Luzabukunu 14 - N’KANGULU WUMOONË

Luumbu lu bo bëvuukë.

¹ Miinu yilëtalaangooso : yisë monë Mwaanë Limemë wabë fë moongo Siyoonë i cintwaali yi naandi nkamë yi mëkumë-na më biveefi bi baatu banë babë lizinë lyaandi i lizinë li Tataandi bësonikë fë mbuunzu.

² Miinu yisë kuwu mbeembu yilëfuminaangë ku yilu i yilëkuwukunaangë buke cikwilili ci masi, buke ciduminë cinenë ci civelë. Mbeembu yo miinu yiyuwu yilëfwanëkënaangë buke ncyeembi bisikulu bunë baawu bë n'sikë bisikulu byaawu.

³ Biveefi-biveefi bi baatu bilëyolaangë luumbu lumoonë fë ntwaalë ntaanji, fë ntwaalë bivaanji bi na bi moonyi i mëkakëtë. Muutu ve wulëpodi kusinu luumbu be loolo kanuku, nkamë li mëkumë-na më biveefi banë Nzaambi kuvuuci fë n'toto.

⁴ Baawu obo bësye vaalë ko yimunë bëcyeetu, bësye sumukë ko. Baawu bën'laandaangë Mwaanë Limemë fosuku kulëkwendë. Baawu bëbëvuuci fë meeyi baatu lumoonyi, mu kwindulë ntetë ke Nzaambi i ke Mwaanë Limemë.

⁵ Sasabi mu munwaawu musye m'basikaangë lupuutu ko. Baawu mpeembi yi mpeeso.

Siyaanzi si tatu

⁶ Miinu yisë monë yaanzi yin'ka yinë yilëdumukaangë ku kati ku yilu, naandi wabë yi Mpolu Mboti yi sakë yi sakë yikukaambë ke banë bëlëzingilaangë fë n'toto, ke baatu bë sisi syakë syooso, bifuumbë byooso, simbeembu syooso i mëkaandë mooso.

⁷ Naandi wulëtubaangë mu mbeembu nkamu : « Cinzikaanu Nzaambi i n'dumisyaanu! Cibilë ntaangu yafwaanë yo kun'fundisi buloongo. N'kuundaanu wunë wuvaangë li yilu, n'toto, m'bu i sinto-masi. »

⁸ Yaanzi yimwaali yisë laandë yin'tetë yisë tubë : « Lyaawu lyabwa, lyaawu lyabwa livulë linenë li Babiloonë! Lyaawu lyanwiikë mëloongo mooso viinyi yi likaanzi cinduumbë cyaandi! »

⁹ Yaanzi yin'tatu yilaandë siyaanzi siwali si ntetë, wusë tubë mu mbeembu nkamu : « Wosuku muutu wun'kuundë cibulu i nkosyaandi i bunë kum'bakë litonë fë mbuunzu kaambofo fë likaandë li kooko,

¹⁰ wun'nwa naveekë viinyi yi likaanzi li Nzaambi, bun'sekulilë linë likaambu nkekinyi mu mbuungu likaanzi lyaandi! Baawu bëm'ba mu kwaatë-bamë fë mbaasu i suuflë fë ntwaalë siyaanzi si saantu i fë ntwaalë Mwaanë Limemë.

¹¹ Mwiisi mbaasu simpasi syaawu si mivu yi mivu wusë m'maanë ko. Baawu bisë m'bakë luvundulu ko, bwiilu i muunyi, banë bën'kuundë cibulu i nkosyaandi i wosuku wum'bakë ciliimbu ci lizinë lyaandi. »

¹² Tala buni baawu bëfwenikini kuba yi mpungë-moonyi banë bëke mu Nzaambi, banë bën'cinzikaangë tutumu i ciminu mu Yeesu.

¹³ Miinu yisë kuwu mbeembu yifuminë ku yilu yisë tubë : « Sonikë mëbuungu be maamë : “Nyeenzi ke banë buyifanwabu bën'fwiilë mu cisalu ci Fumu!” — “Cibeeni, nyeenzi mu baawu, bun'tubilë Ciluunzi. Baawu bëm'bakë luvundulu mu bisalu bingolo basalë, cibilë liboti linë baawu bëvangisi li bëlaandë!” »

Kukunë i kukucikë mëkuundi fë n'toto.

¹⁴ Miinu yilëtalaangooso i yisë monë livweeti li mpeembi, fë yilu livweeti be lyooli fabë fë kalë cifwaani cyabë buke muutu. Fë n'twaandi fabë ntaatë yi woolë i fë kooko fabë n'kwati wulwaalë.

¹⁵ Yaanzi yin'ka yisë basikë ku n'zo-Nzaambi i wusë losukë yimunë mbeembu nkamu ke wunë wabë wukalë fë yilu livweeti : « Boongë n'kwatyaaku i kucikë, cibilë ntaangu yafwaanë mu lyalyooli: mëkuundi mooso mën'toto makweelë mu kuveelë! »

¹⁶ Wunë wabë wukalë fë yilu livweeti wusë vyoosi n'kwatyaandi fë n'toto i n'toto wusë vaanë mëkuundi.

¹⁷ Yaanzi yin'ka yisë basikë mu n'zo-Nzaambi yi yilu, naandi wabë yivaandi yi n'kwati wulwaalë.

¹⁸ Yaanzi yin'kooso, wuke yi lutumu mu mbaasu, wusë basikë fë civakululu. Naandi wulosukë yi nkamu ke wunë wabë yi n'kwati wulwaalë : « Boongë n'kwatyaaku i cyeelë bikoombu bi mëkuundi më viinyi më n'toto : mëkuundi makweelë. »

¹⁹ Yaanzi wusë vyoosi n'kwati fë n'toto, wucyelë bikoombu bi mëkuundi më viinyi i wusë buumë mu cinyikunu cinenë ci likaanzi li Nzaambi.

²⁰ Bisë nikë mëkuundi mu cinyikunu ciyakënë cinaanu yi livulë, mu cicyenzulu mu basikë bikakë bi meengë bimakë fë munu kuvaalu i sinyambë tee fë civeefi nkamë samunu si mitakë.