Luzabukunu 15 - N’KANGULU WUMOONË

Siyaanzi i bivuungë bi siitu

¹ Miinu yisë monë ku yilu ciliimbu cin'ka cinenë i ci kwaatë-yekë: saambwali liyaanji sisiimbë saambwali li bivuungë. Byaawu bivuungë bi siitu, cibilë byaawu mwaangu wu siitu wu Nzaambi.

² Miinu yisë monë buke m'bu bibeengë, wubundënë yi mbaasu. Bakë booso banë bëluungë livitë mu cibulu, mu nkosyaandi i mu lutaangu lufwanëkënë yi lizinë lyaandi, babë bëtelëmë fë yilu m'bu be woowo wu bibeengë. Baawu babë mu myookwaawu bisikulu binë Nzaambi wubëvaanë.

³ Baawu bëlëyolaangë luumbu lu Moyiizë, ciseelu ci Nzaambi i luumbu lu Mwaanë Limemë : « Fumu Nzaambi luleendo, bisalu byaaku binenë i biboti! Fumu buloongo, sinzilë syaaku sisulëmë i cyelikë!

⁴ Naani wum'podi kumaangë kukubakë sisu, a Fumu? Nani wumaangë kukuvaanë bumpumu? Cibilë njeeyi tokë saantu, mëloongo mooso mën'kwisë mu kukukuundë, cibilë mëvaangë maaku mësulëmë mabëmonikënë fë ciyalëlë. »

⁵ Fë mbusë lyalyooli, miinu yisë monë luzibukulu lu n'zo-Nzaambi ku yilu, yimunë cinzwananë ci N'kangulu wu Nzaambi.

⁶ Lisaambwali li siyaanzi silësiimbaangë lisaambwali li bivuungë bisë basikë ku n'zo-Nzaambi, baawu babë bëvwaatë n'leli linë wu mpeembi wulëlesikaangë i bëvwaatë mëkaanji mu woolë mu lucyeto.

⁷ Wumweekë mu bivaanji bi moonyi bi na, wuvaanë ke li saambwali li siyaanzi, saambwali li simbuungu siwoolë siwaalë mwaangu Nzaambi wun'zingilë ntaangu syooso.

⁸ n'zo-Nzaambi yi waalë mwiisi, ciliimbu ci bumpumu i luleendo lu Nzaambi. Ntetë li saambwali bivuungë bitwaalë siyaanzi kumanë, muutu ve wukotë mu n'zo-Nzaambi.