Luzabukunu 17 - N’KANGULU WUMOONË

Nduumbë yinenë

¹ Mu lyaawu, wumweekë mu lisaambwali li siyaanzi wulësiimbaangë lisaambwali li simbuungu wuyikun'kaambë : « Yisë i yikuleesi lutabu lunë lum'bwiilë nduumbë yinenë, livulë linenë lituungu mu ndaambu miilë yi mpaapë.

² Mitinu yi n'toto bëyivandikë mu buduumbë yimunë naandi i basë n'toto bëkolu viinyi yi buduumbë bwaandi. »

³ Ciluunzi cisë kum'pwaatë i yaanzi wusë kun'natë ku ntaandu ciyumi. Miinu yisë kumonë faawu n'cyeetu wabë wukalë fë yilu cibulu ci beengë cyabë ciwaalë mëzinë më bifiingu mu Nzaambi. Cibulu be cyooci cyabë saambwali li mitu i kuumi li mësici.

⁴ N'cyeetu wabë wuvwaatë binkutu bi miinji bibeengë i naandi wabë wuvwaatë simpaangë si woolë, mëmanyi më bukaalu i misaangë. Naandi wusiimbë fë likaandë li kooko mbuungu yi woolë yiwaalë mëbi më suusi mëfuminë mu bunduumbë bwaandi.

⁵ Fë mbuunzwaandi fabë bësonikë lizinë li mësweeci : « Babiloonë linenë, mamë bëcyeetu bënduumbë i mëvaangë mëbi mu buloongo. »

⁶ Miinu yisë monë n'cyeetu be woowo wabë wukolu meengë më mboongu Nzaambi, mu meengë më banë bëvoondu mu cibilë ci lufyaatu lwaawu mu Yeesu. Bunë yam'moni, miinu yisë kutulumukë.

⁷ Mu lyaawu yaanzi wusë kun'kaambë : « Cibilë-mbici njeeyi watulumukë? Miinu yikuzabikini mësweeci më n'cyeetu i më cibulu cike n'nataangë, wunë wuke lisaambwali li mitu i kuumi li mësici.

⁸ Cibulu wamonë, ocyo cyabë ntaangu ntamë cimoonyi kasi cicili moonyi ko. Cyaawu cifwenikini kubasikë ku libulu li mbaasu, mu kweendë mu lunyambukunu. Baatu bë n'toto, banë bëkaambusu mëzinë mësonëmë kutatikilë fë ntonunu buloongo mu libuuku li luziingu, bën'tulumukë fanë bum'mweenë cibulu : cyelikë, ntaangu ntamë cyaawu cyabë moonyi, kasi cisyeeli ko i cyaawu cin'vutukooso. »

⁹ « Afë, bufwenikini mëlyeelë i bungelë. Lisaambwali li mitu like saambwali li myoongo, fanë n'cyeetu kukalë, lwaawu yivaandi saambwali li mitinu :

¹⁰ bëtaanu mu baawu babwa, buyifanwabu wumweekë wulë mu kutumi i wu saambwali wubuunooso kwiisë. Bunë naandi kun'kwisë, wun'ziingë mwa ntaangu kwaandi to.

¹¹ Cibulu cyabë moonyi mu ntaangu ntamë cisyeelyooso moonyi ko, cyaawu n'tinu wu naanë, yivaandi wumweekë mu lisaambwali wulë mu n'kwendë mu lunyambukunu lwaandi. »

¹² « Likuumi li mësici wamonë maawu likuumi li mitinu banë bëbuunu kutumi. Kasi baawu bëm'bakë lutumu lukutuminë zoolë mweekë to yimunë cibulu.

¹³ Likuumi lyooso likeeli mbalulu mweekë : bën'tuulë luleendo i lutumu lwaawu mu kusalilë cibulu.

¹⁴ Baawu bën'nwanisi Mwaanë Limemë, kasi Mwaanë Limemë wun'luungë, cibilë naandi Fumu sifumu i N'tinu mitinu. Naandi wubëluungë yimunë banë kwatelë i kwasoolë, bëfyaatë mu naandi. »

¹⁵ Yaanzi yisë be kun'kaambë : « Miilë yo wamonë, fanë fëtelëmë n'cyeetu nduumbë yaawu mëkaandë më baatu, sinkoongë, mëloongo i simbeembu.

¹⁶ Likuumi li mësici mo wamonë i cibulu mba bën'leendë n'cyeetu nduumbë : baawu bëkum'botulë byakë byooso bike yaandi, bëkum'biikë mpenë, baawu bën'lya n'sunyaandi i bën'kookë binë bin'syaalë ku mbaasu.

¹⁷ Cibilë Nzaambi watuulë mu mitimaawu n'vwiilu wukusalilë mbalulwaandi. Baawu bën'salilë mbuku mweekë mu kutuulë lutumu lu lwaangu lwaawu mu kusalilë cibulu, tee yi fanë mëbuungu më Nzaambi mën'vangëninë. »

¹⁸ « N'cyeetu wamonë owo, mati livulë linë lin'tumi mitinu yi n'toto. »