Luzabukunu 18 - N’KANGULU WUMOONË

Lulaluku lu Babiloonë

¹ Fë mbusë lyalyooli, miinu yisë monë yaanzi yin'ka yikulumukë fë n'toto. Naandi wabë yi lutumu lunenë i kusamë kwaandi kulëvaanaangë cyeseesë fë n'toto wooso.

² Wulosukë yi mëngolo mooso : « Lyaawu lyalalukë! Lyaawu lyalalukë! Babiloonë linenë! Buyifanwabu, faawu feekë cikalulu ci simpeefu simbi. Ciswamunu ci yosuku mpilë biluunzi bibi. Faawu fë n'zingilaangë sinuni si yosuku mpilë i bibulu bikaambu kulyoomë i bibi.

³ Mëloongo mooso bënwa viinyi yi likaanzi li bunduumbë bwaandi. Mitinu yi n'toto bëyivaanë mu bunduumbë yimunë naandi i bangë lungooso lu n'toto bisë bakë businë mu binë byabë yaandi bikaambu mëzongulu. »

⁴ Miinu yisë kuwu mbeembu yin'ka yifuminë ku yilu i tubë : « Basikaanu fë meeyaawu beeno mboongwaami, bwiinji luleembu kubwa mu mësumu maandi i mu kumaangë kubakë yimunë naandi bivuungë bikum'bwiilë.

⁵ Cibilë mësumu maandi mawaalë tee ku yilu i Nzaambi sye zimbëkënë ko sinsalulu syaandi simbi.

⁶ N'siilaanu bo naandi kulësiilaangë bëmesë, n'vutulilaanu vyaasi wali linë kuvaangë. Waasyaanu vyaasi wali mbuungwaandi mu mëlafu mëngolo mo naandi kun'wiikë bëmesë.

⁷ N'vaanjyaanu beenë simpasi i mënyonyi bo kwayituunvi mu bumpumu i bunenë. Naandi wuyitubilë naveekë: “Miinu yin'vwaandë afë dedë mweekë n'kamë wu fumu, yikeeli n'fwiili ko i sasabi yisë n'zaabë cifwiili ko.”

⁸ Tala buni bivuungë binë bën'swekilë bim'bwa mu naandi mu cilumbu cimweekë : ncyeenzu lufwa, cifwiili i nzalë, naandi wun'fuukë mu mbaasu. Cibilë Fumu Nzaambi wo wan'fundisi wuke yi luleendo. »

⁹ Mitinu yi n'toto, yinë yivakulu yimunë naandi mu bunduumbë i mu businë, mba bën'lilë i mba bëkwaayi mu cibilë cyaandi, bunë baawu bëm'monë mwiisi livulë balakisi.

¹⁰ Baawu bën'kwakënë cinaanu, mu boomë bu liseembu lyaandi, i baawu bën'tubë : « Mënyonyi! A mënyonyi! A Babiloonë, livulë linenë like luleendo! Zoolë mweekë too yafwaanë bwiinji wubakë lutabu. »

¹¹ Bangë tungooso tu n'toto bëlë mu kulilë yivaandi i bëlë mu kwaambë, cibilë muutu ve wulë be suumbë biimë byaawu :

¹² woolë, palaatë, mëmanyi më bukaalu i misaangë. Mileli yi linë, mileli yi bukaalu yi beengë, miti yi mpilë ku mpilë, yi biimë bimesi bi mpuunji, miti yi bukaalu, boloonzë, butali i mëmanyi mëboti.

¹³ Kaneelë i mëkayi mëmesi mëke fiimbu, yaafë, miilë, n'liinji, viinyi, mëfutë, fuunji yi looso, singoombi i mëmemë, sikuvaalu i binatunu, bëndongo i tuziingu tu baatu.

¹⁴ « Aa! Bëlëtubë, biimë byooso wulëzolaangë byazimbilë ku n'zwaaku, businë bwaaku booso i bunenë bwaaku byakuzimbilë i wusë kube bibakooso ko! »

¹⁵ Bangë tungooso banë bëbakë businë mu livulë be lyoolyo, bën'telëmë cinaanu mu boomë bu liseembu lyaandi. Baawu bën'lilë i bën'kwaayi.

¹⁶ Baawu bën'tubë : « Mënyonyi, a mënyonyi mu livulë linenë! Lyaawu lyabë livwaatë n'leli wu linë, n'leli wu noofi wu beengë, yaawu yabë yivwaatë simpaangë si woolë, mëmanyi më bukaalu i misaangë.

¹⁷ Zoolë mweekë tokë yifwaanë businë booso bulalukë! » Binatë mëkuumbi më masi i bo babë mu kati, mësodaadi i bakë booso bëm'bakilaangë luziingu mu m'bu, bëtelëmë cinaanu.

¹⁸ Baawu bëlosukë, bunë bëmonë mwiisi wu livulë lilakëtë : « Faawu fësye ba livulë livyokilili bunenë ko i lyaliili! »

¹⁹ Baawu bisë lakë mëbuufu fë yilu n'tu, baawu bëlëlilaangë, bëlëkwaambaangë i bëlëlosukaangë : « Mënyonyi! A mënyonyi mu livulë linenë! Mati mu businë bwaandi mwaawu bakë booso bëke yi mëkuumbi mu m'bu bëm'bakilaangë businë. Zoolë mweekë too yafwaanë bwiinji byakë byooso bizimbilë! »

²⁰ We ba mu nyeenzi mu lutyamukunu lwaandi, li yilu! Lwe baanu mu nyeenzi mboongu Nzaambi, mimbunzi i mibici! Cibilë Nzaambi wan'fundisi mu libi linë kwaluvaangë!

²¹ Mu lyaawu, yaanzi luleendo wusë boongë limanyi lifwanëkënë yi cinyikunu ci looso i bëlibumë mu m'bu mu kutubë : mati boobo livulë li Babiloonë lim'bwa yi mëngolo, sasabi i bisë be limonë ko.

²² Sasabi kusë bëbëkuwu ko ke njeeyi duungu bisikulu i biyosi, bisici yi mpyeepi i yi mbudi. Bisë bëbe monooso ko wun'viipë mu cisasi. Bisë be kuwooso ko ncyeembi yi cinyikunu ci looso.

²³ Cyeseesë ci mwiindë cisë be lesikooso ko ku n'zwaaku, bisë be kuwooso ko mbeembu banë bakweelë vandi. Bangë tungooso twaaku babë bëvyokilë luvalu mu buloongo, i mu mëvaangë maaku më simpaandu wanatë baatu booso mu nzilë yimbi.

²⁴ Mati ku Babiloonë kwaawu kudukuku meengë mibici i mboongu Nzaambi, meengë mu bakë booso banë bëvoondu fë n'toto.