Liikë 2 - N’KANGULU WUMOONË

Lubutulu lu Yeesu

¹ Mu ntaangu be yiina, n'tinu bëlëteelaangë Sezaalë Ugusëtë wusë vaanë n'kaakë wukuvaangë lusanzëmu lu baatu booso bë lwaangu looso lu Loomë.

² Lusanzëmu be loolo lun'tetë, lusë vangënë ntaangu yo Kilinyusë wabë n'tinu libweeti li Sili.

³ Bakë booso bëlëkwendaangë mu ke sonikë mëzinë maawu, kadë muutu ku bwaandi bwaalë kubutulu.

⁴ Zozeefë yivaandi wusë botukë ku livulë li Nazaleetë li Ngalilee, i wusë kweendë ku Betëlëyeemë li Zudee kunë kubutulu n'tinu Daviidë, cibilë naandi wabë muutu wu likaandë li Daviidë,

⁵ mu ke sonikë lizinë yimunë Maali, wunë naandi kukanyi kukweelë, wabë mu bweembë.

⁶ Bunë babë ku Betëlëyeemë, cilumbu cikuvwa-moonyi cisë fwaanë,

⁷ i naandi wusë butë mwaanë wun'tetë wu bakëlë i wusë n'ziingë mu milelë i kun'nungunë ku kati ku cilikulu ci bibulu, cibilë bësye bakë ko ciikë ci kunukinë mu n'zo-beeni.

Yaanzi yisë monikinë miluungë mëmemë

⁸ Munë libweeti be lyooli, mwabë miluungë mëmemë yiluvyosilaangë bwiilu mu sisolë mu kuluungë mëmemë maawu.

⁹ Yaanzi mweekë yi Fumu yiyisë kubëmonikinë i bumpumu bu Fumu busë bëzukë mu cyeseesë. Bisë ba mu boomë bunenë.

¹⁰ Kasi, yaanzi yisë bëkaambë : « Nubacyaanu boomë ko! Licyelikë, miinu yalunatinë Mpolu Mboti yin'vangisi liyaanji linenë mu baatu bakë booso :

¹¹ cibilë wabutu bubwayi mu beeno N'vuuci Kliistu Fumu ku livulë li Daviidë.

¹² Lyaliili mu beeno ciliimbu, luke zakini mwaanë ndeenji wuziingu mu milelë i wunungunu mu cilikulu ci bibulu. »

¹³ Kususukulabu, yaanzi yisë kumonikë yi lukoongu lunenë lu siyaanzi lu yilu silë ke dumisyaangë Nzaambi, ke tubaangë :

¹⁴ « Bumpumu ke Nzaambi kunë salaangë mëyilu, i n'sikë fë n'toto fë meeyi baatu banë kuzolisi! »

Miluungë mëmemë bëyendë ku Betëlëyeemë

¹⁵ Bunë siyaanzi sye bëbiici mu kuvutukë ku yilu, miluungë mëmemë bisë tubënë baveekë yi baveekë : « Twe yendyaanu tee kunë Betëlëyeemë, bwiinji twe moni maambu manë Fumu kwatuzabikini. »

¹⁶ Mëlengë-lengë baawu bisë ke yendaangë, ku Betëlëyeemë i bisë ke zakënë Maali, Zozeefë, i mwaanë ndeenji wunuukë mu cilikulu ci bibulu.

¹⁷ Bunë bam'moni, baawu bisë kubëzabikini bëbëkaambë mu cibilë ci mwaanë be wuuwu.

¹⁸ Bake booso banë bëyuwu bisë tulumukë mu manë miluungë bëbëkaambë.

¹⁹ Maali wuluundë makë mooso omo mu cimbeenzë cyaandi ci n'timë i wusë ke balaangë beenë.

²⁰ Fë mbusë, miluungë mëmemë bisë ke vutukunaangë. Baawu ke sangililaangë i ke dumisyaangë Nzaambi mu makë mooso manë bëyuwu i bëmonë. Cibilë makë mooso mëvangënë bunë yaanzi kubëtendulilë.

Lizinë li Yeesu

²¹ Bunë naanë li bilumbu bye fwaani mu kum'bukë bubakëlë, oboobo bisë n'vaanë lizinë : li Yeesu, linë bën'teelë ke yaanzi, ntetë naandi kuba mu civumu.

Ludumbulu lu Yeesu mu n'zo-Nzaambi

²² Ntaangu yisë kufwaanë mu Zozeefë i Maali mu kuvaangë n'saangu wu bulyomisi, bunë bën'loombilë n'kaakë Moyiizë. Baawu bisë kunatë mwaanë mu n'zo-Nzaambi yi Yelusaleemë mu kun'dumbulë fë nduunzi yi Fumu,

²³ cibilë bësonikë mu n'kaakë wu Fumu : « Wosuku mwaanë wun'tetë wu bakëlë wum'butu, bëkun'tuunvi mu Fumu. »

²⁴ Baawu bëfwenikini kuvaanë yivaandi civakuli bësonikë mu n'kaakë Fumu : « Mëbeembi mwaali më bidukë, kaambofo mëbeembi mwaali mëcyeeci. »

²⁵ Ku Yelusaleemë kwabë muutu mweekë mu lizinë li Simeyoonë. Naandi wabë muutu wusulëmë i wabë sisu mu Nzaambi. Naandi wulëciingaangë muutu wunë Nzaambi wufilë mu kuvuuci mboongu Islayeelë. Ciluunzi ci Saantu cyabë yaandi

²⁶ i wusë n'kaambë ti naandi kusë lengë fwa ko kukaambu kutekë kumonë ntetë Kliistu wunë Fumu kun'filë.

²⁷ Ciluunzi ci Saantu cisë natë Simeyoonë ku n'zo-Nzaambi. Libaambë li Yeesu lin'natë mu kun'dumbulë bunë bun'lombilë n'kaakë,

²⁸ Simeyoonë wusë kwaakë mwaanë mu myookwaandi i wusë toondë Nzaambi i kutubë :

²⁹ « A Fumu, buyifanwabu lukanyu lwaaku lwavangënë. Njeeyi kupodi kubiikë ciseelu cyaaku kufwiilë mu n'sikë.

³⁰ Cibilë ti, miinu yamonë mu meeso maami N'vuucyaaku,

³¹ luvukulu lunë njeeyi wubelikilë ntamë mu cibilë ci mboongu baatu yooso:

³² mati cyeseesë cin'vangisi njeeyi kuzabëkënë mu baatu bëke mu sisi syooso mu buloongo yinë yim'ba bumpumu bu Islayeelë likaandë lyaaku. »

Lubiku lu Simeyoonë

³³ Taatë i mamë Yeesu, bisë tulumukë mu kuwu maambu mo Simeyoonë wutubë mu naandi.

³⁴ Simeyoonë wusë bësakumunë i kukaambë Maali, mamë Yeesu : « Mwaanë awu wakwiisë mu kubwiisi, kaambofo kuvumbulë baatu bëmpaapë bë Islayeelë. Naandi wum'ba ciliimbu ci Nzaambi, cin'vangisi nkankini,

³⁵ i wum'baasi fë ciyalëlë simbalulu siswaamë mu mitimë mpaapë baatu. Mu njeveekë Maali, mwaangë wun'tobulë mbalyaaku dedë mweekë cisabë. »

Aanë, m'bici

³⁶ Fabë yivaandi m'bici mweekë wu n'cyeetu mu lizinë li Aanë, naandi wabë mwaanë Penweelë, wu cifuumbë ci Aseelë. Naandi wabë cinunu. Naandi wuziingë saambwali li n'vu yimunë n'nuni wunë kukweelë fë bulesi bwaandi,

³⁷ i wusë kuba n'fwiili, naandi wusë kudukusi naanë li mëkuumi na më n'vu. Naandi wusye botukaangë ko ku n'zo-Nzaambi, kunë kulësalilaangë Nzaambi bwiilu ku bwiilu muunyi ku muunyi : ke kaangaangë n'sweelë i ke sambilaangë.

³⁸ Naandi wusë kutuukë mu ntaangu be yooyi i wusë kutoondë Nzaambi. Naandi wutubilë mu mwaanë ke baatu bakë booso banë bëlë ciingë ti, Nzaambi wuvuuci baatu bë Yelusaleemë.

Luvutukulu ku Nazaleetë

³⁹ Bunë libaambë li Yeesu lisë manë kudumbulë mwaanë bunë bun'lombilë n'kaakë Fumu, baawu bisë vutukënë yi mwaanë ku Ngalilee, ku livulë lyaawu li Nazaleetë.

⁴⁰ Mwaanë wusë ke kulaangë i ke ciindaangë. Naandi wabë wuwaalë bungelë i muulë wu Nzaambi wabë mu naandi.

Yeesu mu kuumi mivu wali mu n'zo-Nzaambi

⁴¹ Mu kadë n'vu, libaambë li Yeesu lilëkwendaangë ku Yelusaleemë mu n'saangu Paakë.

⁴² Ntaangu Yeesu wudukisi kuumi mivu wali, baawu bën'natë bunë bwabë ciipë cyaawu.

⁴³ Bunë n'saangu wamani, libaambë lisë vutukënë, Kasi Yeesu mwaanë, wusyaalë ku Yelusaleemë, taatë i mamë bësye zaabaangë ko.

⁴⁴ Baawu bëlëbalaangë ti Yeesu wabë yimunë bayaawu bëlëkwendë yaawu mu mweendo, i bisë lyaatë cilumbu cin'viipë. Fë mbusë baawu bisë toonë mu kun'toombë mu nkoongë bayaawu bëke likaandë limweekë i mu nkoongë sindiku syaawu.

⁴⁵ Kasi baawu bësye m'monë ko i bisë ke vutukunaangë ku Yelusaleemë mu ke n'toombi.

⁴⁶ Fë mbusë bilumbu bi tatu, baawu bisë ke n'zakënë mu n'zo-Nzaambi. Naandi wabë wukalë fë meeyi miloonji n'kaakë, wulëbëkuwaangë i wulëbëkufulaangë byuufu.

⁴⁷ Bake booso bëlën'kuwaangë, bisë tulumukë mu cibilë ci mëlyeelë maandi i mputululu kulëvaanë.

⁴⁸ Ntaangu yo taatë yi maamë bëm'moni, baawu kubwa libobo, i mamë wusë n'kaambë : « A mwanaami, cibilë-mbici njeeyi watusiilë katyoobwe? Tataaku i miinu tulë mu cyuundë mu ke kutoombaangë. »

⁴⁹ Naandi wubëvutulilë : « Cibilë-mbici beeno luke kun'tombilaangë? Beeno lusye zaabë kwe ti miinu yifwenikini kukalilë mu n'zo Tataamye? »

⁵⁰ Kasi baawu bësye zikulë kuwu ko maambu manë naandi wulëbëkaambaangë.

⁵¹ Yeesu wusë vutukë yaawu ku Nazaleetë. Naandi wulëbëcinzikaangë. Mamaandi wulë ke sweekaangë maambu makë mooso ku cimbeenzë cyaandi ci n'timë.

⁵² Yeesu wulë ke kulaangë mu mpuungë i mu mëlyeelë i wulëmonikë buboti fë nduunzi yi Nzaambi i fë ntwaalë baatu.