Loomë 7 - N’KANGULU WUMOONË

Cifwaani ci likweelë

¹ A baanë bë nguli beeno luzabisi buboti manë yifwenikini kulukaambë, cibilë luzabisi n'kaakë : n'kaakë wuke lutumu mu muutu bunë naandi wulë mu kuziingë.

² Mu kumonë, n'cyeetu wukangëmë mu n'kaakë wu n'nunyaandi bo bëlë mu kuziingë. Kasi mooti n'nunyi wafwa, naandi wasyalulu mu n'kaakë wulën'kangaangë.

³ Mooti naandi weekë n'kasi wu libakëlë lin'ka n'nunyaandi wucini moonyi, naandi wavaalë. Kasi mooti, n'nunyaandi wafwa, naandi wasyalulu mu n'kaakë, oboobo naandi kupodi kwaandi kuba n'kasi wu libakë lin'ka, wusë n'vaalë ko.

⁴ Lyaawu like bo bumweekë mu beeno, banë bë nguli. Beeno lwafwa mu n'kaakë, bunë lwabundënë mu nyitu yi Kliistu. Bwaawu, lubakisi ke wun'ka, mu kutubë mu wunë wavulumukë mu lufwa bwiinji tuvaanë cinë cike ciboti ke Nzaambi.

⁵ Licyelikë, bunë tulëzingilaangë mu cimuutu ciitu, binvweenvu bibi bikutusindikilë mu n'kaakë wunë wuke wukangëmë mu nyitwiitu yooso i wutuvaanë byo bin'natë mu lufwa.

⁶ Kasi buyifanwabu, twasyalulu mu n'kaakë, cibilë twafwa mu binë bilëtukaangaangë mu buloko. Beeso kupodi kusalilë Nzaambi mu nteku yimoonë, mu lutumu lu Ciluunzi ci Saantu i yaaku mu nteku yi ntamë, mu lutumu lu n'kaakë wusonëmë.

N'kaakë i lisumu

⁷ Buni bufwenikini kuzitikë? N'kaakë waawu lisumu? Boobo ko! Kasi n'kaakë wakum'pangisi kuzaabë lisumu. Cibeeni, nkanë yisye zaabë ko cideenzë ningë n'kaakë sye tubilë kuve mu waawu : « Njeeyi wusë m'ba yi cideenzë ko. »

⁸ Lisumu lyabakë luvoto lo lwan'vaanë lutumu mu kuvaangë mu miinu yosuku mpilë bideenzë. Cibilë ningë n'kaakë vo, lisumu ciimë kwaandi vwiili.

⁹ Ntaangu ntamë, n'kaakë wusye ba ko, miinu yabë moonyi. Kasi bunë lutumu lumonikë, lisumu lisë bakë moonyi,

¹⁰ miinu yibakë lufwa: lutumu lunë lufitë vaanë moonyi lwavaanë lufwa.

¹¹ Cibilë lisumu lyabakë luvoto, lwakum'puutë mu lutumu i mu naandi, lwakum'pangisi kufwa.

¹² Boobo, n'kaakë waveekë saantu i lutumu saantu, lusulëmë i luboti.

¹³ Linë liboti lyan'natë lufwa mu miinwe? Boobo ko! Mati lisumu lyaawu lyavangisi boobo. Lyaawu lyaleesi nguliku ciduundu ci lisumu: naandi wasalilë linë like liboti mu kum'pangisi kufwa. Tala buni lisumu lyakumonikë, lisumu livyokilili bunenë.

Lisumu lyabyesikë muutu

¹⁴ Beeso tuzabisi ti n'kaakë mati lyaambu li cimpeefë. Kasi miinu, yike mu cinsunyi, yisumbusu dedë mweekë n'dongo mu lisumu.

¹⁵ Miinu yisye n'zaabë ko linë yilë mu kuvaangë: cibilë yisë n'vaangë ko linë yizolisi, kasi yilë mu kuvaangë linë yikambusu kuzolë.

¹⁶ Ningë yilë mu kuvaangë linë yikambusu kuzolë kuvaangë, bwa boobo yin'zabilë ti n'kaakë liboti.

¹⁷ Yaaku miinu yin'silë katyoobo, vandi kasi lisumu lyo lin'zingilë mu miinu.

¹⁸ Cibilë yilizabisi ti, liboti likeeli ko mu miinu, dedë ti n'sunyaami wuvolë. Cibeeni, cideenzë cikuvaangë liboti cike mu miinu, kasi yaaku ti likanë mu kulivaangë.

¹⁹ Licyelikë, yisë n'vaangë ko liboti yizolisi kuvaangë i miinu yilë mu kuvaangë libi yikambusu kuzolë.

²⁰ Ningë yibe vaangë linë yim'maangë kuvaangë, boobo yaaku ti miinu yin'vaangë katyoobo, mati lisumu lin'zingilë mu miinu.

²¹ Miinu yabakulë mpilë n'kaakë owo : miinu yizolisi kuvaangë liboti, libi tokë yilë mu kuvaangë.

²² Ku kati ku n'timaami, yike yi cideenzë mu n'kaakë Nzaambi.

²³ Kasi yim'monë ku cibeenzë cyaami ci n'timë, n'kaakë wun'ka wulë mu kunwanisi mëlyeelë maami. Waawu wukum'pangisi mu kuba mu buloko bu n'kaakë wu lisumu linë like mu miinu.

²⁴ A mënyoonye mu miinwe! Nani wum'podi kum'puuci mu nyitu ayi yilë mu kun'natë ku lufwa?

²⁵ Mpumu ke Nzaambi, mu Yeesu Kliistu Fumwiitu! Mu boobo, miinu yike mu cisalu ci n'kaakë Nzaambi mu mëlyeelë maami, kasi mu kuvolë kwaami ku nyitu, miinu yike fë civikë ci n'kaakë lisumu.