Loomë 1 - N’KANGULU WUMOONË

Sibweekë

¹ Poolë, ciseelu ci Kliistu Yeesu, wutelu mu kuba m'bunzi i wusoolu ke Nzaambi mu kutendulë Mpolu Mboti.

² Nzaambi wukanyi ntaangu ntamë mu Mësonuku më saantu, Mpolu Mboti be yooyi ke mibicyaandi.

³ Lyaawu lin'tubilë mu cibilë ci mwanaandi, Fumwiitu Yeesu Kliistu: mu n'suundë Daviidë mu n'sunyi.

⁴ Kasi mu kumonë mu Ciluunzi ci Saantu, naandi wuyimonikë Mwaanë Nzaambi yimunë myaanzi yooso bunë kwavulumukë mu nkoongë bëfwa.

⁵ Mu naandi, Nzaambi wakum'paanë muulaandi mu kuba m'bunzi mu luzanjikulu lu Kliistu, bwiinji bunatë baatu bu buloongo booso mu kuta maanë mu naandi i mu kun'cikuninë.

⁶ Beeno yiviinu luke mu mboongë oyo, beeno lutambulë mbilë yi Yeesu Kliistu.

⁷ Miinu yilë mu kusonikë ke beeno luke ku Loomë, beeno booso Nzaambi kun'zolaangë i naandi kwatelë mu kuziingë yaandi. Biikë Nzaambi Tatiitu i Fumu Yeesu Kliistu wuluvaanë muulë i n'sikë.

Poolë ke tesu mu kumonë bitamaanë bi Loomë

⁸ Lin'tetë yin'toondë Nzaambi, mu Yeesu Kliistu, cibilë buloongo n'viipë bun'tubilë mu ciminu ciinu.

⁹ Cyelikë, Nzaambi mbaanjyaami, yilë mu kusalilë yi n'timaami wooso mu kutendulë Mpolu Mboti yin'talë Mwanaandi, naandi wuzabisi ti yilubalaangë beenë,

¹⁰ ntaangu syakë syooso sinë yin'sambilaangë. Miinu yin'loombaangë Nzaambi ti ningë bwa bukelili n'vwiilwaandi, wukum'paanë luvoto mu kutuukë ke beeno.

¹¹ Cyelikë, yike yi tesu mu kulumonë mu kulutwalilë likabu li Ciluunzi ci Saantu mu kuluciinzi bitu.

¹² Miinu yin'toombooso kuba yiinu bwiinji beeso booso tuciindë mu ciminu, beeno mu ciminu cyaami i miinu mu ciinu.

¹³ Baanë bë nguli, zaabaanu ti yiba yi tesu mu kwiisë ke beeno mu kubakë lukulë, dedë mweekë mu mëloongo mën'ka, kasi mpaapë binkuungë bim'pangisi kuleembu kwiisë ke beeno tee Cibubwayi.

¹⁴ Waawu n'funaami mu kweendë ke basë Ngeleesë i ke bibaabi, bangë bungelë i bo bukaambu bungelë.

¹⁵ Mati mu lyaawu yilutwalilë Mpolu Mboti, ke beeno yivaandi luke ku Loomë.

Luleendo lu Mpolu Mboti

¹⁶ Miinu yikeeli sonyi ko mu kutendulë Mpolu Mboti: cibeeni, yaawu yike luleendo lu Nzaambi mu luvukulu lu bakë booso bën'ta maanë, Sizwiifë ntetë kasi yivaandi singeleekë.

¹⁷ Cyelikë, mu yaawu n'sulumunu wu Nzaambi wum'monikë tokë mu ciminu, bunë busonëminë : « Wunë wuke wusulëmë wun'zingilë mu ciminu. »

Mëbi më baatu lumoonyi

¹⁸ Kusalaangë li yilu, likaanzi li Nzaambi lim'monikë kuke bisumuci, libi lyooso i lukaambu lusulumunu bin'vangisi cikaku mu bucyelikë.

¹⁹ Mu kumonë kwaandi, manë bëm'podi kuzaabë mu Nzaambi mën'zabëkënë ke bakë booso : Nzaambi naveekë wubëleesi maawu deku-dekoo.

²⁰ Licyelikë, kutoonë fanë ntonunu buloongo, mëvaangë maandi mën'kaambu kumonikë, luleendo lwaandi lu sakë yi sakë i bu Nzaambi bwaandi bun'leesi bunenë bunë bën'cikunë mëvaangë maandi. Mu bwaawu baatu lu moonyi kusë bë bëlen'vukilë ko.

²¹ Baawu bëzabisi Nzaambi, kasi bë kusë kun'cinzikë i kun'dumisi ko bunë bufwenikini. Tiilyoko, simbalulu syaawu syeekë buvulu i ciluunzi cyaawu cyakaambu lyeelë cyakotë mu citoombi.

²² Bëm'monikë bangë bungelë, kasi mëlawu:

²³ Baawu yikudumisi Nzaambi wun'kaambu kufwa, bakuundë bintumbë bin'leesi muutu wun'fwangaangë, sinuni, bibulu bike maalu më na i sinyokë.

²⁴ Mu bwaawu, Nzaambi wubëlekulë mu mëvaangë mëbi, mu bideenzë yi mitimaawu, bwiinji bëzingilë mu sonyi mu sinyitu syaawu baveekë yi baveekë.

²⁵ Baawu bën'viinjyaangë cyelikë ci Nzaambi mu lupuutu. Bën'kuundaangë i bën'salilaangë byo bivaangë Nzaambi mëyoolë naveekë N'vaanji wudumu tee yi tee! Ameenë.

²⁶ Bwaawu Nzaambi wusë bëlekulë mu binvweenvu bi sonyi. Bëkasi baawu baveekë, bën'viinji lubundënë lwaawu lu nyitu mu manë mëkaambu kufwaanë.

²⁷ Bo bumweekë, bëbakëlë bën'lekulë lubundunu yimunë bëcyeetu i bëm'ba bideenzë binenë ke bëbakëlë. Bëbakëlë bulë mu kuvaangë manë mëke sonyi baveekë yi baveekë i bën'tambulë kastiikë yilunyambukunu.

²⁸ Cibilë bamaangë kuzaabë Nzaambi, Nzaambi wabëlekulë mu mëlyeelë maawu më buvulu i bwaawu bavangilë makë mooso mëkaambusu kufwaanë.

²⁹ Baawu bëwaalë mëvaangë mëkaambu kusulëmë, simbalulu simbi, bideenzë, bubaalu, kuwaalë n'soci, kuvoondë, twambulu, lupuutu, bukuusu, ludyeengu,

³⁰ tusuungu, mbeeni yi Nzaambi, cisaayi, lunaangu, lungandaayi, bizaabi mu maambu mëbi, kuwulu ve libaambë.

³¹ Baawu lyeelë voo, bëkeeli ko besulëmë, luzolo vo, cyaali ve.

³² Baawu bëzabisi buboti lufundusu lu Nzaambi : banë bën'zingilaangë mu nteku oyo bën'fwa. Yaaku tokë baawu bën'cikunë kusalilë mëbi i bën'luunji banë bën'vaangë yivaandi mëbi.