Loomë 15 - N’KANGULU WUMOONË

Kutoonzi wayaaku i yaaku ti njeveekë

¹ Beeso tuciindë mu ciminu, tufwenikini kucikunë banë bëdekë. Tusye fwanëkënë ko kutoombë binë bitutoonzi.

² Bufwenikini kadë muutu mu beeso kutoonzi wayaandi mu liboti lyaandi, mu kun'vangisi kukulë mu ciminu.

³ Licyelikë, Kliistu sye toombë kuyitoonzi naveekë ko. Kasi, bo busonëmë : « Bifiingu bësiilë mu njeeyi bisë bwiilë mu miinu. »

⁴ Makë mooso tum'monë mu Bisonë mësonëmë ntaangu ntamë mu kutulubulë, bwiinji, mu cibilë ci luciimbë lu moonyi i mëngolo mëtuvaanë, tuba yi civuufu.

⁵ Nzaambi cizibë ci civuufu i ci mëngolo, wuluvaanë mëkanë mu kuzingilë benuveekë yi benuveekë mu bundiku yimunë bën'ka mu kulandilë cifwaani ci Yeesu Kliistu.

⁶ Bwiinji, mu cintwaali i mu mbeembu yimweekë, ludumisyaanu Nzaambi, Taatë yi Fumwiitu Yeesu Kliistu.

Mpolu Mboti yi mëkaandë mooso

⁷ Mu lyaawu lwe yikwaakaanu benuveekë yi benuveekë, bo Kliistu wulukwaakilë, mu bumpumu bu Nzaambi.

⁸ Licyelikë yilusisiminë, Kliistu weekë ciseelu ci Sizwiifë mu kudedikini tukanyu tunë Nzaambi wukanyi ke sinkaakë syaawu i wuleesi ti Nzaambi wusulëmë.

⁹ Naandi wuyisë bwiinji banë bëkeelë ko Sizwiifë bëdumisi Nzaambi mu buboti bwaandi, bo bën'loombilë Bisonë : « Mu bwaawu yikudumisi fë meeyi mëkaandë, i miinu yin'yolë mu luciinzu lwaaku. »

¹⁰ Lyaawu lin'tubooso : « Mëkaandë lwe baanu mu nyeenzi yimunë mboongu yi Fumu! »

¹¹ Lin' tubooso: « Bumpumu ke Fumu, beeno mëkaandë mooso, yolaanu twiimbu tun'zanjikë Fumu beeno luke mboongwaandi! »

¹² Ezayi wutubë yivaandi : « Ndaandu yi Yesee wun'kwisë, naandi wun'telëmë mu kutumi mëkaandë, i baawu bën'tuulë lukwikulu lwaawu mu naandi. »

¹³ Nzaambi, cizibë ci civuufu, wuluwaasi liyaanji i n'sikë wufwenikini mu ciminu ciinu mu naandi, bwiinji lubaanu bisinë mu civuufu mu luleendo lu Ciluunzi ci Saantu.

Poolë ke yi n'swa mu kusonikë bo kwasiilë

¹⁴ Baanë bë nguli, miveekë yasiinji ti beeno luwaalë yi simpangulu simboti, luwaalë yi luzaabu looso, yimunë mëkanë më kuzudisënë benuveekë yi benuveekë.

¹⁵ Mu kumonë, yalusonikinë yimunë bungelë booso mikukë yimesë mu n'kaandaami, mu kulutebulaanu moonyi mu manë luloongu ntamë. Miinu yasonikë mamaama mu cibilë ci liboti linë Nzaambi wakum'paanë

¹⁶ mu kuba ciseelu ci Yeesu Kliistu fë meeyi mboongu yo yikeeli ko Sizwiifë. Miinu yilë mu kudukusi cisalu ci semu ci lutendululu lu Mpolu Mboti yi Nzaambi, bwiinji bo bëkeeli ko Sizwiifë bëcitukë likabu liboti mu Nzaambi i lim'monikë ke naandi mu cimpukë ci Ciluunzi ci Saantu.

¹⁷ Oboobo, mu lubundunu yimunë Kliistu Yeesu, miinu kupodi kuvaangë binyemu mu cisalu cyaami mu Nzaambi.

¹⁸ Mu lyaawu, ningë yim'podi kutubë lin'viipë, mati tokë mu linë Kliistu kwavangë mu miinu mu kunatë banë bëkeeli ko Sizwiifë mu kuvitikë Nzaambi. Naandi walivaangë mu buleenvo, bu libuungu i mëvaangë.

¹⁹ Mu luleendo lu biliimbu i bimaaku, mu luleendo lu Ciluunzi ci Nzaambi. Mati mu boobo miinu yitendulë bunë bufwenikini Mpolu mboti yi Kliistu, kutoonë ku Yelusaleemë yimunë maalë mëbelëmë tee ku Ilili.

²⁰ Mu bwaawu yitendulilë Mpolu Mboti tokë mo bëkaambu kuzaabë Kliistu bwiinji, mu kumaangë kutuungë fë yilu simbaandu situungë wun'ka

²¹ Mati bunë busonëmë : « Banë bëkaambu kutendulu vyaasi, bëkum'monë, i banë bëkaambu kuwu kulibulilë lukuungu bëlikuwu. »

Poolë wun'tubilë mu Mweendwaandi ku Loomë

²² Mamoomo maawu mëkum'pangisyaangë sintaangu sin'ka yileembu kwiisë ke beeno.

²³ Kasi buyifanwabu, miinu yamanë cisalu cyaami mu mëbweeti ama. Kutatikilë mpaapë mivu, miinu yabë yi tesu mu kwiisë kulumonë

²⁴ i miinu yilëtoombaangë kulivaangë bunë yin'kwendë ku Espaanë. Cibilë yin'tiisi kulumonë ntaangu yin'vyokilë kwaawu i kukalë cintwaali yi beeno mu mwa ntaangu.

²⁵ Kasi mu buyifanwabu, yilë mu kweendë ku Yelusaleemë mu cisalu ci bitamaanë bike kwaawu.

²⁶ Boobo, sikleentë si Masedwaanë i Akaayi ba boongë lukanyu mu kuvaangë lukonunu lu mboongo mu cibilë ci biyeembi mu libuundu li Yelusaleemë.

²⁷ Licyelikë, baawu buboongë baveekë lukanyu, kasi cibeeni bëlëbëdefaangë. Cibilë sikleentë si Sizwiifë bëkabulë businë bwaawu bu ciluunzi yimunë banë bëkeeli ko Sizwiifë. Banë bëkeeli ko Sizwiifë bëfwenikini yivaawu kusalilë miciinzaawu.

²⁸ Bunë miinu yim'manë cisalu aci i yibëvaanë mbutë lukonunu, yin'kwendë ku Espaanë i yin'tabilë ke beeno.

²⁹ Yizabisi ti yin'kwisë ke beeno, yi lusakumunu lufwenikini lu kliistu.

³⁰ Kasi tala linë yiluloombë, baanë bë nguli, mu Fumwiitu Yeesu Kliistu i mu luzolo lutuvaanë Ciluunzi ci Saantu : nwaanaanu yimunë miinu mu kusambilë ke Nzaambi mu cibilë cyaami.

³¹ Sambilaanu bwiinji yivuukë yimunë bo bëkeeli ko bitamaanë ku livulë li Zudee i bwiinji bitamaanë bëyakë buboti lusalusu yilë mu kunatë ku Yelusaleemë.

³² Mu boobo, yin'tukilë ke beeno yi liyaanji linenë, ningë Nzaambi be lizolë i kuvuundi mwa fwaati ke beeno.

³³ Nzaambi cizibë ci n'sikë, we ba yiinu beeno booso. Ameenë.