Loomë 9 - N’KANGULU WUMOONË

Nzaambi i mboongo kwasoolë

¹ Cyelikë yin'tubë mu Kliistu. Miinu yisë m'puutë ko, cibilë mbalulwaami yin'tubilë cimbaanji mu Ciluunzi ci Saantu.

² N'timaami wuke beenë mu cyuundë cinenë i lusweenu lukalilë.

³ Miinu yizolisi kuba miveekë mu n'loku Nzaambi i kukabukë yi Kliistu mu cibilë ci liboti li baanë baami bë nguli, banë buke yaamë cifuumbë cimweekë.

⁴ Baawu bëkeeli mboongu yi Islayeelë: Nzaambi wabëcitulë baanë baandi, wusë bëvaanë lumonukunu lu bumpumu, mikangulu, likabu li n'kaakë, lusaambulu, tukanyu.

⁵ Baawu bëkeeli sindaandu si sinkaakë i na Kliistu mu n'sunyi, naandi wuke fë yilu byakë byooso Nzaambi wun'sakumunë mu mivu yooso.

⁶ Lyaawu lisë n'tubë ko ti lukanyu lu Nzaambi lusyeeli ko n'ciinzë. Licyelikë, sindaandu si Islayeelë bëkeeli ko bakë booso likaandë li Islayeelë.

⁷ Sindaandu si Abalaamë sikeeli ko syakë syooso baanë baandi bëcyelikë, cibilë Nzaambi wukaambë Abalaamë : « Mati mu Isaakë mwaawu wum'bakilë sindaandu sinë yikukanyi. »

⁸ Yin'tubë : fëkeeli ko baanë bëbutu mu ci n'sunyi buke baanë bë Nzaambi. Kanuku bo baanë bubutu bunë bën'kwendilë lukanyu lu Nzaambi bëke sindaandu sicyelikë.

⁹ Cibilë Nzaambi wuzitikë lukanyu lwaandi mu bikumë abi : « Mu teepu yo yimweekë, yin'vutukënë i Sala wum'bakë mwaanë. »

¹⁰ Limeeni ko. Twe balaanu yivaandi mu Lebeka: baanë baandi bë bwaali babë tataawu wumweekë, nkaakiitu Isaakë.

^11-12 Kasi Nzaambi mu syaandi mpangulu mu kusoolë baatu: n'solulwaandi yin'talë mbilë yinë kubëtelilë kasi yaaku ti mu mëvaangë, mu kuleesi ti naandi wusulëmë mu mpangulu be yooyi. Nzaambi wukaambë Lebeka i kuzaabë ti baanë baandi bëm'butë i wusye vaangë keti liboti keti libi : « N'kuluutu wun'salilë cilesi. »

¹³ Busonëmë : « Miinu yizolë Zakoobë, kasi yileendë Ezawu. »

¹⁴ Mbici tufwenikini kuzitikë? Buni Nzaambi wusye sulëmë kwe? Moniko, boobo ko!

¹⁵ Licyelikë, naandi wukaambë Moyiizë : « Miinu yin'fwiilë cyaali ke wunë yim'bakë cyaali i yim'ba mu cyuundë ke wunë yim'bakë cyuundë. »

¹⁶ Lyaawu likeeli ko mu n'vwiilu muutu keti mu mëngolo maandi, kasi tokë mu cyaali ci Nzaambi.

¹⁷ Busonëmë, Nzaambi wukaambë n'tinu Zipiitë : « Miinu yakubyaasi n'tinu bwiinji wuleesi luleendo lwaami i ndumwaami yinyambë fë moongu butoto. »

¹⁸ Bwaawu, Nzaambi ke yi cyaali ke wunë kuzolisi i naandi wun'vangisi kuba n'timë wungolo wunë kuzolisi.

Likaanzi i cyaali ci Nzaambi

¹⁹ Bunë yim'balë bëkun'kaambë : « mu mbici Nzaambi wutuseembooso? » Cibilë ocyo, nani wum'podi kukakini mpangulu yi Nzaambi?

²⁰ Kasi njeeyi nani wukeeli, muutu kwaandi vwiili mu kuvutulilë Nzaambi munu? N'kesë buvangilë mu n'toto civaandu, naandi wun'kufulë : « Mu mbici njeeyi wakum'pangili katiboobo? »

²¹ Cifikulë n'kesë kupodi kuvaangë cyosuku mu n'toto civaandu: mo mu n'toto mweekë civaandu, naandi kupodi kuvaangë n'kesë bukaalu kaambofo n'kesë wukaambu bukaalu.

²² Boobo, Nzaambi watoombë kuleesi likaanzi lyaandi i kuzabikini luleendo lwaandi. Mu kumonë, naandi wucikunë yi mpungë-moonyi banë bëfitë tambulë likaanzi i bëbelëmë mu lunyambekunu.

²³ Kasi naandi watoombë kuleesi buni bukelili bumpumu bwaandi bunenë ke bën'ka, banë naandi kum'bakë cyaali, bo naandi wubëlikë faanë yi faanë mu kubakë cikuuku mu bumpumu.

²⁴ Beeso aba, wututelë, yaaku tokë fë meeyi Sizwiifë kasi yivaandi fë meeyi mëkaandë mën'ka.

²⁵ Bo kutubilë mu libuuku li Osee : « Mboongu yikaambu kuba mboongwaami yiyiteelë mboongwaami, si yikaambë kuzolë, yiyiteelë cinzolili cyaami.

²⁶ Fanë bëbëkambilë : “Beeno lukeeli ko mboongwaami”. Faawu baawu bëkun'teelë baanë bë Nzaambi yi moonyi. »

²⁷ Ezayi ku lwaandi lweeku, wutubë : « Keti mu basë Islayeelë bëlë ba bëmpaapë yivaandi buke singeenzë si cisengini mu ndambu m'bu, fwaati too mu baawu mba bën'vuukë.

²⁸ Cibilë manë Fumu kutubë, wun'dukisi maawu deku-dekoo i mëlengë-lengë fë moongo butoto. »

²⁹ Bunë butubilë Ezayi faanë yi faanë: « Ningë Fumu buloongo wusye tubikilë ko mwa sindaandu, nkanë beeso tulë ba dedë mweekë yi Sodoomë, i beeso tufitë ba bo bumweekë yi Ngomoolë. »

Islayeelë i luvukulu mu ciminu

³⁰ Mbici tufwenikini kuzitikë? Baatu bë sisi sin'ka, banë bëlëkaambwaangë kusulëmë fë nduunzi Nzaambi, bisë ba bësulëmë fë meeso maandi mu ciminu.

³¹ Tiilyoko, basë likaandë li Islayeelë, banë bëtoombaangë kuba bësulëmë fë meeso më Nzaambi mu mëkanë më n'kaakë, bisye dukisi ko manë n'kaakë wulëloombë.

³² Mu mbicye? Cibilë baawu bësye toombaangë ko kuba baatu bënyeefë fë nduunzi Nzaambi mu ciminu, baawu bëlëbalaangë ti mu mëvaangë maawu babë bënyeefë. Bisë kubë libaku linenë « Limanyi livangisi kutelumukë »,

³³ bunë busonëmë : « Monaanu, miinu yasimikë ku Siyoonë limanyi linë lin'vangisyaangë ku kutelumukë, limanyi li ngooto lim'bwisyaangë. Kasi wunë wun'ta maanë mu naandi, wusë m'monë sonyi ko. »