Loomë 3 - N’KANGULU WUMOONË

¹ Mu lyaawu, ndaandu mbici mu kuba Zwiifë? Kubukë bubakëlë yike n'ciinzë?

² Ndaandu yike yinenë, mu makë mooso. Lin'tetë, Nzaambi wuvaanë tukanyu kuke Sizwiifë.

³ Licyelikë, ningë bën'viipë mu baawu bëkaambu kuta maanë, kasi buni, Nzaambi wusë bëba ko wusulëmë cibilë baawu bëkaambu kuta maanë?

⁴ Yaaku boobo ko! Nzaambi wuke cyelikë, muutu mungë lupuutu, busonëmë : « Bwiinji wuba wusulëmë mu manë wun'tubë, i wuba mu nduunji ningë bëbe kufundisi. »

⁵ Kasi ningë libi linë tun'vangisi lin'leesi lusulumunu lu Nzaambi, mbici tufwenikini kutubë? Buni, Nzaambi weekë yi n'socye bo kwatuseembë? (Miinu yin'tubilë bo bëm'mweenë baatu.)

⁶ Moniko! Mooti naandi wubeeli boobo, buni kufitë fundisilë buloongo?

⁷ Kasi ningë lupuutu lwaami lun'leesi cyeseesë mu bucyelikë bu Nzaambi i lun'vangisi beenë bumpumu bwaandi, mu mbici miinu yifwenikinyooso kufundusu dedë mweekë n'sumuci?

⁸ Mu lyaawu, buni tun'kaambu kutubilë : « Tuvaangaanu libi bwiinji tubakë liboti » ? Bën'ka cyelikë, bën'sisiminë maambu ama mu kun'dyeengë. Baatu be boobo bën'tabu i lifwenikini boobo mu baawu.

Muutu ve wuke wusulëmë

⁹ Kasi mbi bike yiitu? Beeso Sizwiifë, bënenë bëvyokilili bën'ka? Moniko! Miinu yaleesi ti Sizwiifë i basë Ngeleekë, bëke yivaandi fë civikë ci lisumu.

¹⁰ Busonëmë : « Muutu wusulëmë voo, wun'viipë wukeeli ko,

¹¹ muutu ve wum'bakulë, muutu ve wun'toombë Nzaambi.

¹² Bakë booso bakwakënë nzilë yimboti fë cimweekë baawu bavitu. Muutu ve wun'vaangë liboti, wun'viipë ve.

¹³ Cikongulu cyaawu cyeekë dedë mweekë libuumbë lizibukë, ndakaawu yibëvangisi kutubë lupuutu, yaawu mati ndakë yi nyokë yim'basikë mu bilili byaawu,

¹⁴ miinwaawu yiwaalë yi miloko nduli.

¹⁵ Baawu bën'dumë ntiinu mu ke voondi,

¹⁶ Baawu bëm'biikë luvongumunu i cyaali fosuku bën'vyokilë,

¹⁷ baawu bësye zaabë ko nzilë yi n'sikë.

¹⁸ Baawu bën'zingilaangë kukaambu boomë bu Nzaambi. »

¹⁹ Beeso tuzabisi ti makë mooso mën'tubë n'kaakë, lyaawu lin'tubilë ke bakë booso bën'cinzikë n'kaakë bwiinji muutu ve wun'zibulë munu mu kuyinwaninë cikaangë i buloongo n'viipë bum'monikë fëke Nzaambi baatu bëbi.

²⁰ Cibilë muutu ve wun'zabekënë wusulëmë fë meeso më Nzaambi mu kucikunë n'kaakë wakë wooso. N'kaakë wun'vangisi tokë mu kubakulë lisumu.

Buni Nzaambi wun'vucilë baatu lu moonyi

²¹ Kasi buyifanwabu, Nzaambi watuleesi buni naandi wutuvangisyaangë kuba baatu bësulëmë fë ntwaalaandi i lyaawu yaaku ti mu mëkanë më n'kaakë ko. Mëbuuku më n'kaakë i yi Mibici bisë teetë lyaawu.

²² Nzaambi wun'vangisyaangë baatu kuba bësulëmë fë nduuzyaandi mu ciminu cyaawu mu Yeesu Kliistu. Naandi wulivaangë bwiinji bakë booso bën'ta maanë mu Kliistu, cibilë luvyakunu voo mu baveekë:

²³ bakë booso bësumukë i baawu bakwakënë fë bumpumu bu Nzaambi.

²⁴ Kasi Nzaambi, mu buboti bwaandi, wabëvangisi kuba bësulëmë fë nduunzyaandi buunë yi buunë, mu Yeesu Kliistu wubëyobulilë mu lisumu.

^25-26 Nzaambi wan'kwiindulë mu civakuli bwiinji, mu lufwa lwaandi, Kliistu wum'bakë lobukulu lu mësumu mu cibilë ci banë bata maanë mu naandi. Nzaambi waleesi ti naandi wusulëmë ntaangu syooso: naandi wuyileesi bunë kwabë yin'ciimbë moonyi i kubiikë kuseembë mësumu më baatu. Naandi wukeeli mu sintaangu asi, cibilë wusulëmë i wun'vangisi kusulëmë banë bën'ta maanë mu Yeesu.

²⁷ Oboobo, muutu kupodi kwaandi kube yizanjike? Moniko! Wun'viipë ko! Mu mbicye? Cibilë linë like n'ciinzë yaaku ti kucinzikë n'kaakë, kasi kuta lyaanë.

²⁸ Licyelikë, tum'balë ti muutu lumoonyi wuke wusulëmë fë nduunzi Nzaambi mu ciminu cyaandi i yaaku ti mu cibilë ti wacinzikë n'kaakë wooso.

²⁹ Kaambofo, Nzaambi wulë vwiili Nzaambi Sizwiifë too? Naandi wukeeli yivaandi kwe Nzaambi yi mëkaandë mën'ke? Cibeeni, naandi wukeeli yivaandi Nzaambi yi mëkaandë mën'ka,

³⁰ bo Nzaambi ke wo wumweekë vii. Naandi wun'vangisi kusulëmë fë nduunzi Sizwiifë mu ciminu i basë Ngeleekë yivaandi.

³¹ Lyaawu lin'leesi ti mu ciminu beeso tusë be monooso ko n'ciinzë mu n'kaakë? Moniko, beeso tun'cinzikë n'kaakë.