Liikë 24 - N’KANGULU WUMOONË

Luvulumuku lu Yeesu

¹ Mu menë-ngwaali yi cilumbu ci lumiingu, bëcyeetu bisë kweendë ku libuumbë i bisë natë mëfutë më n'fiimbu mo bëbelikë.

² Baawu bisë monë ti limanyi lilëkaangë nkotulu libuumbë balivenjikë ku nteku.

³ Baawu bisë kotë, kasi bësye monë ko nyitu yi Fumu Yeesu.

⁴ Bunë baawu bisë ba mu kunyotëkënë, bëbakëlë bwaali bëvwaatë binkutu bilë lesikë bisë bëmonikinë fanë baawu bëba.

⁵ Bo babë mu boomë i bisë butikë mboku mu si, baatu beenë bisë bëkaambë : « Cibilë-mbici beeno luke tombilaangë muutu wuke moonyi mu kati ku baatu bëfwa?

⁶ Naandi wukeeli faafë ko, kasi wavulumukë mu befwa. Tebukaanu moonyi mu maambu manë naandi kulukaambë bo kwabë ntetë ku Ngalilee :

⁷ “Bufwenikini Mwaanë Muutu kuvakulu kuke bisumuci, kubaandu fë kuluusu, i naandi wun'vulumukë cilumbu ci cin'tatu.” »

⁸ Baawu bisë kutebukë moonyi mu manë Yeesu kutubë.

⁹ Baawu kubotukë ku libuumbë i bisë ke yendaangë mu ke leelë saangu, ke kuumi m'bunzi mweekë i ke bilaanzi byooso bin'ka.

¹⁰ Yabë Maali li Magëdaalë, Zaanë, i Maali li mamë Zaakë. Bëcyeetu bën'ka bo babë yaawu, bisë kaambë maambu mo mëmweekë ke mimbunzi.

¹¹ Kasi mimbunzi bëbalë ti maambu manë bëcyeetu bëtubë, mabë maambu mëkaambu nteende i baawu bësye më n'vitikë ko.

¹² Kosuku Pyeelë wusë telëmë i wukumbelëlë ntiinu ku libuumbë. Naandi wusë betëmë i wutalilë tokë biteendë bi milelë yi liinë. Fë mbusë, naandi wuvutukë ku n'zwaandi, i wusë bwa libobo mu maambu manë mëvangënë.

Mu nzilë Emayuusë

¹³ Munë cilumbu beenë, bilaanzi byooli bëlëkwendë ku bwaalë bu Emayuusë. Bwaalë beenë bwabë kwaasu ku zoolë wali li kulyaatë mu kutuukë ku Yelusaleemë.

¹⁴ Baawu bisë ke bulilaangë sinkuungu mu maambu manë mëvangënë.

¹⁵ Ntaangu yo baawu bëyetubënaangë, naveekë Yeesu wusë bëbelëmë i ke lyaataangë yaawu.

¹⁶ Baawu bëm'monë, kasi cin'viipë ci bëkakini mu ku bën'zaabë.

¹⁷ Yeesu wusë bëkufulë: « Lyaambu mbici beeno lulë mu kubulilë sinkuungu mu nzilë? » Yi cyaali cyooso, baawu bisë sikëmë.

¹⁸ Wumweekë mu baawu, awu bëlëteelë Kelopaasë, wusë kun'kaambë : « Mu baatu bakë booso bë Yelusaleemë, wo njeeyi wun'ziimbë maambu mavangënë mu bilumbu abi? »

¹⁹ Naandi wusë bëkufulë: « Maambu mbici? » Baawu bisë n'vutulilë : « Maambu makwisilë Yeesu li Nazaleetë! Naandi wabë m'bici wunenë, wusë leesi lyaawu fë ntwaalë Nzaambi i fëke baatu bakë booso mu mëvaangë i mu ndongulwaandi.

²⁰ Bëkuluutu bë singangë-Nzaambi i sifumu siitu sisë n'vakulë mu kun'tabë lufwa i bisë m'baandë fë kuluusu.

²¹ Beeso twabë yi civuufu ti naandi na wufwenikini kuvuuci mboongo Islayeelë. Kasi mu makë mooso omo, mati bubwayi aci cilumbu cin'tatu kutoonë maambu be moomë misë vangënë.

²² Mwa ndaambu bëcyeetu bë cinguuku ciitu batutulumisi, lyaawu licyelikë. Baawu bëyendë mu menë-ngwaali ku libuumbë,

²³ kasi baawu bësye monë ko nyitwaandi. Baawu bëvutukë mu kutuzabisi ti siyaanzi sisë bëmonikinë i bisë bësisiminë ti naandi ke moonyi.

²⁴ Bayiitu bën'ka bisë kweendë ku libuumbë i bisë ke monë makë mooso mo bëcyeetu bëtubë, kasi naandi, baawu bësye monë kuve. »

²⁵ Mu lyalyooli, Yeesu wusë bëkaambë : « Baatu bëkaambu mëlyeelë, beeno mu kuta maanë mpasi mu maambu makë mooso mëtendulë mibici!

²⁶ Lisye fwaanë ko ti Kliistu kumonë simpasi simpilë osyo ntetë naandi kukotë mu bumpumu bwaandi? »

²⁷ Fë mbusë, Yeesu wusë bëzimuninë maambu makë mooso bunë mësonëmë, kutoninë mu mëbuuku më Moyiizë tee kulandilë mu mëbuuku më mibici.

²⁸ Bunë batuuci belë-belë fë bwaalë kunë baawu bëlëkwendë, Yeesu wusë sya bukë ti naandi wuzolë kuvyookë bwaalë beenë.

²⁹ Kasi bisë m'bondililë: « Kalë yiitu, bwiisi bwasiindi i bwiilu bwabelëmi. » Mu lyalyooli, naandi wukotë i wusë kalë yaawu.

³⁰ Naandi wukalë yaawu fë meesë, wuboongë limpa i wutoondë Nzaambi. Fë mbusë, naandi wulimukënë i wusë bëvaanë lyaawu.

³¹ Boobo, meeso maawu mësundilë kuzibukë i baawu bisë n'zaabë. Kasi naandi wusë zimbilë fë ntwaalaawu.

³² Baawu bëtubënë baveekë yi baveekë : « Nusye monë libaasë kwe buke mbaasu, yilëviikë mitimiitwe bunë naandi wulëtukambilaangë mu nzilë i wulëtuzimuninaangë manë mësonëmë? »

³³ Mëlengë-lengë baawu bisë telëmë i bëvutukënë ku Yelusaleemë. Baawu bisë zakënë kuumi cilaanzi cimweekë bëdukënë yimunë bayaawu,

³⁴ i bakë booso bëlëtubaangë : « Licyelikë, Fumu wavulumukë! Simu wam'monë! »

³⁵ I bilaanzi bi byooli yivaandi bisë bëzabikini makë mooso buni mëvangënë mu nzilë i buni baawu bëzabilë Yeesu bunë kwabë kumukënë limpa.

Yeesu wayileesi ke bilaanzi byaandi

³⁶ Baawu bulëtubangooso, bunë Yeesu naveekë wuyiyileesi fë meeyaawu i wusë tubë : « N'sikë we bayiinu! »

³⁷ Baawu bisë waalë yi boomë, i mu lutekutu, cibilë baawu bëbalë ti bamonë n'kulu.

³⁸ Kasi Yeesu wusë bëyufulë : « Cibilë-mbici mitimiinu yeekë yekësë-yekësë? Mu mbici beeno lwekilë yi mëketikini ku kati ku mitimiinwe?

³⁹ Monaanu myookwaami i maalu maami : Mati miinu! Nsiimbyaanu i monaanu, cibilë n'kulu wukeeli ko yi n'sunyi i mivesi, tiilyoko mu miinu, bo lum'podi kumweenë. »

⁴⁰ Naandi wusë tubë bikumë obyo i kubëleesi myooko i maalu maandi.

⁴¹ Bunë baawu bisye be bakooso ko likanë mu kuta lyaanë, bo liyaanji lisë vyokililë i bëtulumukë, naandi wusë bëyufulë : « Lukelyaanu yi cin'viipë ci kulya afa? »

⁴² Baawu bisë kun'vaanë citini ci mbisi ciyoku.

⁴³ Naandi wuboongë cyaawu i wusë lya fë meeso maawu.

⁴⁴ Fë mbusë, naandi kubëkaambë : « Bunë yabooso yiinu, tala manë yilukaambë : maambu manë mësonëmë mu cibilë cyaami mu n'kaakë Moyiizë, mu mëbuuku më Mibici, i mu libuuku li Twiimbu mëfwenikini kuvangënë makë mooso. »

⁴⁵ Mu lyalyooli, naandi wusë bëvaanë mëlyeelë më kubakulilë maambu mësonëmë,

⁴⁶ i naandi wusë bëkaambë : « Tala manë bësonikë : Kliistu wufwenikini kumonë simpasi i kuvulumukë mu nkoongë bëfwa fë cilumbu cin'tatu,

⁴⁷ i bufwenikini kulongilë mu lizinë lyaandi fë mëkaandë makë mooso, mu kutoninë ku Yelusaleemë. Mu kukaambë baatu mu kubalulë sindyatulu i kutambulë n'leenvu wu mësumu.

⁴⁸ Beeno lweekë mbaanji mu makë mooso ama.

⁴⁹ Miveekë yilufilë likabu linë Tataami wukanyi mu beeno, kalilaanu mu livulë tee beeno lun'walilë mu lutumu lu yilu. »

Yeesu wanangukë ku yilu

⁵⁰ Fë mbusë, Yeesu wusë bënatë ku ngaandë livulë, belë-belë yi Betani, kuunë, i faawu, naandi wusë nangunë myooko i wusë bësakumunë.

⁵¹ Bunë kwamani kubësakumunë, naandi wusë kabukë yaawu i wusë nangukë ku yilu.

⁵² Bilaanzi bisë n'dumisi i bisë vutukënë ku Yelusaleemë, bëwaalë liyaanji linenë.

⁵³ Baawu bisë kalilë mu n'zo-Nzaambi i ke dumisyaangë Nzaambi.