Luzabukunu 1 - N’KANGULU WUMOONË

Ntonunu

¹ Libuuku be liili mwaawu mu keeli luzabukunu lunë Yeesu Kliistu kutambulë. Nzaambi wun'vaanë lwaawu bwiinji kuleesi ke biseelu byaandi linë mulooko liisë. Kliistu wufilë yaanzyaandi ke ciseelu cyaandi Za mu kun'zabikini lyaawu.

² Za wuli mbaanji, ti lyakë lyooso kumonë like libuungu li Nzaambi i cyelikë lizabukunu ke Yeesu Kliistu.

³ Nyeenzi ke wunë wun'taangë libuuku be liili, nyeenzi ke bo bën'kuwu saangu m'bici i bën'vitikë linë lisonëmë mu libuuku be liili! Cibilë ntaangu yo bësitikë mu maambu makë mooso omo yabelëmë.

Sibweekë ke lisaambwali li Bingangë

⁴ Miinu Za, ke lisaambwali li Bingangë bi Libweeti li Aziiya : Muulë i n'sikë bye luveewu ke Nzaambi wuli, waba i wulë mu kwiisë, ke lisaambwali li biluunzi bike fë ntwaalë ntaanzyaandi,

⁵ i ke Yeesu Kliistu mbaanji yisulëmë, mwaanë wun'tetë wubutu, wun'tetë wuvulumukë mu baatu bëfwa i n'kwa-lwaangu sifumu sin'toto. Kliistu be tuzolë i naandi wutuvuuci mu mësumu miitu mu luvakulu lwaandi.

⁶ Naandi wuvaangë mu beeso Lwaangu lu singangë-Nzaambi mu kusalilë Nzaambi, Tataandi. Bumpumu ke naandi i luleendo mu ntaangu syakë syooso! Ameenë.

⁷ Talaanu, naandi wukwisilë fë meeyi mëvweeti! Bakë booso bëkum'monë, yi bo bën'cyokë lyoongë. Mëloongo mooso më n'toto mën'cyenzëkënë mu cibilë cyaandi. Cibeeni, boobo bwa bëm'beelë! Ameenë.

⁸ « Miinu mi ntatukulu i situkulu », bun'tubilë Fumu Nzaambi n'kwa-luleendo, wuli, waba i wulë mu kwiisë.

Za wamonë cyeendë-meeso ci Kliistu

⁹ Miinu Za, mwaaniinu nguli, wubundënë dedë mweekë yi beeno mu Yeesu, yilë ndinkwiinu mu mënyoni, mu Lwaangu i lutatumunu. Miinu yinatu kucitumbë ci Patëmoosë mu cibilë ci lusulëmë lwaami mu libuungu li Nzaambi i mu cyelikë ci luzabikini Yeesu.

¹⁰ Cilumbu ci Fumu, Ciluunzi ci Saantu cisë kum'pwaatë i yisë kuwu ku mbusaami mbeembu nkamu yitendukë dedë mweekë mbudi.

¹¹ Yaawu yilëtubaangë : « Sonikë mu libuuku linë njeeyi wulë mu kumonë i filë libuuku ke saambwali li Bingangë : ku Efeesë, ku Similënë, ku Pelëgaamë, ku Tyatiilë, ku Salëdë, ku Filadelëfi i ku Lawodisee. »

¹² Miinu yisë balukë mu kumonë nani wulë mu kun'kaambaangë. Bwaawu yisë monë saambwali li miindë li woolë.

¹³ Fë meeyi bicyetukulu bi miindë fabë dedë mweekë mwaanë muutu wuvwaatë lizweeli likulë i likaanji li woolë mu n'timë.

¹⁴ Mileenjyaandi yabë yi mpeembi buke mëfuni, kaambofo buke n'nokë mpeembi i meeso maandi mëlëlesikaangë buke mbaasu.

¹⁵ Maalu maandi mëlëlesikaangë buke boloonzë balengë balyoomisi ku mbaasu i mbeembwaandi yilëtendukaangë buke bikwililë binenë bi masi.

¹⁶ Naandi wulësiimbaangë saambwali li simbotë fë likaandë lyaandi li kooko ku mëbakëlë i cisabë cilwaalë sinkoonzu siwali cilëbasikaangë mu munwaandi. Ciinyi cyaandi cilëlesikaangë buke muunyi fë ntaangu-mbatë.

¹⁷ Fanë yam'moni, miinu yisë bwa fë maalu maandi buke yafwa. Naandi wusë tetikë kooko kwaandi ku mëbakëlë fë yilwaamë i wusë tubë : « Wumoni boomë ko! Miinu ntatukulu i situkulu.

¹⁸ Miinu yilë moonyi. Yabë yifwa kasi buyifanwabu, yilëmoonyi sakë yi sakë. Miinu yin'siimbaangë lutumu fë yilu lufwa i buloongo lu bo bëfwa.

¹⁹ Sonikë linë wulë mu kumonë : yivaandi lyo lilë mu kuvyookë buyifanwabu linë lifwenikini kwiisë ku ntwaalë.

²⁰ Tala suundu linë liswaamë mu lisaambwali li simbotë lyo wulë mu kumonë fë likaandë lyaami li kooko ku mëbakëlë i lisaambwali li miindë yi woolë : lisaambwali li simbotë siyaanzi, lisaambwali li Bingangë i lisaambwali li miindë lisaambwali li Bingangë. »