Loomë 8 - N’KANGULU WUMOONË

Luziingu yimunë Ciluunzi ci Nzaambi

¹ Buyifanwabu, lutabu lusyeelyooso ko mu banë bëke mu Kliistu Yeesu.

² Cibilë n'kaakë Ciluunzi wun'vanaangë luziingu mu Kliistu Yeesu, wakuvuuci mu n'kaakë lisumu i mu lufwa.

³ Nzaambi wusë vaangë linë lyabë mëvangulu mpa mu n'kaakë Moyiizë, cibilë n'sunyi wusye vanaangë n'kaakë lutumu ko : mu kubotulë lisumu, wusë filë Mwanaandi viingu mu luziingu lufwanekënë yi n'sumuci i wusë tabë lisumu mu n'sunyi.

⁴ Nzaambi wusë vaangë katiboobo, bwiinji simpangulu si n'kaakë sivangënë mu beeso tun'kaambu kube zingilë mu n'sunyi, kasi mu Ciluunzi ci Saantu.

⁵ Boobo, banë bën'zingilaangë mu n'sunyi, bën'salilë binvweenvu binsunyi, kasi banë bën'zingilaangë mu lutumunu lu Ciluunzi ci Saantu bën'salilaangë binvweenvu bi Ciluunzi.

⁶ Cibilë binvweenvu binsunyi bin'nataangë ku lufwa, kasi binvweenvu bi Ciluunzi bin'nataangë luziingu i n'sikë.

⁷ Cibilë n'sunyi mbeeni yi Nzaambi, n'sunyi wusë n'lengilë moonyi ko mu n'kaakë Nzaambi i waawu wusë lipodi ko.

⁸ Banë bën'zingilaangë mu n'sunyi kupodi ve kudedulë Nzaambi.

⁹ Beeno lusë n'zingilaanu ko mu n'sunyi. Kasi mu Ciluunzi, ningë cyelikë Ciluunzi ci Nzaambi cike mu beeno. Ningë Ciluunzi ci Kliistu cikeeli mu naandi ko i na woowo wukeeli mu naandi ko.

¹⁰ Ningë ti Kliistu wuke mu beeno, cyelikë, nyitwiinu mu kumonë kwaandi yin'kalilë mu lufwa mu cibilë ci lisumu, kasi Ciluunzi cin'zingilë mu beeno cibilë Nzaambi waluvangisi kuba baatu bësulëmë.

¹¹ Ningë Ciluunzi cyo civulumunë Yeesu mu nkoongë bëfwa cike mu beeno, boobo Nzaambi wo wavulumunë Kliistu mu nkoongë bëfwa wuluvandikë yivaandi luziingu mu sinyitu siinu sifwa mu Ciluunzi cyaandi cike mu beeno.

¹² Bwa boobo, baanë bë nguli tukanyu, mën'talë n'sunyiitu bo bufwenikini kuzingilë n'sunyi.

¹³ Cyelikë ningë mooti lube zingilë mu n'sunyi, beeno lun'fwa. Kasi ningë, mu Ciluunzi ci Saantu, beeno lun'voondë mëvaangë më nyitu, beeno lun'ziingë.

¹⁴ Cibilë bakë booso, bën'zingilë mu Ciluunzi ci Nzaambi baawu baanë bë Nzaambi bëkeeli.

¹⁵ Licyelikë nusye kwaakë ko ciluunzi ci bundongo ciluvangisi boomë. Kasi beeno lwakwaakë Ciluunzi ci Saantu ciluvangisi kuba baanë bë Nzaambi i wuluvaanë likanë mu kulosukë : « Abaa! Taatë! »

¹⁶ Ciluunzi Ci Nzaambi naveekë wun'sisiminë bumbaanji ke ciluunzi ciitu ti beeso baanë bë Nzaambi tukeeli.

¹⁷ Ningë beeso baanë tukeeli, bibyalilë yivaandi tukeeli, bibyalilë bi Nzaambi, bibyalilë yimunë Kliistu, ningë cyelikë tulë mu kumonë simpasi yimunë naandi, beeso tum'ba yivaandi mu bumpumu bwaandi.

Bumpumu buntwaalë yikwisë

¹⁸ Miinu yim'balë ti simpasi sintaangu be yiiyi sikeeli ko syo si mweekë sifwanëkënë yi bumpumu bunë Nzaambi wun'zabikini mu beeso.

¹⁹ Buloongo n'viipë bulë mu kuciingë yi lufyaatu ntaangu yo Nzaambi wun'zabikini baanë baandi.

²⁰ Cibilë buloongo bubwa mu lutumu lukaambu nteendu, yaaku ti bwaveekë bu yitombisi, kasi cibilë Nzaambi na wubutiisi. Kasi civuufu ci cinyi :

²¹ buloongo bwaveekë bun'syalulu cilumbu mu lutumu lun'cyacyamu lu bundongo mu kubakë cikuuku ci lusyalulu lu bumpumu lu baanë bë Nzaambi.

²² Beeso tuzabisi ti, cyelikë buloongo n'viipë bulë mu kudimë i bulë mu kumonë simpasi tee buyifanwabu.

²³ Kasi yaaku tokë buloongo: beeso tutambulë Ciluunzi ci Saantu dedë mweekë cikuuku cin'tetë mu mëkabu më Nzaambi, beeso tulë mu kudimë ku n'timiitu, mu kuviingë lufyaatu tee fanë Nzaambi wun'vaangë mu beeso baanë baandi i wutuvaanë lusyalulu lu nyitwiitu.

²⁴ Cibilë mu civuufu mwaawu tuvukilë. Ningë tubëmonë linë twatulilë civuufu, cyaawu cyelikë cisyelyooso ko civuufu: Nani wum'podyooso kuba yi civuufu mu manë wulë mu kumonë?

²⁵ Kasi, ningë tubëtuulë civuufu mu manë tun'kaambu kumonë, beeso tumëviingë yimunë mpungë-moonyi.

²⁶ Bo bumweekë yivaandi, Ciluunzi wutuzudyaangë, cibilë beeso tudekë. Cyelikë tusye zaabë ko kusambilë bo bufwenikini. Kasi Ciluunzi naveekë wun'sambililë mu beeso yimunë tubondululu tukaambu cikumë cikutubë.

²⁷ Nzaambi wunë m'monaangë mitimë wuzabisi linë Ciluunzi wufwenikini kuloombë, cibilë Ciluunzi wun'sambilaangë mu bitamaanë, dedë mweekë Nzaambi wun'tiisyaangë.

²⁸ Beeso tuzabisi ti biimë byakë byooso bin'salaangë buboti ke banë bëzolisi Nzaambi, mu banë kutelë mu n'vwiilwaandi.

²⁹ Cibilë Nzaambi wubësoolë faanë yi faanë i naandi yivaandi wulikanë ntamë baawu mu kuba buke Mwanaandi, bwiinji naandyaawu wuba n'kuluutu mu lutaangu lunenë lu baanë bë nguli.

³⁰ Banë Nzaambi wuboongë lukanyu faanë yi faanë, wubëtelë yivaandi. Banë kutelë, wubëvangisi kuba baatu bësulëmë fë nduunzyaandi, banë kuvangisi kusulëmë, wubëvaanë cikuuku ci bumpumu bwaandi.

Bunenë buluzolo lu Nzaambi

³¹ Beeso mbici tum'podyooso kutubë? Ningë Nzaambi ke yiitu, nanyooso wum'podi kuba mbeeniitwe?

³² Naandi wusye vengulë ko Mwanwaandi naveekë, kasi naandi wun'vakulë mu cibilë ciitu beeso booso, buni naandi kun'kaambulu kutuvaninë biimë byooso yimunë Mwanaandye?

³³ Nani wun'fuundë banë Nzaambi kwasoolë? Muutu ve, cibilë Nzaambi wabëvangisi kuba bësulëmë.

³⁴ Nani wum'podi oboobo kun'vaanë lutabu? Muutu ve, cibilë Kliistu Yeesu wufwa i naandi wuvulumukë, wuvwaandë ku mëbakëlë më Nzaambi i naandi wulë mu kusambilë mu beeso.

³⁵ Nani wum'podi kutuyakini mu luzolo lu Kliistu? Mënyoonyi, lusweenu, bincindwe, nzalë voo mpenë, kaambofo binkuungë, vo lufwa?

³⁶ Busonëmë : « Mu cibilë cyaaku, beeso twamonikë fë lufwa musë wooso, beeso tweekë dedë mweekë mëmemë bulë mu kunatë mu kuvoondë. »

³⁷ Kasi, mu makë mooso omo beeso twabakë nduunji yo yifwaanë ke wunë wutuzolisi.

³⁸ Cibeeni, miinu yike yi lyaanë ti cin'velë ve cim'podi kutuyakini mu luzolë lwaandi : keti lilë ba lufwa, keti luziingu, kaambofo siyaanzi, keti lilë ba tutumu kaambofo tuleendo tu yilu, keti lilë ba bubwayi kaambofo kun'twaalë yikwisë,

³⁹ keti tuleendo tu yilu, kaambofo tuke fësi, cin'velë ve civangunu, cim'podi kutuyakini mu luzolo lo Nzaambi wutulesilë mu Kliistu Yeesu Fumwiitu.