Luzabukunu 13 - N’KANGULU WUMOONË

Bibulu bi byooli

¹ Miinu yisë monë cibulu cibasikë mu m'bu. Naandi wabë kuumi li mësici i saambwali li mitu. Naandi wabë wuvwaatë ntaatë mu kadë lisici i mëzinë më bifiingu mu Nzaambi bësonikë mu mitu.

² Cibulu cyo miinu yimonë cyabë buke n'koomu, maalu maandi mabë buke maalu më wulësë i munwaandi buke munu wu n'kosi. Nyokë cinganzikë wusë n'vaanë luleendo, ntaanji i lutumu lunenë.

³ Wumweekë mu mitu cibulu wabë buke wulwaalë lubumë lufitë n'natë ku lufwa, kasi lubumë lu lufwa lusë belukë. N'toto wakë wooso wabë mu liyaanji i wusë laandë cibulu.

⁴ Mboongu yooso yisë ba mu kukuundë nyokë cinganzikë, cibilë naandi wuvaanë lutumu ke cibulu. Bakë booso bisë kuundë yivaandi cibulu, mu kutubë : « Nani wufwaanë yi cibulu? Nani wum'podi kun'nwanisye? »

⁵ Cibulu cibakë n'swa mu kutubë mëbuungu më lunaangu i më bifiingu mu Nzaambi. Naandi wubakë lutumu mu kumësalilë fë mëkumë-na ngoondi wali.

⁶ Cyaawu cisë tubë mëbi mu Nzaambi, ke safulaangë lizinë lyaandi i fanë kun'zingilaangë i bakë booso bën'kalilaangë ku yilu.

⁷ Cyaawu cisë bakë n'swa mu kunwanisi mboongu Nzaambi i kuyiluungë. Naandi wubakë lutumu mu mëkaandë mooso, mboongu yooso, simbeembu syooso i buloongo booso.

⁸ Baatu booso bë n'toto bëkun'kuundë, bakë booso bo lizinë likaambu kusonëmë, fanë ntonunu buloongo, mu libuuku li luziingu linë like Mwaanë Limemë bëvoondë.

⁹ « Yuwaano buboti, ningë ti beeno luke yi matu më kuwulu!

¹⁰ Wunë bëtangunë mu kuba mu buloko, ee mweeni, naandi wun'kwendë mu buloko, wunë bëtangunë mu kufwiilë mu cisabë, ee mweeni, wun'fwiilë mu cisabë. Mu bwaawu, mboongo Nzaambi yifwenikini kuba yi mpungë-moonyi i ciminu. »

¹¹ Miinu yisë monë cibulu cin'ka. Cyaawu cibasikë kusi n'toto. Cyaawu cyabë yi mësici mwaali dedë mweekë mësici më Mwaanë Limemë i wulëtubaangë buke nyokë cinganzikë.

¹² Wulësalilaangë lutumu looso lu cibulu cin'tetë fë ntwaalaandi. Naandi wutumisi n'toto i baatu booso mu kukuundë cibulu cin'tetë cinë lubumë lu lufwa lwabë lubelukë.

¹³ Cibulu be cyoocyo cimwaali cilëvaangaangë bimaaku binenë, cilëkululaangë mbaasu yi yilu fë n'toto fë meeso më baatu booso.

¹⁴ Cyaawu cilëpuutaangë baatu bë n'toto mu bimaaku binë kulëvaangaangë fë ntwaalë cibulu cin'tetë. Cyaawu cilëbëkacikaangë mu kuvalë nkosi mu luciinzu lu cibulu cinë cilwaalë mu cisabë, civutukë mu luziingu.

¹⁵ Cibulu cimwaali cisë bakë lutumu lu kusakaangë nkosi yi cibulu cin'tetë, bwiinji nkosi be yooyo yitubë i voondë bakë booso banë bën'kaambu kun'kuundë.

¹⁶ Cibulu cilëkacikaangë baatu booso, bibabanë i bëkuluutu, bisinë i biyeembi, bëndongo i bësyalulu mu kucyemunë litonë fë likaandë li kooko ku mëbakëlë i fë mbuunzu.

¹⁷ Muutu ve wulëpodi kusuumbë kaambofo kusumbisi yivaandi ningë naandi wusye ba yi litonë be lyooli ko, dedë ti lizinë li cibulu kaambofo lutaangu lufwanëkënë yi lizinë be lyooli.

¹⁸ Afë, fë fwenikini bungelë. Wunë wuke lyeelë kupodi kuzaabë suundu lutaangu lu cibulu, cibilë lutaangu be loolo lufwanëkënë yi lizinë li muutu. Lutaangu beenë luke nkamë-samunu mëkumë-samunu yi samunu.