Luzabukunu 19 - N’KANGULU WUMOONË

¹ Fë mbusë lyalyooli, miinu yisë kuwu mbeembu nkamu ku yilu, dedë mweekë nkoongë baatu, yisë tubë : « Aleluya! Dumisyaanu Fumu! Luvukulu, bumpumu i luleendo luke ke Nzaambiitu! »

² Tufundusu twaandi tucyelikë i tusulëmë! Cibilë naandi waseembë n'cyeetu nduumbë wulëpuutaangë baatu bë n'toto mu cinduumbë cyaandi. Naandi wuvutulë fuutë mu lufwa lu biseelu byaandi.

³ Baawu bisë tubooso : « Aleluya! Dumisyaanu Fumu! Mwiisi wu livulë linenë lilakëtë wum'makë sakë yi sakë! »

⁴ Mëkumë-mwaali mëkakëtë më na i baatu lumoonyi bë na bisë fukumë i bisë kuundë Nzaambi, wunë wuvwaandë fë ntaanji i bisë tubë « Ameenë! Aleluya! Dumisyaanu Fumu! »

Cikaanvu ci mëkweelë ci Mwaanë Limemë

⁵ Mbeembu yisë kuwukunu fë ntaanji. Yaawu yilë tubaangë : « Dumisyaanu Nzaambiitu, beeno booso biseelu byaandi, beeno lulë mu kum'bakë sisu, bëkuluutu i bibabanë! »

⁶ Miinu yisë kuwu mbeembu yifwanëkënë yi nkoongë baatu. Yaawu yilë tendukaangë buke cikwilili ci masi, buke biduminë binenë bi civelë. Tala linë litubu : « Aleluya! Dumisyaanu Fumu! Cibilë Fumu, Nzaambiitu n'kwa-luleendo watuunvi cifumu cyaandi!

⁷ Twe saangilaanu i twe baanu mu nyeenzi, tun'vutulilaanu bumpumu! Cibilë ntaangu cikaanvu ci Mwaanë Limemë yakutukë i n'kamaandi wabelëminë.

⁸ Bën'vaanë n'vwaatu wuvangununu mu n'lelë wu linë, wumanikë i wulyoomë. » (N'lelë wu linë wun'leesi mëvaangë mësulëmë më mboongu Nzaambi.)

⁹ Yaanzi wusë kun'kaambë : « Sonikë : Nyeenzi ke banë bëtelu ku cikaanvu ci mëkweelë më Mwaanë Limemë. » Wusë be tubooso : « Mamoomë mëbuungu mëcyelikë më Nzaambi. »

¹⁰ Miinu yisë fukumë mu maalu maandi mu kun'kuundë kasi naandi wusë kun'kaambë : « Keelë njeeyi wulëlivaangë! Miinu ciseelu, buke njeeyi i buke banë yiitu bë nguli bësulëmë mu bucyelikë buzabukunu mu Yeesu. Mati Nzaambi na njeeyi wufwenikini kukuundë! » Bucyelikë buzabukunu mu Yeesu, tala linë lin'tubë mibici.

Muutu wumakë fë yilu kuvaalu ku mpeembi.

¹¹ Miinu yisë monë li yilu lizibukë i kuvaalu ku mpeembi kubasikë. Wunë wukandëmë fë yilwaandi lizinë lyaandi « Wusulëmë i cyelikë ». Naandi wun'fundisyaangë i wun'nwaanaangë yi bucyelikë.

¹² Meeso maandi mëlëlesikaangë buke mbaasu i naandi wabë yi mpaapë sintaatë fë yilu n'tu. Naandi wabë yi lizinë bësonikë yi naveekë to wulizabisi.

¹³ Naandi wabë wuvwaatë ciyuungë ciwaalë meengë. Lizinë lyaandi : « Libuungu li Nzaambi. »

¹⁴ Mësodaadi mëyilu mëlë ke n'laandaangë, baawu babë fë yilu kuvaalu ku mpeembi i bëvwaatë n'lelë wu linë, wu mpeembi i wulyoomë.

¹⁵ Mu munwaandi mëlëbasikaangë cisabë cilwaalë ci kubulilë mëloongo. Naandi mba wubëtumi mu lutumu lu ngolo i wu nkamë mëkuundi më viinyi mu cinyikunu ci mwaangu Nzaambi n'kwa luleendo.

¹⁶ Fë yilu cinkutu cyaandi i fë kuulu kwaandi bësonikë lizinë ali : « N'tinu mitinu i Fumu sifumu. »

¹⁷ Miinu yisë monë yaanzi wutelëmë mu muunyi. Naandi wusë losukë yi mëngolo ke sinuni syooso silë dumukaangë ku yilu : « Yisaanu, dukënaanu mu cikaanvu ci Nzaambi!

¹⁸ Yikwambulaanu n'sunyi mitinu, bëkuluutu bë mësodaadi i mësodaadi, n'sunyi kuvaalu i binatë kuvaalu, n'sunyi baatu booso, bësyalulu keti bëndongo, bëkuluutu kaambofo bibabanë. »

¹⁹ Miinu yisë monë cibulu, mitinu yi n'toto i nkoongë mësodaadi maawu, bëdukënë mu kunwanisi wunë wukandëmë fë kuvaalu i nkoongë mësodaadi maandi.

²⁰ Bësiimbë cibulu yi m'bici lupuutu wunë wulëvaangaangë bimaaku fë ntwaalaandi mu kuzimbisi banë bëbakë litonë li cibulu i banë bëlëkuundaangë nkosyaandi. Bëbumë yi moonyi mu liyaangë li sufëlë yi mbaasu, cibulu i m'bici lupuutu.

²¹ Mësodaadi maawu mooso bëbëvoondaangë mu cisabë cilëbasikaangë mu munu wu muutu wabë fë yilu kuvaalu i sinuni syooso sisë lya n'sunyaawu.