Loomë 13 - N’KANGULU WUMOONË

Kucinzikë mikwa-lwaangu më n'tinu

¹ Wosuku muutu wufwenikini kucinzikë mikwa-lwaangu më n'tinu mën'salilë lutumu. Cibilë lutumu looso lun'fuminë ke Nzaambi. Lunë lukeeli luvaangunu ke naandi.

² Bwaawu, wunë wum'maangë lutumu be loolo, wun'tundëkënë lutumu luvaangë Nzaambi. Banë bëm'maangë lutumu beenë, bëm'bakë lufundusu mu baveekë.

³ Licyelikë, bën'vaangë mëboti bëkeeli yi boomë ko bu sizoonzi, kasi mu bo bën'vaangë libi. Njeeyi kusë n'zolë kucinzikë n'kwa-lwaangu lu n'tinu kwe? Boobo, vaangë liboti i njeeyi wum'bakë ndumu.

⁴ Cibilë naandi ke mu cisalu ci Nzaambi mu kun'ciinzi kusalë buboti. Kasi ningë njeeyi wun'vaangë libi, tiinë boomë! Cibilë buunë kuve naandi ke yi lutumu mu kukubesi: naandi ke mu cisalu ci Nzaambi mu kuleesi likaanzi lyaandi ke banë bën'vaangë libi.

⁵ Bwaawu, n'ciinzë beenë mu kucinzikë mikwa-lwaangu, yaaku tokë mu kutiinë likaanzi li Nzaambi, kasi mu kusalilë bo bun'kwendilë si.

⁶ Mati yivaandi lun'futilaangë mpaku, cibilë banë bën'tambulaangë yaawu, bën'salilë Nzaambi mu kusalë buboti cyaawu cisalu.

⁷ Futaanu kadë muutu cinë beeno lukun'defë: futaanu mpaku ke wo lufwenikini kuyifutilë i cipaasu ke wunë wufwenikini. Baanu yi luciinzu ke wunë beeno lufwenikini kucinzikë i zanjikaanu wunë beeno lufwenikini kuzanjikë.

Luzolo lu mbaasyaaku

⁸ Nudefyaanu cyosuku ko ke muutu, kanuku luzolo lo beeno lun'leesi benuveekë yi benuveekë. Cibilë, wunë wun'zolë bëmesë, naandyoowo wacinzikë buboti n'kaakë be woowo.

⁹ Licyelikë, tutumu « Keelë wulëvaalë, keelë wulëvoondë, keelë wulëkwiibë, keelë wulë ba cideenzë mu binë bibakë bayaaku », yivaandi byakë byooso bin'ka, bizitëminë mu lutumu lo lumweekë : « Njeeyi wufwenikini kuzolë mbaasyaaku bo buke njeveekë. »

¹⁰ Wunë wazolë, kusë n'vaangaangë lyosuku libi ko mu mbaasyaandi. Mu luzolo, tun'cinzikë buboti n'kaakë.

Kubëliminë mu nyisulu Kliistu

¹¹ Wunë wuzabisi teepu yizoolë tweekë : ntaangu yafwaanë kotukaanu mu tolo twiinu. Licyelikë, luvukulu lwabelëmë yiitu buyifanwabu, bo twatatikë kuta maanë.

¹² Bwiisi bwayiyililë, cilumbu cyabelëmë. Twe bumaanu mëvaangë mën'vangininë ku citoombi i twe boongaanu binwanunu bi cyeseesë.

¹³ Twe natyaanu luziingu lucinzëmë, bo bufwenikini mu cyeseesë ci cilumbu. Twe leembwaanu bulyaafu i kukolu mëlafu, busafu i sinsalulu syooso simbi, kwambilë i likwaafi.

¹⁴ Kasi vwaataanu Yeesu Kliistu baanu dedë mweekë Yeesu Kliistu Fumwiitu i keelaanu lulëyilekulë mu cimuutu ciinu mu kusalilë bideenzë.