Liikë 5 - N’KANGULU WUMOONË

Yeesu watelë bilaanzi bin'tetë

¹ Cilumbu cin'viipë, Yeesu wabë mu ndaambu liyaangë li Ngenezaleetë i nkoongë yilengë m'belëmë mu kuwu libuungu li Nzaambi.

² Naandi wumonë myaatu wali mu ndaambu liyaangë : bivubë-toongo bëyiseesë i bëlësukulaangë mitaambwaawu.

³ Yeesu wukandëmë mu bwaatu bumweekë, bwabë bu Simu i wusë n'loombë bwiinji kuyakënë fwaati yi liloondo. Abu kwakali, naandi wusë ba mu kuloongë nkoongë baatu.

⁴ Bunë kwamani kutubë, na wusë kaambë Simu : « Kwesinë beenë cinaanu fanë fëke liwiingë li masi, boobo, njeeyi i bayaaku, lulakaanu mitaambwiinu mu kuvubë, njeeyi i sindiku syaaku. »

⁵ Simu wusë n'vutulilë : « A N'loonji, beeso twamonë simpasi bwiilu bwakë booso i cin'velë kubakë ve. Akasi mu libuungu lyaaku, yake n'lakë mitaambu. »

⁶ Abu balaci mitaambu, baawu kubakë civweetu cinenë ci litoongo, mitaambwaawu tiilyoko nkanë yake m'bënzikë.

⁷ Baawu bisë telë sindiku syaawu syabë mu bwaatu bumesë mu kubëzudi. Abu bayisi, baawu bisë waasi myaatu wali, kukambwaangë fwaati mu kusiindë.

⁸ Kwamonyoobo, Simu li Pyeelë wusë kufukumë fë nduunzi Yeesu i wusë tubë : « A Fumu, yakënë fëke miinu, cibilë miinu n'sumuci! »

⁹ Simu, bo bumweekë bakë booso babë yaandi, bëba yi boomë, mu cibilë ti civweetu ci litoongo bëvubë baawu.

¹⁰ Lisë ba bo bumweekë mu sindiku syaandi, Zaakë i Za, baanë bë Zebedee. Kasi Yeesu wusë kaambë Simu : « Wubaci boomë ko. Ku ntwaalë yikwisë, wum'ba civubë baatu. »

¹¹ Foofë, baawu bisë natë myaatwaawu fë ntaandu i bisë vubikë byakë byooso mu kulaandë Yeesu.

Yeesu wabelusi mungë bwaasi

¹² Yeesu bunë kwaba ku livulë limweekë, libakëlë lin'viipë lyabë yi bwaasi wuyim'belëmë. Bunë kwamoni Yeesu, naandi wusë fukumë fë ntwaalaandi, mbuunzu fë n'toto i wusë m'bondililë mu bikumë abi : « A Fumu, ningë njeeyi wulizolisi, njeeyi kupodi kun'lyomisi. »

¹³ Yeesu wusë n'taambë kooko, kun'siimbë i kutubë : « Miinu yilizolisi, we lyoomi! » Mo mu ntaangu beenë, bwaasi kusundilë kum'botukë.

¹⁴ Yeesu wusë n'kaambë : « Keelë wulëkaambë lyaambu ali ke wosuku muutu. Kasi yeendë we leesi nyitwaaku kuke ngangë-Nzaambi i kwindulë civakuli cinë Moyiizë kuloombë, mu kuleesi ke bakë booso ti njeeyi wabelukë. »

¹⁵ Mu bwaawu, saangu yi Yeesu yilutilooso kunyambë. Sinkoongë si baatu sisë dukënë mu kun'kuwu i mu kutambulë lubelukulu mu sincyeenzu syaawu.

¹⁶ Kasi Yeesu wusë volikë mu ntaandu ciyumi kunë kulësambilë.

Yeesu wabelusi cikatë

¹⁷ Cilumbu cin'viipë, Yeesu wulëloongaangë. Sifalisyaanu i miloonji n'kaakë bëba faanë. Baawu bëfuminë mu maalë mooso më Ngalilee i më Zudee i ku lweeku lu Yelusaleemë. Luleendo lu Fumu lwabë yimunë Yeesu i lwaawu lun'vangisi kubelusi bibeedo.

¹⁸ Baatu bisë natë kuunë cikatë fë kwaalë. Baawu bëlëtoombaangë buni bu kukosilë cibeedo ku kati ku n'zo i kun'tuulë fë ntwaalë yi Yeesu.

¹⁹ Akasi baawu bësye bakë ko faamë fë kukosilë cikatë cibilë ti nkoongë baatu. Mu lyalyooli, baawu bisë makë ku yilu n'zo i baawu bisë tobulë mwaanzë i bisë n'kululë yimunë nkwaalaandi fë ciyalëlë fë ntwaalë yi Yeesu.

²⁰ Bunë Yeesu kwamonë ciminu cyaawu, naandi wusë kaambë cibeedo : « A ndikwaami, njeeyi wabakë lobukulu lu mësumu maaku. »

²¹ Miloonji n'kaakë i Sifalisyaanu bisë tubë : « Nani kukeeli muutu be wuuwu? Wun'safulë Nzaambi? Nani wum'podi kukobulilë mësumu? Kanuku wo Nzaambi vwiili! »

²² Yeesu wusë kuzaabë simbalulu syaawu i wusë tubë : « Kwisilë bunye beeno mu kuba simbalulu osyo?

²³ Mbi bivyokili kuleengë, mu kutubë : “Njeeyi wabakë lobukulu lu mësumu”, voo mu kutubë : “Telëmë, lyaatë”?

²⁴ Kasi miinu yin'tiisi, beeno kulizaabë : Mwaanë Muutu wuke yi lutumu fë moongo butoto lu kukobulilë mësumu. » Mu lyalyooli, naandi wusë kaambë cikatë : « Nje yin'kaambë, telëmë, boongë nkwaalaaku i we vutukënë ku bwaalë bwaaku! »

²⁵ Mëlengë-lengë, muutu beenë wusë kutelëmë fë meeso më baatu booso. Naandi wusë boongë nkwaalaandi fanë kwabë kunukinë i wusë vutukënë ku n'zwaandi, yi ke dumisyaangë Nzaambi.

²⁶ Bakë booso bisë bwa libobo i bisë dumisi Nzaambi. Baawu bisë waalë yi boomë i bisë ke tubaangë : « Beeso twamonë bubwayi maambu mëtudë. »

Yeesu watelë Levi

²⁷ Ku mbusë mamoomo, Yeesu wubasikë i wumonë cinoongë mpaku, mu lizinë li Levi, wabë wukalë fo bën'futilaangë mpaku. Wusë n'kaambë : « Ndaandi. »

²⁸ Levi wusë telëmë, kubiikë byakë byooso i wusë n'laandë.

²⁹ Tee Levi, wusë vaangë cikaanvu ci kulya ku n'zwaandi. Mpaapë binoongë mpaku i baatu bën'ka babë yaawu fë meesë.

³⁰ Sifalisyaanu i miloonji n'kaakë babë yaawu cinguuku bëye bëdyeengaangë i bisë kufulë ke bilaanzi bi Yeesu : « Cibilë-mbici beeno lwakwambulilë i lwanwiinë yimunë binoongë mpaku i bisumuci? »

³¹ Yeesu wusë vutulë : « Baatu bëke buvinyi bëkeeli ko n'ciinzë mu muutu wububukë, kasi bibeedo ba bëke n'ciinzë mu naandi.

³² Miinu yisye kwisilë kuve mu kutelë bo bëyituunvi buzitu, kasi bisumuci bwiinji baawu bëvilukë. »

Liloonji li Yeesu mu linë lin'talë n'sweelë

³³ Sifalisyaanu bëkaambë Yeesu : « Bilaanzi bi Za, mpilë mweekë yi bo biitu, bën'kaangë n'sweelë ntaangu syooso i bën'kalilaangë mu n'saambu. Akasi bilaanzi byaaku, baawu kulya i kunwa. »

³⁴ Yeesu wusë bëvutulilë : « Beeno lum'podi kuvangisi bo batelu ku cikaanvu ci mëkweelë, kukaangë n'sweelë i kuba ti na n'nuni wuke yaawu fë cimweekë?

³⁵ Akasi bilumbu bin'kwiisë binë n'nuni wubëbotukilë, mu bilumbu be binë binaani, baawu bën'kaangë n'sweelë. »

³⁶ Yeesu wusë be bëteelë sasafë ayi : « Muutu ve wum'beenzë citeendë mu cinkutu cimoonë mu kuloondë cinkutu cikulu. Ningë muutu be siilë katiboobo, cinkutu cimoonë kubenzukë i citeendë ci cinkutu cimoonë kusiimbë ve mu cinkutu cikulu.

³⁷ Boobo, muutu ve yivaandi wun'sekulë mëlafu mëmoonë mu bidoyi bikulu, cinaanu ve mëlafu mëmoonë kuvangisi kwanzikë bidoyi i mëlafu kutyamukë i bidoyi kubulikë.

³⁸ Moniko, mëlafu mëmoonë, mëfwenikini kuba mu bidoyi bimoonë.

³⁹ Muutu ve wun'saafë kunwa mëlafu mëmoonë bunë kwamani kunwa mëkulu. Bën'tubë baati “Mëlafu mëkulu miinji lutwiingu.” »