Liikë 4 - N’KANGULU WUMOONË

Luseengulu lu Yeesu

¹ Ntaangu Yeesu wubotukë ku mwiilë wu Yulëdaanu, naandi wusë waalë Ciluunzi ci Saantu i Ciluunzi cisë kun'natë ku ntaandu ciyumi.

² Fë mbusë mëkumë-na më bilumbu Dyaabu wusë kun'seengë. Naandi wusye lya cyosuku ko mu bilumbu be biinë i bunë byavyooci, naandi wabë yi nzalë.

³ Fë mbusë, dyaabu wusë n'kaambë : « Mooti nje Mwaanë Nzaambi, kaambë limanyi ali licitukë limpa. »

⁴ Yeesu wusë kuvutulë : « Libuungu li Nzaambi lin'tubë : “Muutu kusë n'zingilë tokë mu limpa ko.” »

⁵ Dyaabu wusë n'natë ku yilu moongo i wusë n'leesi twaangu tooso tu buloongo,

⁶ i wusë tubë : « Miinu yikuvaanë lutumu looso i businë bu buloongo abu: byakë byooso obyo bëkum'paanë byaawu i miinu yim'podi kuvaanë byaawu ke wosuku muutu yizolisi.

⁷ Ningë ti njeeyi wukun'fukëminë, biimë byakë byooso bim'ba byaaku. »

⁸ Yeesu wusë n'vutulilë : « Libuungu li Nzaambi lin'tubë : “Njeeyi wun'kuundë Fumu Nzaambyaaku i naandi too wufwenikini kusalilë.” »

⁹ Fë mbusë, dyaabu wusë natë Yeesu ku livulë li Yelusaleemë. Naandi wusë n'tuulë ku yilu n'zo-Nzaambi i wusë tubë : « Mooti nje Mwaanë Nzaambi, we cidëmë fë n'toto,

¹⁰ cibilë ti busonëmë : “Nzaambi wun'tumë siyaanzi syaandi mu kukukeelë.”

¹¹ Yivaandi: “Baawu bëkukwaakë mu myookwaawu, mu kumaangë kuulu kwaaku kukubë tuuntu fë limanyi.” »

¹² Yeesu wusë n'vutulilë : « Busonëmë : “Bilii, keelë wulëseengë Fumu Nzaambyaaku.” »

¹³ Bunë kwamani kuseengë Yeesu mu sinteku syakë syooso, Dyaabu wusë kwakënë yaandi i wusë ke yendaangë mu kuciingë vyaasi yin'ka.

Yeesu watoonë cisalu cyaandi ku Ngalilee

¹⁴ Yeesu wusë vutukënë ku Ngalilee, wuwaalë mu luleendo lu Ciluunzi ci Saantu. Saangwaandi yinyambë bwendi libweeti lyooso li Ngalilee.

¹⁵ Naandi wulë ke loongaangë mu bizutununu i bakë booso biye vaangaangë lunyemu lwaandi.

Yeesu bën'nyakunu ku Nazaleetë

¹⁶ Yeesu wusë kweendë ku livulë li Nazaleetë kunë naandi kuyonzukulë. Cilumbu ci saba, naandi wukotë mu cizutununu bunë buba ciipë cyaandi. Naandi wutelëmë mu kutaangë maambu më Nzaambi

¹⁷ i bisë n'tambikë libuuku li Ezayi m'bici lyabë liziingëmë. Kwazibuli Libuuku, naandi wusë monë lweeku lo bësonikë :

¹⁸ « Ciluunzi ci Fumu cike mu miinu, cibilë naandi wakun'soolë mu kunatë Mpolu Mboti kuke biyeembi. Naandi wakun'filë mu kutendulë lobukulu mu banë bëke mu buloko, i naandi likabu li lumonunu ke simpofo, mu kuvaanë lusyalulu ke banë babë mu civikë,

¹⁹ mu kutendulë n'vu wo Fumu kun'lesilë muulaandi. »

²⁰ Oboobo, Yeesu wuziingë libuuku, i kulitambikë ke ciseelu i wusë kalë. Baatu bakë booso babë mu cizutununu bësitikë ntalwaawu mu naandi.

²¹ Foofë, naandi wusë ba mu kubëkaambë : « Cibubwayi aci, maambu më Nzaambi lwakuwu ama mavangënë. »

²² Bakë booso bëlëtubë cimbaanji mu Yeesu i bëbwa libobo mu mëbuungu mëboti manë kulë baasi. Baawu bëlëtubaangë : « Naandi kwe mwaanë Zozeefë? »

²³ Yeesu wusë bëvutulilë : « Mpakë ve! Mëlookë beeno syalukun'teelë nganë ayi : “A ngaangë, yibuuci njeveekë” mëlookë lukun'kaambë yivaandi ti : “Vaangë afa, mu livulë lyaaku, makë mooso bunë twakuwu, manë wuvangisi ku livulë li Kapelënawuumë.” »

²⁴ Naandi wusë be tubë : « Cyelikë yilukaambë, m'bici ve bën'tambulaangë buboti ku bwaalë bwaandi.

²⁵ Licyelikë yilukaambë, mpaapë bëfwiili bëyabë ku Islayeelë, mu ntaangu Eli, fanë liyilu liba likangëmë fë mivu tatu i singoondi samunu, i fanë cibuyi cinenë cisë batë si yooso.

²⁶ Tiilyoko Nzaambi, wusye filë ko Eli ke wun'viipë mu nkoongaawu, kanuku ke n'fwiili wu musë Salëpeeta, mu libweeti li Sidoonë.

²⁷ Faanë fabë yivaandi mpaapë bangë bwaasi mu Islayeelë, mu ntaangu Elizee m'bici. Akasi, wun'viipë too wubelukë, kanuku wo Namaanë musë Sili. »

²⁸ Bakë booso, bëwaalë likaanzi mu cizutununu, abu bayuwu bikumë obyo.

²⁹ Bamani n'telë, baawu kusiimbë li kukulë Yeesu i kum'baasi ku ngaandë, kun'natë fë songë-songë cimongo-mongo kunë baawu bëtungilë livulë lyaawu li Nazaleetë, bwiinji bën'sindikilë kusi.

³⁰ Kasi naandi wuvyokilë fë meeyaawu i wusë ke yendaangë.

Muutu wukwamusu ke ciluunzi cibi

³¹ Yeesu wuyendë ku Kapelënawuumë, ku livulë li Ngalilee, i naandi wululoongaangë bakë booso cilumbu ci saba.

³² Baatu bëtulumukë mu sindoongulu syaandi, cibilë naandi wulëtubilaangë yimunë lutumu looso.

³³ Munë cizutununu, mwabë muutu wukwamusu ke ciluunzi cibi i wulë losukaangë mu mbeembu nkamu :

³⁴ « Ee ngete! Nje mbi wun'toombë mu beeso, Yeesu li Nazaleetë, nje wakwiisë mu kutunyambëkënye? Miinu yizabisi ti : njeeyi Saantu wo Nzaambi kufilë! »

³⁵ Yeesu wusë kubaminë ciluunzi cibi yin'kasu yooso i kun'kaambë : « Kalë swii i we basikë mu muutu owo. » Ciluunzi cibi cisë lumbikë muutu beenë fësi i cisë basikë mu naandi i kun'vaangë ve yosuku mpasi.

³⁶ Bakë booso kubwa libobo i ke tubësënaangë baveekë i baveekë : « Mpilë mbici libuungu olyoo? Muutu owo wun'tumi yi lutumu i luleendo biluunzi bibi i byaawu kubasikë! »

³⁷ Saangwaandi kunyambë bwendi libweeti lyooso.

Yeesu wabelusi mpaapë bibeedo

³⁸ Abu kwabasikë ku cizutununu, Yeesu kwe kotë ku n'zo Simu. Kosuku, n'kwekisi Simu wabë yi libaawu linenë. Baawu kubondililë Yeesu mu kuvaangë lin'viipë mu naandi.

³⁹ Naandi wubutëmë i wutundilë yin'kasu libaawu i libaawu lisë kum'biikë, naandyooso kusundilë kutelëmë i wusë kubësalilë.

⁴⁰ Fë mësindulu më ntaangu, babooso babë yi bibeedo bi mpilë yi mpilë yaandi bisë bëtwaalë kuke Yeesu. Naandi wutendikë myooko ke wumweekë-wumweekë mu baawu i wububelusi.

⁴¹ Biluunzi bibi yivaawu bisë basikë mu mpaapë baatu bwendi ke losukaangë i ke tubaangë ti : « Njeeyi wuli Mwaanë Nzaambi. » Kasi naandi wulë ke bëtundilaangë i ke bëfuungaangë mu kutubë, cibilë baawu bëlëzaabaangë ti naandi Kliistu kukeeli.

Yeesu wulë mu kuloongë mu bizutununu

⁴² Bunë bwiisi bwacya, Yeesu kubasikë, ke yendaangë ku mpeengë. Nkoongë baatu yiyen'cyeengaangë i yisë ke tuukë fanë kwabë. Baawu bën'vwa n'ciinzë mu kun'simbililë mu kumaangë naandi kubëbiikë.

⁴³ Akasi naandi wusë bëkaambë : « Miinu yifwenikini kutendulë ke bëmesë Mpolu Mboti yi Lwaangu lu Nzaambi, mu mëvulë mën'ka yivaandi, cibilë mu lyaawu Nzaambi wukun'filë. »

⁴⁴ Naandi wulë ke loongaangë mu bizutununu bi Zudee.