Loomë 5 - N’KANGULU WUMOONË

N'sikë yimunë Nzaambi

¹ Mu lyaawu, beeso tweekë baatu bësulëmë mu Nzaambi mu cibilë ci ciminu ciitu i beeso tweekë mu n'sikë yimunë naandi mu Fumwiitu Yeesu Kliistu.

² Mu ciminu mu Yeesu, twabakë muulë wu Nzaambi wunë tun'kalilë tuciindë. Linë lituvangisi sinyeenzi, mati civuufu mu kubakë cikuuku mu bumpumu bu Nzaambi.

³ Beeso tuke beenë liyaanji mu simpasi tum'monë, cibilë tuzabisi ti simpasi sin'twaalaangë n'ciimbë moonyi,

⁴ n'ciimbë moonyi yin'vaangësyaangë kuciindë mu simpekaadu i kuciindë kun'vaanaangë civuufu.

⁵ Civuufu be cyooci cisë tufwiisi sonyi ko, cibilë Nzaambi wudukulë luzolo lwaandi mu mitimiitu mu Ciluunzi ci Saantu cyo naandi kutuvaanë.

⁶ Mu bwaawu, bunë beeso tukaambu kubakë likanë mu kubasikilë, Kliistu wufwiilë mu misumici mu ntaangu yo Nzaambi kusitikë.

⁷ Mati simpasi mu kucikunë mu kufwiilë mu cibilë ci muutu wusulëmë. Muutu kupodi kwaandi kufwiilë mu cibilë ci muutu wumboti.

⁸ Kasi Nzaambi watuleesi ti naandi wutuzolisi. Kliistu wufwiilë mu beeso, bunë twabooso mu mësumu.

⁹ Mu luvakulu lwaandi, beeso tweekë baatu bësulëmë fë nduunzi Nzaambi. Buni beeso tun'kaambu kuvukilë mu likaanzi li Nzaambi!

¹⁰ Beeso twabë simbeenyi si Nzaambi, kasi watuvangisi kuba cindiku yimunë naandi mu lufwa lu Mwanaandi. Kwisilë buni bubwayi aci, bo tweekë mu n'kangulu yimunë naandi, tun'vuukë mu luziingu lu Mwanaandi.

¹¹ Beeso tuke beenë liyaanji fë nduunzi Nzaambi mu cibilë ci Fumwiitu Yeesu Kliistu, mu naandi mwaawu twavutulë cindiku yimunë Nzaambi.

Adaamë i Kliistu

¹² Mu lyaawu, bo bumweekë ti mu muutu mweekë mwaawu lisumu likotilë mu buloongo i mu lisumu li lufwa i mu bwaawu lufwa lwabwilë mu baatu booso, cibilë babooso bësumukë.

¹³ Bosuku Nzaambi wuvaanë n'kaakë ke Moyiisë, lisumu limwe bangaangë mu buloongo, kasi mu lukaambu lu n'kaakë, lisumu lisye taangë ko.

¹⁴ Kasi lufwa luvumisi kutoonë Adaamë tee Moyiizë. Lufwa lutukilë yivaandi banë bëkaambu kusumukë mpilë mweekë yi Adaamë, awu wuke cifwaani ci wo wufwenikini kwiisë.

¹⁵ Kasi fëkeeli mpilë mweekë ko mu likabu libuunë li Nzaambi yimunë libi li Adaamë. Ningë mu cibilë ci lisumu li muutu mweekë mpaapë bëfwa, kuvyookë ofo, muulë Nzaambi i likabu li muutu mweekë, Yeesu Kliistu, biinji bunenë mu mpaapë baatu.

¹⁶ Likabu li Nzaambi like nteku yin'ka yi lisumu li muutu mweekë. Lufundusu luyisilë mu lisumu li muutu mweekë lisë natë lutabu, kosuku likabu libuunë lin'veewu mu mpaapë tudiifu lin'vaanë n'sulumunu.

¹⁷ Cibeeni, lufwa lusë n'leesi lutumu lwaandi mu libi li muutu mweekë, mu cibilë ci muutu be woowo. Kasi, mu Yeesu Kliistu vwiili, beeso tun'tambulë bivyokili: bakë booso bën'kwaakë muulë lunduu wu Nzaambi i likabu lu cisalu cyaandi ci luvukulu, bën'zingilë i bëm'waalë mu cibilë ci Kliistu.

¹⁸ Mu bwaawu, lisumu li muutu mweekë, Adaamë, lisë kuvangisi lutabu lu baatu lumoonyi booso. Bo bumweekë, livaangë lisulëmë li muutu mweekë, Yeesu Kliistu, wun'kobulë baatu lumoonyi booso mu lufundusu i wubëvangisi kuziingë.

¹⁹ Bwaawu, mu cibilë ci muutu mweekë wukaambu kuwulu Nzaambi mpaapë baatu bëbwa mu lisumu, bo bumweekë, mu cibilë ci luciinzu lu muutu mweekë, mpaapë bisë ba bësulëmë fë nduunzi Nzaambi.

²⁰ Bunë n'kaakë watuuci i mësumu misë waalë. Kasi, fanë fën'waalë lisumu, muulë Nzaambi wum'ba lunduu.

²¹ Oboobo, lisumu lyaleesi lutumu lwaandi lu lufwa, bo bumweekë muulë Nzaambi wun'leesi lutumu lwaandi lu n'sulumunu, mu kutunatë mu luziingu lu sakë yi sakë, mu Yeesu Kliistu Fumwiitu.