Loomë 11 - N’KANGULU WUMOONË

Nzaambi wusye bumë Islayeelë ko

¹ Miinu yin'kufulë: Buni Nzaambi wabumë mboongwaandi? Moniko! Cibilë miveekë yim'bulë mbeembu awu Islayeelë yilë n'suundë Abalaamë, wumweekë mu likaandë li Bezamë.

² Nzaambi wusye bumë mboongwaandi ko, yo kusoolë faanë yi faanë. Mati beeno luzabisi, busonëmë mu n'kukë fanë Eli wulëkwayilë mu cibilë ci Islayeelë fë nduunzi Nzaambi :

³ « Fumu, baawu bavoondë mibici i bisë vaafë bivakuli : miinu yasyaalë wo miveekë vii i baawu bën'toombë kum'poondë. »

⁴ Kasi buni Nzaambi wun'vutulilë? « Miinu yaluundë saambwali li biveefi bi bëbakëlë banë bëkaambu kufukëminë nzaambi Baalë. »

⁵ Bo bumweekë, mu ntaangu ayi, yikeeli mwa ndaambu yi baatu banë Nzaambi kusoolë mu buboti bwaandi.

⁶ Naandi wubësoolë mu buboti bwaandi i yaaku mu cibilë ci mëvaangë, nkanë buboti bwaandi busye be ba buboti ko.

⁷ Mbici tum'monë? Mboongu Islayeelë busye tambulë ko manë baawu bëlëtoombaangë. Tokë banë Nzaambi kusoolë baawu bëtambulë. Kasi ke bën'ka, bësye zikulë kuwu ko,

⁸ bunë busonëmë : « Nzaambi wubëvangisi bëleembu kuwu, wusë bëvangisi bëleembu kumonë i bëleembu kuzikulë kuwu mu matu maawu tee cilumbu Cibubwayi. »

⁹ Daviidë wutubë : « Misaangwaawu ye ba mu baawu n'taambu, likoondi, ntekwaawu yikubwiilë i kutambulë linë lifwenikini mu baawu.

¹⁰ Meeso maawu mëba citoombi, mëleembu kumonë. Bëfumbikë n'gongo ntaangu syakë syooso. »

¹¹ Miinu yin'kufulë : Bunë Sizwiifë bakubilë libaku, babwa cimëkulu? Bunë yim'balë moniko! Kasi, mu cibilë ci mësumu maawu, mëkaandë mën'ka batambulë luvukulu, mu kuvangisi Sizwiifë bëba yi likwaafi.

¹² Kosuku, ningë lisumu li Sizwiifë lin'vangisi mboongo mu kuba mu businë bu cimpeefë, ningë lukulukulu lwaawu lwavaanë mëloongo mën'ka businë, buni bëm'beelë businë bu simboti mu banë bacikunë kuzingilë mu luvukulu!

Luvukulu lu banë bëkeelë ko Sizwiifë

¹³ Beeno yin'kaambë, lukeeli ko Sizwiifë : Miinu m'bunzi bëfilë mu banë bëkeeli ko Sizwiifë, mu kumweenë obo, yike liyaanji mu cisalu cyaami.

¹⁴ Miinu yin'tiisi kuvangisi ti bo bëke yaami mbeembu mweekë bëba yi likwaafi mu kuvuuci mwa baatu.

¹⁵ Licyelikë, bunë bëbëtulë ku nteku, buloongo busë kuba bundiku yimunë Nzaambi. Buni bum'beelë bunë bëbëtambulë vyaasi yin'ka? Bum'ba cyelikë nguliku luvutukulu lu lufwa mu luziingu!

¹⁶ Ningë cikuuku cin'tetë ci limpa bëyindulë ke Nzaambi, limpa lyakë lyooso lyaandi yivaandi. Ningë singaanzi si n'ti bësiyindulë ke Nzaambi, bitafi yivaandi byaandi naandi.

¹⁷ Islayeelë ke dedë mweekë n'ti oliivë wunë Nzaambi wacyelë mwa bitafi. Kasi njeeyi wukambusu Zwiifë naandi wakubuundë yi bitafi bin'ka buke citafi ci oliivë ci n'situ: njeeyi waboongë buyifanwabu yivaandi maakë mëlë mu kumakë mu lungaanzi lu n'ti oliivë.

¹⁸ Mati mu bwaawu, njeeyi kupodi ve kuleenji bitafi bëcyelë. Buni wum'podi kuyizanjikilë? Yaaku ti njeeyi wulë mu kunatë lungaanzi, kasi mati lungaanzi lwa lulë mu kunatë.

¹⁹ Njeeyi wukun'kaambë : « Kasi, bitafi obyo, bëbicyelë bwiinji yiyobëmë. »

²⁰ Licyelikë, byaawu bitabulu mu lukaambu lu ciminu i njeeyi ke foofo mu cibilë ci ciminu cyaaku. Kasi wuyizanjikë ko! We kebi.

²¹ Cibilë ningë Nzaambi sye vengulë Sizwiifë ko, bitafi bim'mënë, we kebi, mu kumaangë naandi kukuvengulë yivaaku.

²² Mu lyaawu, talë buboti i lukaambu lukutukukë ku Nzaambi: naandi wusye tukukë ko ke banë babwa i naandi ke buboti mu njeeyi. Kasi wufwenikini kutatëminë mu buboti bwaandi, ningë boobo ko, njevaaku wun'cyelu buke citafi.

²³ Ningë Sizwiifë bata maanë, baawu bën'kobëmë fo babë ntamë. Cibilë Nzaambi ke yi lutumu lu kubëkobëkooso.

²⁴ Ningë licyelikë njeeyi citafi ci n'ti oliivë ci n'situ bëcyelë i bëkunamikë mu n'ti bëkunë buni bum'beelë mu citafi bënamikë mu n'twaandi naveekë.

Luvukulu lu siitu lu mboongu Islayeelë

²⁵ A baanë bë nguli, yakuluzabikini mpangulu yi mësweeci më Nzaambi, bwiinji luleembu kuyileesi ti beeno bangë bungelë : mwa m'pooku mboongu Islayeelë m'ba yin'kaambu kubakulë tee yi fanë nkoongë yooso yi mëkaandë më si mën'vukilë.

²⁶ Mu boobo, Islayeelë yooso yin'vuukë bo bun'tubilë bisonë : « Ku Siyoonë kum'basikilë N'vuuci, naandi mba wun'kwakini bincindu mu sindaandu si Zakoobë.

²⁷ Bwa boobo bëm'beelë n'kangulwaami yin'vaangë yimunë baawu, fanë yim'botulilë mësumu maawu. »

²⁸ Mu cibilë ci mpolu mboti baawu simbeenyi siinu mu n'solulu Nzaambi, bëbëzolë mu cibilë ci mëtaatë maawu.

²⁹ Licyelikë mëkabu mëcyayuku yimunë mbilë Nzaambi bikeeli mësisukulu ko.

³⁰ Bo bumweekë licyelikë mu ntaangu ntamë beeno nusyelenvukilë Nzaambi ko, kasi buyifanu lwazaabë n'leenvo Nzaambi, cibilë ci lukaambu lu bulenvo lu Sizwiifë.

³¹ Bwaawu bësye len'vukë ko buyifanwabu bwiinji n'leenvo Nzaambi wuluveewu, kasi bwiinji baawu yivaawu bëzaabë buyifaanu n'leenvo be woowo.

³² Licyelikë Nzaambi wukaangë baatu lumoonyi booso mu lukaambu lun'leenvo bwiinji kuleesi bakë booso n'leenvwaandi.

Bunenë bunjiinji bu Nzaambi

³³ Liwingë li businë, bungelë i luzaabu lu Nzaambi budoongë, tufundusu twaandi sikaambu mëzabukunu i sinzilë syaandi mëzabukunu ve?

³⁴ Bo bun'tubilë bisonë : « Nani wuzabisi mbalulu yi Fumu? Nani wum'podi kun'vaanë ndoonji?

³⁵ Nani cin'tetë wun'kabilë ciimë mu kubakë na Nzaambi kun'vaanë yivaandi? »

³⁶ Byakë byooso bifuminë ke naandi, bilë mu kuzingilë mu naandi i byaandi ke Nzaambi kuvutukë bumpumu mu ntaangu syooso Ameenë!