Liikë 7 - N’KANGULU WUMOONË

Yeesu wabelusi ciseelu cin'kuluutu-mësodaadi

¹ Bunë Yeesu kwamani kukaambë makë mooso omo ke mboongu baatu yilën'kuwaangë, Yeesu wusë kweendë ku livulë li Kapelënawuumë.

² N'kuluutu-mësodaadi wu Loomë wabë i cisasi kulëzolaangë beenë. Cisasi beenë cyabë ncyeenzu, fë mëvaambu më lufwa.

³ Kwayuwu ndumu Yeesu, na kun'filë mwa m'pooku mëkakëtë më Sizwiifë, mu kum'bondililë kwiisë mu kubelusi cisasi cyaandi.

⁴ Mëkakëtë kutuukë fëke Yeesu i bisë lengë m'bondililë yiveko mu bikumë abi : « Muutu awu, wufwenikini kutambulë lusalusu lwaaku.

⁵ Naandi wuzolisi mboongwiitu i naandi na wutuungë cizutununu ciitu mu mëkanë maandi. »

⁶ Yeesu wusë kweendë yaawu, i fo kwabelëmi yi n'zo, n'kuluutu-mësodaadi kufilë sindiku syaandi mu kwe n'kaambë : « A N'loonji, biikë kwaandi kuyivaangë simpasi. Miinu yisye fwanëkënë ko ti njeeyi mu kukotë ku n'zwaami.

⁷ Mati mu lyaawu, miinu yakaambu kwisilë miveekë fanë fëke njeeyi. Kasi tubë cikumë cimweekë bwiinji cisasi cyaami ci belukë.

⁸ Miveekë, yike mu lutumu lu bëkuluutu baami, i miinu yike yi mësodaadi mu tutumu twaami. Ningë yibe kaambë wun'viipë : “Yendë!” Naandi wun'kwendë. Ningë yibe kaambë ke wun'ka : “Yisë!” Naandi wun'kwisë. Mooti yibe kaambë cisasi cyaami : “Vaangë ali”, naandi wulivaangë. »

⁹ Yeesu kwayuwu bikumë obyo, liyaanji kun'kotilë mu cibilë cin'kuluutu-mësodaadi. Naandi wusë balukë i kukaambë nkoongë yilë ke n'laandaangë : « Miinu yilukaambë : yibuunu vyaasi kumonë muutu ke ciminu ci mpilë oyo, moniko keti ku Islayeelë. »

¹⁰ Bo bëtumë bisë vutukënë ku n'zo n'kuluutu-mësodaadi i bisë kutakënë cisasi mu buvinyi.

Yeesu wavulumunë mwaanë wu n'fwiili

¹¹ Cilumbu cilandëkënë, Yeesu wusë kweendë ku livulë bëteelë Nayiinë. Bilaanzi byaandi yimunë nkoongë yinenë yi baatu bëbuundë yaandi nzilë.

¹² Kwabelëmi fë nkotulu li livulë be lyoolyo, naandi kudyengënë vuumbi bëlënataangë ku bizyaami : naandi wabë mwaanë viingu wu n'fwiili. Nkoongë yinenë yi livulë yabë yimunë naandi.

¹³ Fumu abu kwam'moni, cyuundë kun'kotilë mu cibilë cyaandi i wusë n'kaambë : « Leembu kulilë! »

¹⁴ Naandi wusë belëmë i kusiimbë kasu. Banë bëlënatë kasu bisë sikëmë. Yeesu wusë tubë : « A cilesi bakëlë, miinu nje yin'kaambë, manë n'telë! »

¹⁵ Foofo, cibayë kulengë telëmë i kubulë mbeembu. Yeesu kun'tambikë ke mamaandi.

¹⁶ Bakë booso bisë ba yi boomë, i bisë tubë : « Mpumu ke Fumu Nzaambi, m'bici wunenë wamonikë fë meeyiitu! » Yivaandi : « Nzaambi wisisi mu kuzudi mboongwaandi! »

¹⁷ Libuungu olyo lisë nyambë bwendi Zudee i mëvulë mooso mëbelëmë mu manë Yeesu kuvaangë.

Bipayi bi Za-Batiisë

¹⁸ Bilaanzi bi Za-Batiisë bisë n'zabikini, maambu mooso manë mëlëvyookë. Za wutelë bilaanzi byooli mu kati kwaawu baawu,

¹⁹ i wusë bëfilë kuke Fumu bwiinji bën'yufulë : « Buni, njeeyi nje muutu wufwenikini kwiisë, kaambofo beeso tufwenikini kuciingë muutu wun'ka? »

²⁰ Bunë batuuci ke Yeesu, baawu bisë n'kaambë : « Za-Batiisë watufilë mu kukuyufulë : “Buni Njeeyi nje Kliistu wufwenikini kwiisë, kaambofo beeso tufwenikini kuciingë muutu n'ka?” »

²¹ Mo mu ntaangu beenë, Yeesu kubelusi mpaapë baatu mu sincyeenzu syaawu, naandi wusë bëvuuci mu biluunzi bibi i naandi wusë zibulë meeso më mpaapë simpofo.

²² Fë mbusë, naandi wusë kaambë bipayi bi Za-Batiisë : « Lwe yendyaanu mu ke zabikini Za maambu manë beeno lwamonë i mo lwakuwu: simpofo silë mu kumonë, baatu bëtolëkënë maalu bëlë mu kulyaatë, bangë bwaasi bëlë mu kubelukë, bidukë-matu bëlë mu kuwu, baatu bëfwa bëlë mu kuvulumukë i biyeembi bëlë mu kuwu Mpolu Mboti.

²³ Nyeenzi ke wunë wun'kaambu kuvubikë ciminu cyaandi mu miinu! »

²⁴ Bunë bipayi bi Za biyeendë, Yeesu wutoonë kutubilë mu cibilë ci Za ke nkoongë i kutubë : « Mbici luye monë ku ntaandu ciyumi? Liveeso lilë pukumukë mu mpeemwe? Monikoo.

²⁵ Mu lyalyooli, beeno mbici lusë ke monë? Muutu wuvwaatë milelë yi miingu? Monikoo, cibilë ti, banë bën'vwaataangë milelë yi bukaalu, bën'kalilaangë mu sinzo si mitinu.

²⁶ Kasi mbici beeno lusë ke monë? M'bicye? Cyelikë, miinu beeno yin'kaambë, i wunë wuvyokilili mwiinji m'bici.

²⁷ Cibilë, busonëmë mu Za : “Tala, miinu yin'filë cipayi cyaami fë ntwaalaaku, bwiinji wukubelikilë nzilë.” »

²⁸ « Yeesu wusë be bweelë kutubë, beeno yilë mu kukaambë, mu kati kwiinu muutu ve wubutu wuvyokililë bunenë yi Za. Mu kumonë, wunë wukeeli mwiinji bucyeeci ku Lwaangu lu Nzaambi, naandyoowo wuvyokilili bukuluutu yi naandi.

²⁹ Baatu bakë booso i binoongë mpaku bisë n'kuwulu. Baawu bisë zaabë ti Nzaambi muutu wusulëmë i baawu bëtambulë lubatizyaalu ke Za.

³⁰ Kasi Sifalisyaanu i miloonji n'kaakë bësye vitikë ko maambu manë Nzaambi kulëtiisyaangë mu baawu i baawu bisë maangë ti Za wubëbatizyaalë. »

³¹ Yeesu wutubooso : « Ke nani, miinu yim'podi kufwiici mboongu baatu yi ntaangu ayi? Baawu fwiifu yi nanye?

³² Baawu fwiifu si banë bëkalë fë mëvaambu më nzilë, fë ciyalëlë, bëke losukulaangë bayaawu : “Beeso tulusikilë mpyeepi, akasi beeno lusye cinë ko. Beeso tuluyolilë twiimbu tu cyuundë, akasi beeno lusye lilë ko!”

³³ Licyelikë, Za‐Batiisë wuyisë. Naandi wusye lyangaangë limpa ko i wusye nwaangaangë viinyi ko i beeno lusë tubë ti : “Naandi wuvwaatu ke ciluunzi cibi!”

³⁴ Mwaanë muutu wakwiisë, naandi wulë mu kulya i wulë mu kunwa. Beeno lun'tubë : “Talaanu, muutu owo wuke balaangë tokë kulya i ke nwangaangë viinyi, ndiku binoongë mpaku i bisumuci!”

³⁵ Kasi, bungelë bu Nzaambi bëm'monikaangë mu n'sulumunu ke baatu bakë booso bacikunë bwaawu. »

Yeesu ku n'zo Simu Falisyaanu

³⁶ Falisyaanu mweekë wutelë Yeesu ku n'zwaandi mu kwambulë. Yeesu wuyendë ke libakëlë beenë i wusë sungëmë fë meesë.

³⁷ Mu kati ku livulë beenë, mwabë n'cyeetu wabë yi lusuungu lubi. Bunë naandi kwayuwu ti Yeesu wulë mu kwambulë ku n'zo yi Falisyaanu, naandi wusë twaalë cibulikë ci alëbaatë ciwaalë yaafë.

³⁸ Naandi kukalë ku mbusë Yeesu, fë maalu maandi. Naandi wulëlilaangë i mësweelë maandi mëlëbosyaangë maalu më Yeesu. I naandi wusë kufyoonë maawu mu mileenjyaandi, kufifë maalu maandi i kumëdukililë yaafë.

³⁹ Bunë Falisyaanu wutelë Yeesu wusë monë katyoobo, naandi wusë tubë ku cimbeenzë cyaandi ci n'timë : « Ningë muutu awu wabë cyelikë m'bici, nkanë naandi wubakulë ti n'cyeetu wulë mu kun'siimbë owo n'sumuci kukeeli. »

⁴⁰ Mu lyalyooli, Yeesu wusë buulë-mbeembu i wusë kaambë Falisyaanu: « Simu, miinu yike yi lyaambu li kukukaambë. » Simu wusë vutulë : « We tubë kwaaku, a N'loonji. »

⁴¹ Yeesu wusë tubë : « Baatu bwaali bëyidefë simboongo ke cidefisi-mboongo. Wumweekë wudefë nkamë-taanu li binkongulu bi mboongo i wun'ka mëkumë-taanu më binkongulu.

⁴² Abu baawu bësye ba yi mëkanë ko më kun'futë, naandi wusë leembu kubëfutisi babë bwaali n'kanu. Mu babë bwaali, nani wuvyokisi kun'zole? »

⁴³ Simu wusë n'vutulilë : « Miinu yim'balë ti muutu wo naandi kwasiilë liboti mu lilaangu li mboongo. » Yeesu wusë n'kaambë : « Njeeyi waluungë. »

⁴⁴ Fë mbusë, Yeesu wusë balukë kuke n'cyeetu beenë, i wusë kaambë Simu : « Njeeyi wamonë n'cyeetu awee? Miinu yibe kukotë ku n'zwaaku i njeeyi sye kum'paanë kuve masi më kusukulë maalu. Kasi naandi wasukulë maalu maami mu mësweelë maandi i wafyoonë maawu mu mileenjyaandi.

⁴⁵ Njeeyi wusye kun'tambulë ko mu kun'fifë. Kasi naandi wusye biikë ko kufifë maalu maami kutoninë ntaangu yo yiyikotilë.

⁴⁶ Njeeyi wusye kun'dukulilë mëfutë ko ku n'tu. Kasi naandi wakun'dukulilë yaafë mu maalu.

⁴⁷ Mati mu bwaawu, miinu yikukaambë : luzolo lunenë lunë kwaleesi naandi lun'sisiminë ti mpaapë mësumu maandi makobukë. Kasi wunë bën'lenvukilë fwaati, wun'leesi luzolo lucyeeci. »

⁴⁸ Yeesu wusë kaambë n'cyeetu beenë : « Njeeyi wabakë lobukulu lu mësumu maaku. »

⁴⁹ Banë babë yaandi fë meesë bisë tubënë baveekë yi baveekë : « Muutu awu, nani kukeeli wun'kobulilë keti mësumu? »

⁵⁰ Kasi Yeesu wusë kaambë n'cyeetu : « Ciminu cyaaku cyakuvuuci. We yendi mu n'sikë. »