Luzabukunu 12 - N’KANGULU WUMOONË

N'cyeetu i nyokë cinganzikë

¹ Ciliimbu cinenë cimonikë ku yilu : n'cyeetu wuzuku mu muunyi, wabë yi ngoondi kusi maalu i ntaatë yi kuumi mbotë wali fë mbatë n'tu.

² Naandi wabë wubindëmë i simpasi si misoongo silë n'vangisi kulosukë.

³ Ciliimbu cin'ka cimonikë ku yilu : nyokë cinganzikë yibeengë yabë yi saambwali li mitu i kuumi li mësici i ntaatë mu kadë n'tu.

⁴ Mu n'cyelaandi, naandi wusë kubë ndaambu yi mweekë yi taanu yi simbotë si yilu i wusë sibuumë fë n'toto. Naandi wutelëmë fë ntwaalë n'cyeetu wulëbutë bwiinji kulya mwaanë fanë kum'butu.

⁵ N'cyeetu wusë butë mwaanë wu bakëlë, naandi wun'tumi mëloongo makë mooso mu lutumu lu ngolo. Bisë sundilë kunatë mwaanë ke Nzaambi yi fë ntaanjyaandi.

⁶ Kasi n'cyeetu, wutiinë ku ntaandu ciyumi kunë Nzaambi wabë wum'belikilë ciikë, bwiinji bën'likilë fë civeefi nkamë-wali yi mëkumë-samunu më bilumbu.

⁷ Mu lyaawu, cicindu cisë tudukë ku yilu. Miseelë i siyaanzi syaandi bisë nwanisi nyokë cinganzikë i naandi wusë nwaanë yaandi yimunë siyaanzi syaandi.

⁸ Kasi nyokë cinganzikë yisë votu, naveekë i siyaanzi syaandi bësye be bakë ciikë ko ci kukalilë ku yilu.

⁹ Nyokë cinganzikë wusë yilakë ku ngaandë. Mati naandi na nyokë yi ntamë, bën'teelë dyaabu kaambofo Satënë, wum'puutaangë buloongo booso. Bën'lakë fë n'toto, yimunë siyaanzi syaandi.

¹⁰ Miinu yisë kuwu mbeembu nkamu ku yilu, yilëtubë : « Buyifanwabu ntaangu luvukulu yakutuukë! Buyifanwabu Nzaambiitu waleesi luleendo lwaandi i lwaangu lwaandi! Buyifanwabu lutumu lweekë mu myooko yi Kliistwaandi. Cibilë naandi wubumë cinaanu yi li yilu cifundisi ci baanë yiitu bë nguli i naandi na wulëbëfundisyaangë muunyi yi bwiilu fë ntwaalë Nzaambiitu.

¹¹ Baanë yiitu bë nguli bëbakë nduunji mu naandi mu cyeesi ci meengë ci Mwaanë Limemë i libuungu linë baawu bëteelë cimbaanji. Baawu bësye kwakini ko luziingu lwaawu, baawu bëbelëminë mu kufwa.

¹² Mati mu bwaawu, lwe yangëlëlaanu, mëyilu i beeno lun'kalilaangë mwaawu! Kasi mpilë mbi mënyonyi ke beeno, n'toto i m'bu! Dyaabu wakulumukë ke beeno, yi likaanzi lyooso, cibilë naandi zabisi ti mwa ntaangu yasyaalë yin'ciici. »

¹³ Bunë nyokë cinganzikë yisë zaabë ti bën'lakë fë n'toto, naandi wusë ba mu kukukë n'cyeetu wubutë mwaanë wubakëlë.

¹⁴ Kasi n'cyeetu wusë bakë mëvafë mwaali më ngwa-nuni mu kuvumukinë tee fanë bëbelikilë mu naandi ku ntaandu ciyumi, bwiinji bën'likilë fë mivu tatu yi ndaambu, mu kuswaamë nyokë cinganzikë.

¹⁵ Oboobo nyokë wusë luukë masi mooso mëfwanëkënë yi mwiilë fë mbusë n'cyeetu, bwiinji mëyo mën'vekumunë.

¹⁶ Kasi n'toto wuvuuci n'cyeetu, n'toto wusë zibulë munu i wuminë masi mooso nyokë cinganzikë kulukë.

¹⁷ Mu likaanzi mu n'cyeetu, nyokë cinganzikë yisë nwanisi banë bësyaalë fë likaandë li n'cyeetu, banë bëvitikë tutumu tu Nzaambi i bësulëmë mu bucyelikë buzabukunu ke Yeesu.

¹⁸ Nyokë cinganzikë wusë ke telëmë mu ndaambu m'bu.