Loomë 2 - N’KANGULU WUMOONË

Lufundusu lu Nzaambi

¹ Njeeyi, bosuku wubeeli, nani wukeeli mu kufundisi bën'ka, kusë bëkulen'vukilë ko. Cibilë bunë wun'fundisi bën'ka i wun'vangilë bo bumweekë yi baawu, njeveekë wuyitabë.

² Beeso tuzabisi ti Nzaambi wun'tabaangë mu bucyelikë banë bën'vaangaangë mëbi bo bumweekë.

³ Njeeyi wum'balë ti, wun'kumbë lufundusu lu Nzaambi, wulë mu kufundisi bayaaku mu mëvaangë mo wulë mu kusalilë?

⁴ Kaambofo, njeeyi wun'leenji buboti bunenë bu Nzaambi, wuvungë-moonyi i mëboti maandi? Njeeyi wusye zaabë ko ti buboti bu Nzaambi bufwenikini kubalulë ziingulwaaku?

⁵ Kasi njeeyi wusë n'toombë ko kubakulë, wusye belëmë ko mu kuvilukë. Mu lyaawu, njeeyi wun'vangisi kastiikë yi Nzaambi yiba yinenë mu cilumbu cyo Nzaambi wun'leesi likaanzi lyaandi i lufundusu lwaandi lusulëmë

⁶ i fo kun'futilë kadi muutu mu manë kuvaangë.

⁷ Naandi wun'vaanë luziingu lu sakë yi sakë ke banë bën'tatëminë kuvaangë liboti i bën'toombaangë bumpumu, ndumu i luziingu lukalilë.

⁸ Kasi naandi wuleesi likaanzi lyaandi i lunyotukunu lwaandi kuke bo bën'kaambu kun'yuwulu, bëm'maangë cyelikë i kuyilekulë mu kuvaangë libi.

⁹ Cyuundë i lusweenu bin'vangisi simpasi ke bakë booso bën'vaangë libi, Sizwiifë cin'tetë i basë Ngeleesë.

¹⁰ Kasi Nzaambi wun'vaanë bumpumu, ndumu i n'sikë ke bakë booso bën'vangaangë liboti, cin'tetë ke Sizwiifë, kasi yivaandi ke basë Ngeleesë,

¹¹ cibilë Nzaambi wusë n'taandaangë muutu ko.

¹² Bakë booso bën'sumukaangë kukaambu kuzaabë n'kaakë Moyiizë, bën'fwa kukaambu n'kaakë. Kasi banë bëzabisi n'kaakë i bën'sumukë, bën'fundusu bo bën'kwendilë n'kaakë beenë.

¹³ Cibilë baatu bësulëmë fëke Nzaambi bëkeeli ko banë bëm'ba tokë mu kuwu n'kaakë, kasi bo bën'salilë maawu.

¹⁴ Bunë beeni bën'kaambu kuzaabë n'kaakë Nzaambi, yikuwusalilë, mati dedë mweekë baawu bëwunatë mu mitimaawu, kukaambu kuwuzaabë.

¹⁵ Baawu bën'leesi obo mpangulu yin'loombë n'kaakë wo wusonëmë mu mitimaawu. Ciluunzi cyaawu cibëteelë cimbaanji, yimunë simbalulu syaawu syo sibëfuundë i sibënwaninë.

¹⁶ Tala manë mëm'monikë cilumbu cyo Nzaambi wun'fundisi makë mooso mëswaamë mu luziingu lu baatu mu Yeesu Kliistu, bo bun'sisiminë Mpolu Mboti yinë yike mu kutendulë.

Sizwiifë i n'kaakë

¹⁷ Njeeyi wuyituunvi Zwiifë, wusikëmë mu n'kaakë i wuke lunyemu mu Nzaambi.

¹⁸ Njeeyi wuzabisi n'vwiilwaandi i n'kaakë wukuloongë mu kusoolë linë like liboti.

¹⁹ Njeeyi wuyituunvi, cinatë simpofo, cyeseesë ci banë buke mu citoombi,

²⁰ n'loonji mu banë buke mu buzimbu i ngeelë mu baanë, cibilë njeeyi wuke mu n'kaakë ntubulu yifwanëkënë yi luzaabu i bucyelikë.

²¹ A njeeyi, wun'vaanë mëlubu ke bën'ka, mu mbicye njeeyi wun'kaambu kulivangilë mu njeveekë? Nje wun'loongë ti busye fwaanë kuve kwiibë, cibilë mbicye njeeyi wulë mu kwiibë?

²² Njeeyi wun'fuungë kuvaalë, cibilë-mbici wulë mu kulivaangë? Njeeyi wum'maangë, bintumbë cibilë-mbici wulë mu kwiibë binë bike mu sinzo syaawu sinzaambi?

²³ Njeeyi wuke yi lunyemu mu n'kaakë, kasi wun'safulaangë Nzaambi mu kuvaangë manë mësokënë yimunë n'kaakë!

²⁴ Licyelikë, Cisonë ci Nzaambi cin'sisiminë : « Mu cibilë ciinu, mëkaandë mën'ka bëlë mu kudyeengë Nzaambi. »

²⁵ Ningë njeeyi be cikunë n'kaakë, lubuku lu bubakëlë lufwenikini mu njeeyi. Kasi ningë wusye cikunë n'kaakë ko, njeeyi wuke dedë mweekë wunë wukaambu kubukë bubakëlë.

²⁶ Mooti muutu wunë wubuku bubakëlë wuncikunë tutumu tu n'kaakë, Nzaambi wusë kun'tiisi kwe dedë mweekë wubukë bubakëlë?

²⁷ Libakëlë linë lin'kaambu kubuku bubakëlë mu n'sunyaandi, kasi wun'cikunë n'kaakë, wukun'fundisi, njeeyi wun'kaambu kucikunë n'kaakë, bosuku bubeeli ti wuke yi n'kaakë wusonëmë i wubuku bubakëlë.

²⁸ Mu bwaawu, Zwiifë yi cyelikë wukeeli ko wunë wuyileesi tokë i wunë babukë bubakëlë tokë mu n'sunyaandi.

²⁹ Kasi Zwiifë yi cyelikë mati wo wuke mu kati, wunë wabuku bubakëlë mu n'timaandi, kubukë bubakëlë yin'vangënë mu Ciluunzi ci Nzaambi i yaaku ti mu n'kaakë wo wusonëmë. Zwiifë be yooyo wun'tambulë ndumu yaaku ke baatu ko, vandi kasi ke Nzaambi.