Loomë 12 - N’KANGULU WUMOONË

Luziingu lumoonë mu cisalu ci Nzaambi

¹ Baanë bë nguli, bo Nzaambi waleesi buboti bwaandi mu beeso, yin'loombë luyiyindulë nyitwiinu dedë mweekë bivakuli bi moonyi, bi saantu, bëbëlikë mu Nzaambi. Mati waawu n'saambu wumboti lukun'vaanë.

² Keelaanu lulëlaandë sinsalulu si buloongo be buubu kasi biikaanu Nzaambi wulucitulë i wuluvaanë mëlyeelë mëmoonë. Boobo beeno lum'podi kubakulë linë Nzaambi kun'toombë : linë like liboti, linyeefë i lifwenikini.

³ Mu cibilë ci likabu linë Nzaambi wukum'pandikë mu buboti bwaandi, yin'tubilë obo mu beeno booso: keelaanu lulëyituunvi benuveekë mu kumonikë bënenë. Tiilyoko, lwe baanu simbalulu simboti, kadë muutu mu likanë lu ciminu cinë Nzaambi kun'vaanë.

⁴ Licyelikë nyitu mweekë yikeeli yiitu kasi yimunë binamë bimpaapë bike byakë byooso yi bisalu bivyakënë.

⁵ Beeso tuke mpaapë, kasi nyitu mweekë mu lubundunu yimunë Kliistu i beeso booso tubundënë besuveekë yi besuveekë dedë mweekë binamë bi nyitu mweekë.

⁶ Tuke yi mëkabu mëvyakënë tutambulë buunë mu kusalilë Nzaambi. Ningë wumweekë mu beeso wuke yi likabu li kuloongë libuungu kwatambulë ke Nzaambi, wufwenikini kusalilë lyaawu mu ciminu.

⁷ Ningë wumesë ke yi likabu li kusalë, Kwe sali. Wuke yi likabu li kusinë kwe sini.

⁸ Wunë wuke yi likabu li kuciinzi bayaandi kwe ciinzi. Wunë wun'vaanë businë bwaandi, kwe vaani yi mëleembë mooso. Wunë wun'tumi, we livaangë yi bungelë booso. Wunë wun'zudi bësyaanë wulivaangë mu liyaanji.

⁹ Luzolo lufwenikini kuba lucyelikë. Maangaanu libi, kangëmaanu mu liboti.

¹⁰ Lwe baanu luzolo mu benuveekë yi benuveekë bo baanë bë nguli bën'zolësënaangë. Baanu buvavambë mu kuyicinzikë benuveekë i benuveekë.

¹¹ Baanu yi n'viingu i bikaanu boolo. Salilaanu fumu yimunë n'timë wuwaalë buvavambë.

¹² Baanu mu nyeenzi mu cibilë ci civuufu ciinu, Cimbaanu moonyi mu binkuungë. Sambililaanu yimunë lusulumunu.

¹³ Lwe zudyaanu baanë yiinu bë nguli bëke mu n'ciinzë i keelaanu kuleembu lusalusu.

¹⁴ Sakumunaanu banë bëlëvaangë simbi. N'loombyaanu wubësakumunë i wuleembu kubësifë.

¹⁵ Baanu mu nyeenzi yimunë bo buke mu liyaanji, lilaanu yimunë bo buke mu kulilë.

¹⁶ Lwe baanu muutu mweekë benuveekë yi benuveekë. Leembwaanu kuyizanjikë, kasi cikunaanu bisalu bike kwaandi vwiili. Keelaanu kuyileesi ti beeno bangë bungelë.

¹⁷ Keelaanu lulëvutulë simbi mu simbi. Vangaanu simboti fë ntwaalë baatu bakë booso.

¹⁸ Ningë lyaawu lim'podi kuvangënë, i mooti like mu n'swiinu, baanu mu n'sikë yi baatu bakë booso.

¹⁹ Baanë yaamë bë nguli, keelaanu lulë vutulaanu fuutë benuveekë, kasi biikaanu likaanzi li Nzaambi limonikë, cibilë libuungu li Nzaambi lin'tubë : « Miinu yifwenikini kulunwaninë, yin'vaanë n'seendo mu beeno », bëtubilë Fumu.

²⁰ Kasi yivaandi : « Ningë mbeenyaaku ke yi nzalë, n'vaanë ci kulya. Mooti ke mu mpwiilë, n'vaani ci kunwa. Cibilë, mu kusiilë katyoobo, mëkalë më mbaasu wun'kucikë fë yilu n'twaandi. »

²¹ Keelë libi lilëkuvwaatë. Vaangë buumë mu kuluungë mpakë mu libi mu kuvaangë liboti.