Liikë 9 - N’KANGULU WUMOONË

Cisalu ci likuumi bë bwaali li bilaanzi

¹ Yeesu wutelë likuumi bë bwaali li bilaanzi i wusë bëvaanë lutumu yimunë luleendo lu kukulilë biluunzi bibi i kubelusi sincyeenzu.

² Kumanoofo, naandi kubëfilë mu kwe tenduli Lwaangu lu Nzaambi i mu kwe bëlusi bibeedo.

³ Naandi wusë bëkaambë : « Luboonjyaanu cyosuku ciimë ko mu mweendo, luveengu ve, cipokuluku ve, limpa ve, luboongo ve i leembwaanu kuba kadi muutu binkutu byooli.

⁴ Mooti bëbe lutambulë fosuku, kalilaanu mu n'zo be yooyi tee yi fanë beeno lum'botukaanu faawu.

⁵ Mwakë mooso, fanë baatu bëmaangë kulutambulë, botukaanu livulë lyaawu, basikaanu kukumunaanu n'kunkuumvu mu maalu miinu : lyaawu lim'ba lukumini mu baawu. »

⁶ Bilaanzi bisë kweendë. Baawu bëyevyokilaangë mu maalë makë mooso, ke tendulaangë Mpolu Mboti i ke belusyaangë bibeedo mwakë mooso.

Linyoonji li Eloodë

⁷ Kosuku, Eloodë, wunë wulë byaalë ku Ngalilee, wuyuwaangë kutubë makë mooso mëlëvyookaangë. Naandi wusye zaabë ko linë li kubalë mu mamoomë, cibilë, bën'viipë bëlëtubaangë : « Za-Batiisë wavulumukë mu nkoongë bëfwa! »

⁸ Bën'ka bëtubë: « Mati Eli wunë wamonikë. » Bën'kooso bisë bëtubë: « Wumweekë mu mibici podi kuba wavulumukë mu nkoongë bëfwa. »

⁹ Kasi Eloodë wusë tubë : « Miinu yivangisi kucyelë n'tu wu Za. Muutu mbici owo wunë yilë mu kuwu makë mooso omo? » Naandi wulëtoombaangë kumonë Yeesu.

Yeesu walikilë biveefi bi taanu bi bëbakëlë

¹⁰ Mimbunzi bisë vutukënë i bisë zabikini Yeesu maambu makë mooso manë baawu bëvaangë. Naandi wubënatë mbiinji yinë yikaambu baatu belë-belë ku lweeku lu livulë li Betesayiidë.

¹¹ Kasi baatu bisë zaabë lyaawu i bisë kun'laandë. Yeesu wusë bëkwaakë, wusë bëkaambë maambu më Lwaangu lu Nzaambi i wusë bëlusi banë bën'vwa n'ciinzë lubelukulu.

¹² Bwiisi busë toonë kwiilë. Mu lyalyooli, kuumi bilaanzi byooli bisë kweendë belë-belë fëke Yeesu i bisë kun'kaambë : « Vutulë baatu aba mu maalë i mu simpakë sibelëmë, bwiinji bëtoombë bikulya i fanë fë kunukinë, cibilë ci beeso tukeeli mu ntaandu ciyumi. »

¹³ Kasi Yeesu wusë bëkaambë : « Bëvaanyaanu benuveekë bikulya! » Baawu bisë vutulë : « Beeso tuke tokë mëmpa më taanu i mbisi wali. Njeeyi wuzolë ti beeso tweendë twasuumbi bilya binë baatu booso aba be fwenikini kulya? »

¹⁴ Licyelikë, lutaangu lu bëbakëlë lwabë kuunë kupodi kuba kwaasu ku biveefi bi taanu. Yeesu wusë kukaambë bilaanzi byaandi : « Bëkasyaanu mu mëkomo mëkumë-taanu më baatu. »

¹⁵ Bilaanzi bisë kuvitikë i bisë kasi baatu bakë booso.

¹⁶ Yeesu wusë kuboongë mëmpa më taanu i simbisi siwali. Naandi kusendulë meeso ku yilu i wusë toondë Nzaambi mu cibilë ci bilya beenë. Naandi wusë kubikabulë i kubivaanë ke bilaanzi byaandi, bwiinji bëkabilë baatu booso babë kuunë.

¹⁷ Wosuku muutu wulya i kukutu. Fë mbusë, bisë twaalë kuumi mikutë wali bëwaasi bitini bi mëmpa bënoongë.

Pyeelë watendulë ti Yeesu na kliistu

¹⁸ Cilumbu cin'viipë, Yeesu wulësambilë ku mpeengë i bilaanzi byaandi babë yaandi. Naandi wusë bëyufulë : « Nkoongë oyo baawu mbi bëlë mu kutubë mu miinwe? »

¹⁹ Baawu bisë n'vutulilë : « Bëmesë bën'tubë ti njeeyi Za-Batiisë, bën'ka, njeeyi Eli, bën'kooso, njeeyi wumweekë mu mibici mu ntaangu ntamë, wavulumukë. »

²⁰ Yeesu wusë bëkufulooso: « Vandi beeno, miinu nani yikeeli? » Pyeelë kun'vutulilë : « Mati njeeyi Kliistu li Nzaambi. »

Yeesu watendulë lufwa lwaandi i luvulumuku lwaandi

²¹ Yeesu wusë bëkandiminë yi nkasu bëleembu kulibulilë lukuungu ke wosuku muutu.

²² Naandi wusë kubweelooso kutubë : « Bëfwenikini, Mwaanë muutu kumonë mëncyeenji mëndoongë, kunyaciku ke mëkakëtë, ke singangë-Nzaambi i ke miloonji n'kaakë bëkum'bumë. Naandi bëkun'voondë i fë cilumbu cin'tatu, wun'vulumukë. »

²³ Fë mbusë, wusë kukaambë bakë booso : « Ningë muutu wun'zolë kun'daandë, wuleembu kufyaatë mu naveekë, kwe nati kuluuswaandi kadë cilumbu i wukun'daandë.

²⁴ Licyelikë, wunë wuzolë kuvuuci luziingu lwaandi, wulunyambikini. Kasi wunë wun'nyambikini lwaandi mu cibilë cyaami, wuluvuuci.

²⁵ N'ciinzë mbicye ke muutu mu kubakë businë bu buloongo n'viipë, ningë ti naveekë walubungisi, kaambofo wulë mu kulunyambikini?

²⁶ Ningë ti, muutu wum'monë sonyi mu cibilë cyaami miinu i mu cibilë ci mëbuungu maami, Mwaanë Muutu yivaandi wum'ba yi sonyi mu naandi, bunë naandi wun'kwisilë mu bumpumu bwaandi i bumpumu bu Tataandi i siyaanzi syaandi si saantu.

²⁷ Licyelikë beeno yin'kaambë: bën'ka bëkeeli afa bisë yifwiilë ko, kukaambu baawu kumonë ntetë Lwaangu lu Nzaambi. »

Lucitukulu lu Yeesu

²⁸ Bunë kwamani kutubë maambu be moomo, kwaasu ku lumiingu, Yeesu wusë boongë Pyeelë, Za i Zaakë i wusë kweendë yaawu ku yilu moongo mu kwe sambili.

²⁹ Bunë naandi kwabë mu kusambilë, ciinyi cyaandi cisë citukë i n'vwaatwaandi wusë manikë mpeembi yi kwaatë-yekë.

³⁰ Kuzimbukulabu, baatu bwaali bisë ba mu kutubënaangë yimunë Yeesu : babë Moyiizë i Eli.

³¹ Banë bëlëmonikë fë meeyi bumpumu bu yilu. Baawu bëlëtubënaangë yimunë Yeesu mu nteku yinë kufitë vangilë cisalu cyaandi mu lufwiilulu lwaandi ku Yelusaleemë.

³² Pyeelë i sindiku syaandi babë mu kuyidofë-tolo. Kasi ntaangu baawu bëkotukë, bëmonë bumpumu bu Yeesu i baatu bë bwaali banë babë yaandi.

³³ Ntaangu yo baatu aba bëbikilë Yeesu, Pyeelë wusë n'kaambë : « A N'loonji, liboti beenë tukalilë afa. Beeso tun'twilikë binzwananë bi tatu: cimweekë cyaaku, cimweekë ci Moyiizë, cimweekë ci Eli. » — Naandi wusye zaabaangë ko linë kulutubë. —

³⁴ Ntaangu kulëtubilaangë, livweeti lisë kumonikë i lisë bëzukë mu ciduundu cyaandi. Bilaanzi bisë kuba mu boomë bunë bamoni livweeti kubëzukë.

³⁵ Mbeembu yitendukë munë livweeti: « Naandyaawu na Mwanaami wunë miinu yasoolë. N'yuwulwaanu! »

³⁶ Ku mbusë kuwu mbeembu be yooyi, bilaanzi bisë kumonë Yeesu wo naveekë vikë-tikii. Bilaanzi bisë lingëmë i mu ntaangu beenë, baawu bësye be tubë lin'viipë ko ke wosuku muutu mu manë bëmonë.

Yeesu wabelusi mwaanë wukwamusu ke ciluunzi cibi

³⁷ Mu cilumbu cilandëkënë, baawu bisë nengumukë limoongo i nkoongë yinenë yi baatu yisë kudyengënë Yeesu.

³⁸ Muutu mweekë wusë kutoonë kulosukë munë nkoongë : « A N'loonji, njeeyi yim'bondilë, lakë ntalwaaku mu mwanaami wumweekë vwiili!

³⁹ Ciluunzi cibi kun'siimbaangë i kun'vangisyaangë kulosukë, cyaawu kun'nyikunaangë mu mëngolo mooso i kun'vangisyaangë kubaasi lifusë mu munu. Cyaawu kun'nyokulaangë i mpasi cyaawu kubotukë mu naandi.

⁴⁰ Miinu yisë loombë bilaanzi byaaku mu kukulë ciluunzi be cyooci, kasi baawu bësye podi kuve. »

⁴¹ Yeesu wusë bëtun'dilë : « A baatu bëbi yi bëkaambu ciminu, tee ntaangu mbici miinu yifwenikini kukalë yiinwee? Miinu yifwenikini kuciimbë moonyi tee ntaangu mbicye? Twaalë mwanaaku afa. »

⁴² Bunë mwaanë wusë belëmë yi Yeesu, ciluunzi cibi cisë n'lumbikë fë n'toto i cisë n'nyikunë yi mëngolo mooso. Kasi Yeesu wusë baminë ciluunzi cibi i wusë belusi mwaanë i wusë n'vutulë ke tataandi.

⁴³ Bakë booso bisë kusiminë kubookë mu luleendo lunenë lu Nzaambi. Bo wun'viipë wulë tulumukaangë mu makë mooso manë Yeesu wuluvaangë, naandi wusë kukaambë bilaanzi byaandi :

Yeesu wakë be tendulë lufwa lwaandi.

⁴⁴ « Lwe siimbaanu buboti manë yilë mu kulukaambë bubwayi : Mwaanë Muutu wun'vakulu mu myooko baatu. »

⁴⁵ Kasi bilaanzi bisye zikulë kuwu ko libuungu be lyooli : suundu libuungu lisë ba liswaamë mu baawu bwiinji bëleembu kuzikulë, i boomë bwabë yaawu mu kuyufulë Yeesu mu maambu omo.

Nani mwiinji bukuluutu?

⁴⁶ Foofë, bilaanzi bisë ba mu kufindënë simpakë baveekë i baveekë mu kuzaabë nani wabë mwiinji bukuluutu mu baawu.

⁴⁷ Yeesu abu kwazaabi manë mëlëvyookë, wusë boongë cimwamwanë, kum'belëmisi fëke naandi.

⁴⁸ Wusë bëkaambë : « Muutu wunë wun'tambulë cimwamwanë aci mu luzolë lwaandi mu miinu, miinu kun'tambulë. Wosuku wukun'tambulë, naandi wun'tambulë yivaandi wo wukun'filë. Cibilë wunë wuvyokilili bulesi mu nkoongiinu beeno booso, mati naandi na mwiinji bukuluutu. »

Wunë wun'kaambu kululeendë ke yiinu

⁴⁹ Za wusë bulë mbeembu: « A N'loonji, beeso twamonë muutu n'viipë wuke yobulaangë mu lizinë lyaaku baatu bëvwaatu ke biluunzi bibi, akasi beeso twan'fuungë cibilë naandi wukeeli yiitu nkoongë mweekë ko. »

⁵⁰ Yeesu wusë n'vutulilë : « Lun'fuunjyaanu ko, cibilë wunë be kaambu kululeendë, wuke yiinu. »

Basë Samali bëmaangë mu kwaakë Yeesu

⁵¹ Abu bilumbu byabelëmi binë Yeesu kufwenikini kunangukë ku yilu, naandi wutiisi yi nkasu mu kweendë ku Yelusaleemë.

⁵² Naandi wusë kufilë bipayi fë ntwaalaandi. Baawu bisë kweendë i bisë kotë ku bwaalë bumweekë bu Samali mu kubelikilë byakë byooso bin'talë lwisulu lwaandi.

⁵³ Kasi basë bwaalë bisë maangë kun'tambulë, cibilë naandi wulëkwendë ku Yelusaleemë.

⁵⁴ Bunë bilaanzi Zaakë i Za bisë zaabë lyaliili, baawu bisë tubë : « A Fumu, njeeyi wulizolisi ti, beeso tutumë mbaasu yikulukë ku yilu i yikubëlakisi? »

⁵⁵ Yeesu wusë balukë lweeku lwaawu i wusë bëseembë.

⁵⁶ Baawu bisë kweendë bwaalë bun'ka.

Banë babë yi tesu yikulaandë Yeesu

⁵⁷ Ntaangu bëlë ke yendilaangë mu nzilë, wun'viipë kukaambë Yeesu : « Miinu njeeyi yilaandë fosuku fanë wun'kwendë. »

⁵⁸ Yeesu kun'vutulilë : « Mibaku bëke yi mëbulu, sinuni si yilu bëke yi maanzi, kasi Mwaanë muutu wukeeli ko yi faamë fë kunukinë i kunungunë n'tu. »

⁵⁹ Yeesu wusë kukaambë muutu wun'ka : « N'daandi. » Kasi libakëlë wusë tubë : « A Fumu, m'biicyoobo ye tekë ziikë Tataami. »

⁶⁰ Kasi Yeesu wun'vutulilë : « Biikë sinvuumbi bëziikë sinvuumbi syaawu, kasi njeeyi, yendë we kutendulë Lwaangu lu Nzaambi. »

⁶¹ Wun'kooso kun'kaambë : « Miinu sya yikulaandë a Fumu, kasi m'biici ye kukaninë libaambë lyaami. »

⁶² Yeesu wusë n'kaambë : « Wosuku wum'ba mu kuvatë i wun'talë ku mbusë, naandyoowo wukeeli n'ciinzë ko ku Lwaangu lu Nzaambi. »