Luzabukunu 16 - N’KANGULU WUMOONË

Simbuungu si mwaangu Nzaambi

¹ Miinu yisë kuwu mbeembu nkamu yifuminë ku n'zo-Nzaambi i yilëtubaangë ke lisaambwali li siyaanzi : « Ye dukulaanu fë n'toto lisaambwali li simbuungu si mwaangu Nzaambi! »

² Yaanzi yin'tetë yisë kweendë i wudukulë mbuungwaandi fë n'toto. Bwa boobo simbeenzë simbi i si myangelë sim'monikë mu baatu babë ciliimbu ci cibulu i bëlëkuundaangë nkosi.

³ Yaanzi yimwaali yisë dukulë mbuungwaandi mu m'bu. Masi misë balukë buke meengë më muutu wufwa i baatu lumoonyi booso babë mu m'bu bisë fwa.

⁴ Yaanzi yin'tatu yisë dukulë mbuungwaandi mu miilë i mu sinto-masi, sibalukë meengë.

⁵ Miinu yisë kuwu yaanzi yinë yabë lutumu mu masi kutubë : « Njeeyi Cisemi, wuli i wabë, njeeyi wuyileesi nzoonzi yisulëmë.

⁶ Licyelikë baatu badukulë meengë më banë wubakisi i mu mibici i buyifanwabu njeeyi wabëvaanë meengë mu kunwa. Baawu babakë n'seendu mu mëvaangë maawu. »

⁷ Miinu yisë kuwu mbeembu yilëfuminaangë fë civakululu i yitubë : « Cibeeni, a Fumu Nzaambi n'kwa-luleendo, tufundusu twaaku tucyelikë i tusulëmë! »

⁸ Yaanzi yi na yisë dukulë mbuungwaandi fë muunyi, mu lyaawu wusë bëvaanë n'swa mu kulakisi baatu mu libabëlë li mbaasu.

⁹ Baatu bëlakëtë mu libabëlë li mbaasu li kwaatë-yekë. Baawu bisë fiingë lizinë li Nzaambi wunë wun'siimbaangë bivuungë be byoobi mu lutumu lwaandi, kasi baawu bëmaangë kubalulë mëvaangë mu kun'vaanë bumpumu.

¹⁰ Yaanzi yin'taanu yisë dukulë mbuungwaandi fë yilu ntaanji cibulu i lwaangu lwaandi lusë kalilë mu citoombi. Baatu bisë tebilë ndakë mu myangelë.

¹¹ Baawu bisë fiingë Nzaambi yilu mu cibilë ci myangelë i simbeenzë syaawu. Kasi baawu bësye biikë ko mëvaangë maawu mëbi.

¹² Yaanzi yin'samunu yisë dukulë mbuungwaandi mu mwiilë wunenë, wu Efalaatë. Mwiilë wuyumë mu kuzibulë nzilë ke mikwa-lwaangu yifuminë ku mëbasikulu më ntaangu.

¹³ Miinu yisë monë biluunzi bi tatu bibi, dedë mweekë bisotë, bilëbasikaangë mu munu nyokë cinganzikë, mu munu cibulu i mu munu m'bici lupuutu.

¹⁴ Byaawu biluunzi bi dyaabu bin'vaangaangë bimaaku. Baawu bën'kwendaangë ke mikwa-lwaangu yooso yi n'toto, bwiinji bëbëkucikë mu cincindu mu cilumbu cinenë ci Nzaambi n'kwa-luleendo.

¹⁵ « Yuwu, buni bun'tubilë Fumu, miinu yin'kwisë buke mwiifi! Nyeenzi ke wunë wuzungululë i wum'belikilë binkutu byaandi, mu kumaangë naandi kuzungunë mpenë i kumonë sonyi fë ntwaalë baatu. »

¹⁶ Biluunzi bikucikë mikwa-lwaangu fanë bën'telaangë ku Siyebelee Alëmagedoonë.

¹⁷ Yaanzi yi saambwali yisë dukulë mbuungwaandi mu mpeemu. Mbeembu nkamu yisë kuwukunu mu n'zo-Nzaambi. Yaawu yilëfuminaangë fë ntaanji i yilëtubaangë: « Lya vangënë! »

¹⁸ Fabë tusyeemu, simbeembu, bivelë i lututumuku lunenë lu n'toto. Waawu wuvyokilë beenë bubaalu, tumweeni vyaasi ko lututumukunu lu n'toto lu mpilë oyo kutatikilë luvangununu lu muutu fë moongo butoto.

¹⁹ Livulë linenë likabukë mu bitini bi tatu i mëvulë më si syooso mëtyamukë. Nzaambi sye zimbëkënë kuve livulë linenë li Babiloonë. Naandi wusë linwiikë viinyi mu mbuungwaandi, viinyi i likaanzi lyaandi linenë.

²⁰ Bitumbu byooso bisë zimbilë i bisye bëmonë myoongo ko.

²¹ N'vulë mëmanyi yinenë yifuminë ku yilu yisë bwa mu baatu. Baatu bisë fiingë Nzaambi mu cibilë ci civuungë ci n'vulë mëmanyi, cibilë cyabë civuungë ci kwaatë-yekë.