Luzabukunu 11 - N’KANGULU WUMOONË

Simbaanji si wali

¹ Bëkum'paanooso n'kwiisë, dedë mweekë liveeso li kuzongilë i bisë kun'kaambë : « Yeendë we zoonji n'zo-Nzaambi i civakululu i taangë banë bële mu kusambilë mwaawu.

² Kasi leembu kuzoongë lingaandë li n'zo-Nzaambi. Cibilë bëyilekulë ke sipayi, mba bën'safulë livulë li saantu fë mëkumë-na ngoondi wali.

³ Mba yin'filë simbaanji syaami siwali, bëvwaatë sedë i baawu bën'vaanë saangu bëtambulë ke Nzaambi fë civeefi nkamë-wali yi mëkumë-samunu më bilumbu. »

⁴ Simbaanji siwali syaawu miti yi wali yi oliivë i miindë wali yitelëmë fë ntwaalë Fumu yi n'toto.

⁵ Ningë wun'viipë wun'toombë kubëvaangë simbi, mbaasu yim'basikë mu munwaawu i yin'voondë simbeenyi syaawu. Mati boobo bwa bun'fwiilë wosuku wun'zolë kubëvaangë simbi.

⁶ Baawu bëke yi lutumu lu kukandilë n'vulë, mu kumaangë n'vulë kunokë tee ntaangu kun'vandikë saangu kutambulë ke Nzaambi. Baawu bëke yi likanë mu kubalulë masi mu meengë i mu kusifë n'toto mu bivuungë bi yosuku mpilë, bunë bën'zolilë.

⁷ Bunë baawu bëm'manë kutendulë saangwaawu, cibulu cim'basikë ku libulu li mbaasu mba wubënwanisi. Naandi mba wubëluungë i wubëvoondë.

⁸ Sinvuumbi syaawu mba sin'kalë fë ciyalëlë ci livulë linenë, fanë bëbandilë Fumwaawu fë kuluusu. Livulë be lyooli bëliteelë Sodoomë, kaambofo Zipiitë.

⁹ Baatu bë mëkaandë makë mooso, bifuumbë byooso, simbeembu syakë syooso i bë buloongo booso mba bëm'monë sinvuumbi syaawu fë bilumbu bi tatu i ndaambu i bisë bëvaanë n'swa ko mu kubëziikë.

¹⁰ Baatu bë n'toto mba bëm'ba mu nyeenzi mu kumonë lufwa lwaawu. Baawu bën'vaangë n'saangu nyeenzi i bën'vanësënë mëkabu, cibilë mibici yi wali oyo bëvaangë baatu simpasi sivyokilili.

¹¹ Kasi, fë mbusë bilumbu bi tatu i ndaambu, n'vumuku luziingu wufuminë ke Nzaambi wusë kotë mu baawu. Baawu bisë telëmë i bakë booso banë bëbëmonë bëba mu boomë.

¹² Mibici yi wali bisë kuwu mbeembu nkamu yifuminë lu yilu yisë tubë : « Lwe macyaanu afë! » Baawu bisë makë ku yilu mu livweeti, fë meeso më simbeenyi syaawu.

¹³ Mo mu ntaangu mweekë, n'toto wusë tutumukë. Cimweekë mu likuumi li mëvulë lisë bulëmukë i saambwali li biveefi bi baatu bisë fwa mu lututumuku lu n'toto be woowo. Baatu bëmesë bëkotë mu boomë i bëvutulë bumpumu ke Nzaambi yi yilu.

¹⁴ Linyonyi limwaali lyavyookë. Kasi kebë, linyonyi lin'tatu lin'kwisë kumëzimbëkëlë.

Mbudi yi saambwali

¹⁵ Yaanzi yi saambwali yisë sikë mbudi. Simbeembu si nkamu sisë kuwukunu ku yilu. Syaawu sisë tubë : « Lutumu lu buloongo be buubu lweekë buyifanwabu mu Fumwiitu i ke Kliistu i cifumu cyaandi cin'ziingë ntaangu syooso! »

¹⁶ Mëkumë-mwaali mëkakëtë më na mëlëbyaalë fë ntaanji fë ntwaalë Nzaambi bëlakë mboku fë n'toto i bisë kuundë Nzaambi,

¹⁷ kutubë : « Fumu Nzaambi n'kwa-luleendo, njeeyi wuli i wabë, beeso tukudumisi mu kusalilë luleendo lwaaku lunenë mu kukasi Lwaangu lwaaku.

¹⁸ Mëloongo misë ba mu likaanzi. Kasi buyifanwabu, mati likaanzi lyaaku lya lilë mu kumonikë mu lufundusu lu bo bëfwa lwa kufwaanë, ntaangu yikusendilë biseelu byaaku, mibici i bakë booso wubakisi i bëkucinzikaangë, bëkuluutu i bibabanë, mati ntaangu lutyamukunu mu bo bën'tyamunaangë n'toto ! »

¹⁹ N'zo-Nzaambi, ku yilu yisë zibukë i ciswekulu cin'kangulu cisë monikë. Tusyeemu, simbeembu, biduminë bi bivelë, lututumuku lu n'toto i n'vulë wunenë wu mëmanyi.