Liikë 3 - N’KANGULU WUMOONË

Liloonji li Za-Batiisë

¹ Mu kuumi mivu taanu bu cifumu ci n'tinu Sezaalë li Tibeelë. Poonsë Pilaatë wabë fumu yi Zudee, Eloodë wabë wulëbyalilë ku Ngalilee, i mwanaandi nguli Filiipë wabë fumu ku libweeti li Itulee i Talakoniidë, Lizanyaasë wabë fumu ku Abileenë,

² Aanë i Kayiifë babë bëkuluutu bë singangë-Nzaambi. Libuungu li Nzaambi lisë kuwukunë ke Za, mwaanë Zakaali mu ntaandu ciyumi.

³ Za wutaabë libweeti lyooso libelëmë yi mwiilë Yulëdaanu. Naandi wulëtendulaangë : « Balulaanu mëvaangë miinu, tambulaanu lubatizyaalu i Nzaambi wulëluvaanë lobukulu lu mësumu miinu. »

⁴ Bwaawu buvangëninë dedë mweekë manë Ezayi m'bici wusonikë mu libuuku lyaandi : « Muutu ke losukaangë mu ntaandu ciyumi : Belikaanwee nzilë yi Fumwee, sulikaanwee tobulu twaandyee!

⁵ Mivwiili yooso yim'batëmë, myoongo yooso i cimongo-mongo cyooso bin'lalukë. Sinzilë sikondëkënë sin'sulëmë, sinzilë sidiifë sin'lulëmë.

⁶ Baatu bakë booso bëmonë luvukulu lun'vaanë Nzaambi. »

⁷ Mpaapë baatu bëlëkwisaangë ke Za bwiinji kubë batizyaalë. Mu lyalyooli, naandi wulëbëkaambaangë : « A likaandë li simpili, nani waluleesi mu kutiinë likaanzi li Nzaambi, lyo lyabelëmë?

⁸ Lwe leesyaanu mu mëvaangë ti beeno lwavilukë i keelaanu kutubë mu benuveekë ti : “Abalaamë na nkaakiitu.” Cibilë, miinu yiluzabikini ti, Nzaambi kupodi kucitulë mëmanyi omo sindaandu si Abalaamë!

⁹ Citali cyabelëmë mu kucyelë miti mu singaanzi syaandi: wosuku n'ti wukaambu kubutë mëkuundi mëboti, bu wucyelë i bu wulakë ku mbaasu. »

¹⁰ Baatu bëlën'kufulaangë : « Mbici beeso tufwenikini kuvaangë? »

¹¹ Naandi wusë bëvutulilë : « Wunë wuke binkutu byooli wufwenikini kuvaanë cimweekë ke wunë wukambusu cyaawu i wunë wuke ci kulya wufwenikini kukabë. »

¹² Binoongë mpaku yivaandi bisë kwiisë ke Za, bwiinji wubëbatizyaalë, i bisë kun'yufulë : « A N'loonji, mbici beeso tufwenikini kuvaangë? »

¹³ Naandi wubëvutulilë : « Nufutisyaanu ko lubaku lulutilë, kanuku lo bëzitikë. »

¹⁴ Mësodaadi bisë n'yufulë : « Beeso, buni tufwenikini kusiilee? » Naandi wusë bëkaambë : « Luboonjyaanu ko simboongo si muutu mu bumbakë-mbakë, kaambofo, kufwitikilë ve muutu maambu. Kasi cikunaanu lifutë liinu. »

¹⁵ Baatu booso bëlën'siilë cibiindë : kadë muutu wulëbalë ti Za wabë Kliistu.

¹⁶ Mu lyalyooli, Za wusë bëkaambë bakë booso : « Miinu yilë mu kulubatizyaalë mu masi. Kasi wunë wulë mu kwiisë, mwiinji luleendo yi miinu. Miinu yisye fwaanë ko mu kukutulë misiingë mëpaapë maandi. Naandi na wulubatizyaalë mu Ciluunzi ci Saantu i mu mbaasu.

¹⁷ Naandi wusiimbë cicyenzulu fë kooko bwiinji mu kukabulë mëkuundi i bitiiti. Naandi wuzonzikë mëkuundi kunë bën'swekilaangë maawu, i wun'kookë bitiiti ku mbaasu yin'kaambu kuzimë. »

¹⁸ Mati mu kubëtelaangë mpaapë vyaasi, Za wutendulilë Mpolu Mboti ke mboongu baatu i wusë kubëciinzi bitu mu mpaapë bikumë.

¹⁹ Mu lyalyooli, Za wuseembë fumu-lwaangu Eloodë, cibilë naandi wukweelë Elodyaadë, n'kasi nkoombaandi, i wusë vaangooso mpaapë maambu mëbi.

²⁰ Oboobo Eloodë wuvaangooso lyaambu lin'ka libi : naandi wutuulë Za mu buloko.

Lubatizyaalu lu Yeesu

²¹ Fë mbusë kubatizyaalë baatu bakë booso, Za wubatizyaalë yivaandi Yeesu. Ntaangu Yeesu wulësambilaangë, li yilu kuzibukë

²² i Ciluunzi ci Saantu cibetëmë fëke naandi mu dedë mweekë nyitu buke libeembi. Mbeembu yitendukë ku yilu : « Njeeyi nje Mwanaami mëdilë. Mu njeeyi mwa mu keeli sinyeenzi syaami syooso. »

Suundu yi Yeesu

²³ Yeesu wabë kwaasu mëkumë-tatu më mivu fë ntonunu cisalu cyaandi. Naandi wabë, bunë bëlëbalilaangë, mwaanë Zozeefë, wunë wabë mwaanë Eli,

²⁴ mwaanë Mataatë, mwaanë Levi, mwaanë Meleeki, mwaanë Zanaayi, mwaanë Zozeefë,

²⁵ mwaanë Mëtatyaasë, mwaanë Amoosë, mwaanë Nawuumë, mwaanë Esëli, mwaanë Nangayi.

²⁶ Mwaanë Maatë, mwaanë Mëtatyaasë. Mwaanë Semeyiinë, mwaanë Zoseekë. Mwaanë Zoda,

²⁷ mwaanë Zowanaanë, mwaanë Leesa, mwaanë Zolobabeelë. Mwaanë Salatyeelë, mwaanë Neli,

²⁸ mwaanë Mëlëki, mwaanë Adi, mwaanë Kosaamë, mwaanë Elëmadaamë, mwaanë Eelë,

²⁹ mwaanë Yeesu, mwaanë Elyazeelë, mwaanë Zoliimë, Mwaanë Mataatë, Mwaanë Levi,

³⁰ mwaanë Simeyoonë, mwaanë Zuda, mwaanë Zozeefë, mwaanë Zonaamë, mwaanë Elyakimë,

³¹ mwaanë Meleya, li mwaanë Mena, mwaanë Matata li mwaanë Nataanë, mwaanë Daviidë,

³² mwaanë Yesee, mwaanë Obeedë, mwaanë Boozë, mwaanë Sala, mwaanë Nasoonë,

³³ mwaanë Aminadaabë, mwaanë Adëminë, mwaanë Alëni, mwaanë Esëloonë, mwaanë Peleesë, mwaanë Zuda,

³⁴ mwaanë Zakoobë, mwaanë Isaakë, mwaanë Abalaamë, mwaanë Tela, mwaanë Nakoolë,

³⁵ mwaanë Seluusë, mwaanë Laguyi, mwaanë Faleekë, mwaanë Ebeelë, mwaanë Sala,

³⁶ mwaanë Kenaanë, mwaanë Alëpasaadë, mwaanë Seemë, mwaanë Nowee, mwaanë Lemeekë,

³⁷ mwaanë Matusaleemë, mwaanë Enookë, mwaanë Zaleedë, mwaanë Malaleelë, mwaanë Kaanë,

³⁸ mwaanë Enoosë, mwaanë Setë, mwaanë Adaamë, mwaanë Nzaambi.