa. Lufwa i buloongo bu baatu bëfwa bëvutulë yivaandi sinvuumbi syaawu. Bakë booso bisë bëfundisi mu mëvaangë maawu.

¹⁴ Lufwa i buloongo bu baatu bëfwa bëbëlakë mu liyaangë li mbaasu. Liyaangë be lyooli lufwa lumwaali.

¹⁵ Wosuku wukaambu lizinë lyaandi bësonikë mu libuuku li luziingu, wulaku mu liyaangë li mbaasu.