Luzabukunu 10 - N’KANGULU WUMOONË

Yaanzi i libuuku licyeeci

¹ Miinu yisë monooso yaanzi yin'ka yi luleendo wufuminë lu yilu. Naandi wabë wufuku mu livweeti i n'cyaamë wuziingë n'twaandi. Ciinyi cyaandi cilëlesikaangë buke muunyi, maalu maandi mabë buke mëkuunzi më mbaasu.

² Naandi wabë wusiimbë fë kooko libuuku licyeeci lizibukë. Naandi wusë tuulë kuulu ku mëbakëlë fë yilu m'bu i ku mëcyeetu fë n'toto.

³ Naandi wusë lookë yi mëngolo, buke n'kosi yin'ngonë. Mu n'lookaandi saambwali li bivelë bisë kuwukunu.

⁴ Miinu yifitë sonikë linë baawu bëtubë, kasi yisë kuwu mbeembu yifuminë lu yilu yikum'paanë n'swa : « Sweekë saangu yi lisaambwali li bivelë. Keelë wulëlisonikë. »

⁵ Oboobo, yaanzi yo miinu yimonë n'telë fë yilu m'bu i fë n'toto wusë nangunë kooko kwaandi ku mëbakëlë ku yilu

⁶ i wulefë mpesë mu lizinë li Nzaambi wun'ziingaangë ntaangu syooso, wunë wuvaangë li yilu, n'toto, m'bu i byakë byooso bike mwaawu. Yaanzi wusë tubë : « Fisë be ba luta ko!

⁷ Kasi ntaangu yo yaanzi yi saambwali yisikilë mbudi, oboobo Nzaambi wusë kuvaangë mbalulwaandi yi mësweeci bo naandi wukambilë ke biseelu byaandi mibici. »

⁸ Mbeembu yo miinu yiyuwu yifuminë ku yilu yisë kun'kaambooso mu bikumë abi : « Yeendë we boonji libuuku licyeeci lizibukë fë likaandë li kooko liyaanji wutelëmë fë yilu m'bu i fë n'toto. »

⁹ Miinu yisë belëmë fëke yaanzi, yin'loombë mu kum'paanë libuuku licyeeci. Naandi wusë vutulë : « Boongë libuuku i lya lyaawu: lyaawu lim'ba nduli mu cifuundu cyaaku, kasi mu munwaaku lyaawu lim'ba lweeci buke mëfutë më nyosi. »

¹⁰ Miinu yisë boongë libuuku licyeeci mu kooko ku yaanzi i yisë lilya. Mu munwaami, lyaawu lyabë lutwiingu buke mëfutë më nyosi, kasi buni yalimini, lyaawu lisë ba nduli mu cifuundu cyaami.

¹¹ Mu lyaawu, bisë kun'kaambë : « Njeeyi wufwenikinyooso kutendulë vyaasi ayi linë Nzaambi wuzitikë mu mboongu yi mpaapë, simbeembu i mitinu. »